اختي فتاة سورية
قرأت الموضوع والردود وباقي الاخوات ما قصروا وتقريبا غطوا الموضوع بأكمله يعني طرحوا عليك الحلول المناسبه وموضوع ست الحسن شاكل واستفدت منه كمان

لكن لاحظت من رد لك انه ابنك خوفه تعدة خوفه من الموت ربنا يطول عمره الى خوفه من الحراميه

يعني ممكن يكون في داخله صراع وللان مش مقتنع بالاجابات وبده يلفت نظرك اكثر فانتقل لاعلامك بالخوف من الحراميه
او فعلا شغلة الخوف من الموت ادت الى التفكير بامور اخرى مثل الحرامية وغيرها من الامور
طبعا في علم النفس اسم العارض هذا( الفوبيا)
وعلى شان تتجنبي انها تتعمق في ابنك وتصير الاشياء اللي بخاف منها وبفكر فيها كثير لازم تبلشي

اولا
حاولي تعرفي السبب الاساسي اللي ادى لابنك للتصريح بالخوف من الموت وبعدها من الحراميه
ممكن يكون السبب بعيد عن ذلك وحاب يلفت انتباهك

وثانيا
سواء توصلتي للسبب بشكل مقنع ام لا حاولي تجعلي ابنك يفضفض وقت ما بريد ومع من يريد يعني انت او والده والاولاد بحبوا يبشعروا انه الهم حيز من الوقت والمكان الخاص يتكلموا فيه مع احد الوالدين بشكل ودي وصريح
يعني مثلا

اقترحي عليه وقت ما تكوني فاضيه وهو كمان انه يرافقك لغرفة نومك وقولي له حابه استريح شوي رافقني

وهو وقتلا ما يشوف نفسه وقد خصيته بوقت ومكان مريح راح يرتاح ويتكلم
ابدئي الكلام معه بالسؤال عن المدرسه واحوالها كيف اموره وما تسأليه كثير
بعدها اصمتي وتلاهي بقرائة كتاب وهو وحده راح يحاول يطرح معك موضوع للحديث
في نهاية الجلسه كوني حنونه معه واسأليه اذا عجبته فكرة الاستراحة معا
وهذا اول الطريق اللي راح يجعل ابنك كل ما تضايق من حد اوشيء او حتىحب يفضيلك بسر ما ,راح يطلب منك انكم تستريحوا في المكان الاول


استغلي الشهر الكريم واهديه كراس للرسم حتى لا يشك سبب رغبتك انه يرسم
اطلبي منه يهديك رسمه من رسوماته كل يوم بمناسبة شهر رمضان وقولي له انك حابه تعملي ملف وتحفظيهم فيه لانك بتحبي هذا النوع من الهدايا وهو اصبح في سن ممكن يهديك رسمه من ايده وافكاره

طبعا الرسم ما هو الا فضفضه من ابنك حتى لو لم يكن يجيده
راح يعبر عن اللي بداخله وعن الاشياء والمخاوف وحتى السرور اللي بداخله من خلال الرسم والاشياء اللي ما قال لك اياها راح يقولها من خلال الرسم
ومش مهم ان ما قدرتي تفسري كل اللي برسمه
الهدف انه يطلعه من داخله


اذا كان متعود تقرئي له قصه قبل النوم افعلي ذلك او ابدءي بذلك فهو من سبل الاتصال بين الام وابناءها ومن اسباب جعلهم بنهوا يومهم بقصة وحاولي ان كان عندك وقت ما بين فترة والثانيه تسأليه هو واخوته ان كانوا بفضلوا انها القصه تنتهي بشكل اخر ويعطوك اقتراحاتهم
كل واحد يوم


عوديهم يقرؤوا سورة صغيرة من القران الكريم او ايه الكرسي وراح يتعودوا يبناموا هاديين ومرتاحين وبعد ايام راح تلاحظي تحسن كبير
وابنك راح ترسخ بدماغه وبدةون مخاوف انه الموت حق لكن راح يركز بأمور ثانيه
ارجو اني اكون قد افدتك

فكرة الرسم منصوح بها من قبل اخصائيي علم النفس للاطفال

ومجربتها مع ابني في ظروف اخرة والحمدلله نفعت بشكل كبير ونصحتني بها طبيبة الاطفال بعد ما استشارت اخصاءية اطفال في علم النفس
موفقة

اختي سو هابي ...الفكرة اعتقد اخذها من التلفيزيون ..والله يعطيك العافية فعلا ابني عاطفي جدا وبتأثر فيه للمسات الحانية

اختي ام زايد كلامك درر يعطيك العافية

اختي امبراتيث ...يعطيك العافية ..الحقيقة ابني اول شي كان خايف من الحرامية وبعدين صار يخاف من الموت ...وانا مو ان بخصص له وقت بس اول مرة اجا بده يحكي معي عن الحرامية اخذته على غرفتي وجلسنا مع بعض ومن وقتا صار كل ما بده يحكي لي شي بقول لي ماما ممكن نروح على غرفتك بس انا رح احاول اساوي متل ما قلتي واشوف اذا رح يقول لي شي او لا ... اما شغلة الرسم فساويتها معهم كتير بس هنن بيرسموا لما بيجي على بالهم ما دائما

يعطيك العافية اختي وشكرا على ردك

السلام عليكم

حبيت خبركم شو صار مع ابني

امبارح اجا ابني وقال لي ماما انا رجعت اخاف من اني اموت ... فجلسنا نحكي وقلت له معظم الي كتبتوه وقلت له اني كنت اخاف من الموت وانا صغيرة ..فقال لي طيب بس اذا متت اتذكري دائما اان انا بحبك انتي والبابا .....صراحة اثرت فيني كلماته ...

المهم جلسنا نحكي وسبحان الله انتقل الموضوع للجنة وايش فيها وكتير اتغيرت نفسيته بالحكي عن الجنة ...وصار يتخيل ايش الاشياء الي بده ياها بالجنة وسألني بنصير عجايز بالجنة فحكيت له عن قصة العجوز الي قال لها الرسول صلى الله عليه وسلم : لا يدخل الجنة عجوز .. وشو كان قصد الرسول عليه الصلاة والسلام بقوله ....فعجبته الشغلة وصار يضحك من قلبه

بعدين قال لي ماما كل ما قلت لك خايف من الموت ذكرني بالجنة وخليني افكر ايش بدي فيها

والحمد لله انبسط وراح ينام وهو عم يفكر ايش بده يكون عنده بالجنة

فتاة قطعتيلي قلبي على ابنك.. ما شاء الله عليه باين انه بيحبك بدرجة كبيرة و متعلق فيكي..
شوفي أنا لما كنت بعمره كنت خاف من كل شي.. كل شي بمعنى كل شي.. يعني (العفو منك) لو بدي فوت على الحمام اطلب من اخواتي يوقفوا على الباب مشان ما ينط علي حرامي من الشباك و اصرخ و ما يسمعوني..
و وقت النوم كنت اركض أول وحدة نام مشان اسمع اهلي بالغرفة التانية و اطمن و اقدر اغفى.. و كنت كتير فيق بالليل و اتأكد ان كل أهلي عم يتنفسوا.. مر عليهم واحد واحد و حط ايدي قريب من انفهم لإتأكد انهم عم يتنفسوا..
و كانت تجيني كوابيس و اصرخ بالليل و تجي ماما تنام جنبي.. أفلام هندية :)
المهم كنت خاف كتير من الموت و من أي شي تاني.. لحد ما صرت شغل شريط قرآن بالغرفة قبل ما نام و اقرأ من كتاب ادعية كل يوم قبل النوم.. و صرت اغفى على صوت القرآن و نام بعمق.. و مع الوقت قل خوفي..
صحي لهلأ أنا بحلم بالموت و بفيق مرعوبة و بتأكد ان جوزي و ابني عم يتنفسوا.. بس خف الموضوع كتير..
بعتقد هالموضوع إله علاقة بشخصية الانسان.. دائماً الانسان الحساس بتتكون عنده مخاوف زيادة عن اللزوم.. و الظاهر شخصية ابنك قريبة لشخصيتي :)
عوديه ينام على صوت القرآن و يقرأ أدعية قبل النوم و ان شاء الله تقل مخاوفه مع الوقت..
الله يحفظلك ياه هو و اخواته..

هلا عروس بتصدقي ذكرتيني ان انا كمان هيك كنت بس مالهادرجة ...انا كمان كنت احيانا قوم ودور على خواتي وهنن نايمين لشوفهم عم يتنفسوا ولا لا واذا شكيت بتنفس وحدة هزها لاشوف عم تتحرك ولا لا ....بس هاي من زمان كتير والله كنت نسيانتها ....

الله يحيمنا جميعا ويحفظ لنا الي بنحبهم يارب

بجوز فعلا بتعتمد على نفسية الانسان وشخصيته بس لما بطلع على ابني بقول ياربي ما بدي ياه يكون حساس وعاطفي لها الدرجة حتى ما بتعذب كتير بحياته ....الله يحفظه والجميع وييسر الخير يارب

تسلمي على ردك