ساعدوني بخرب بيتي بأيدي.ضروري أرجوكم.

:06:السلام عليكم ورحمه الله وبركاته

اشلونكم اخواتي كلكم فردا فردا

المهم انا عندي مشكله:44:وبصراحه قلبي يعورني عليها.

انا تزوجت من فتره واحب زوجي، وزوجي يموت فيني بطريقه ما تتصورونها
((الله يديم المحبه انشالله)).

انا متزوجه ولد خالتي وهو اصغر مني بسنتين تقريبا .

المشكله انه في اخر فتره قمت الاحظ شي اني ماحبه يقعد جنبي واتضايق اذا باسني او لمسني واتهرب من حقوقه الشرعيه.

:06:أنا((اعوذ بالله من كلمه انا))ما كنت جذي بدايه زواجي كنت عاديه اعطيه حقوقه ومستانسه بالامر ((يمكن لاني جديده فكنت مشتطه وانه امر جديد علي)).

امس هاوشني واول مره بحياته يدزني تعرفون ليش؟ السبب انه انا كنت قاعده معاه بالصاله واشوف التلفزيون ونتعشى المهم عقب العشا قالي انا بروح اريح لاني تعبان اذا شليتي العشا تعالي قلت له اوكيه، وربي كنت طبيعيه مافيني شي وقلت له اوكيه بصلي العشا وباجيك قالي اوكيه.

المهم عقب ما خلصت اموري ورحت الغرفه كنت جالسه جنبه على السرير المهم بدا يسوي حركات بس والله حركات عاديه حتى لو قلتها ما تضر ابد يعني حط راسه على كتفي ومن هالاشياء العاديه ، انا قمت اتافف واحس اني متضايقه قال لي متضايقه مني قلت له لا المهم يوم بدا شوي شوي عصبت عليه وقلت له قوم قالي مو من حقك المهم تهاوشنا وخليته يقوم قالي انا مابي شي منك الا انك تحضنيني لين انام او اني احط راسي على رجلك وبنام وليش انتي تعامليني كذا ومن هالخرابيط وانتي مقصره وانا مستحملك.

انا قمت رحت الصاله قلت له تعال هناك نتفاهم، رحت الصاله وجاني المشكله شفت اغنيه بالتلفزيون وقمت ارقص ولا كانه فيني شي بس صدقوني مادري من شنو يعني مو حركه عبط انا مسويتها هي طلعت جذي، وهو طالعني مستغرب مني.

المهم عقب قعدنا في الصاله وهو بجنبي وانا كنت اشوف التلفزيون قالي انتي اشفيج مو طايقتني ليش ما تشوفيني ليش تصدين عني انتي ما كنتي جذي من قبل قلت له ما فيني شي المهم خلاني وراح الغرفه قعدت شوي وقلت بروح اراضيه ، يوم رحت اراضيه الا شب فيني وقام يهاوش خليته ورحت الغرفه الثانيه وكنت جالسه على السرير وهو واقف قبالي ويصرخ علي وانا كنت اصيح وفجاه دزني بالقو على السرير ويصرخ علي من قلب (( عمره ما هاوشني بهالاسلوب)):(.

وخذني من إيدي بالقو ووداني الصاله وقعدنا هناك، علشان يخلي السالفه تهدا.

وبعدها قالي امشي بروح اريح قلت له كأنه جاتني الدوره، قام وصرخ انتي شايفتني ابيك بس علشان هالامر(( المعاشره)) وانتي كذابه ما عليج دوره ولا شي بس انتي تتهربين.((ملاحظه انا عندي مشاكل بالهرمونات فتنزل الدوره اي وقت )).

المهم حاولت اراضيه والحمدلله قدرت، وهو بعد حاول يشوف الاشياء اللي تعكر مزاجي وتضايقني وما يسويها وعدى اليوم الحمدلله.

اخواتي ادري اني طولت عليكم ودخلت بتفاصيل كثيره وبيمكن تكون محرجه بالنسبه لكم، بس حبيت تشاركوني معاناتي.

انا صارلي تقريبا سنه ونص او اكثر بشوي متزوجه وماعندي عيال واشتغل من الساعه 6ونص الصبح لين الساعه 3 العصر.

وغير هاذا الهرمونات مو منتظمه عندي واخذ علاج، وهالعلاج ينزل الدوره كل يوم او كل اسبوع.

وصار وقت المعاشره وقت ماساه ماقدر استحملها وعذاب وضيقه.وغير هذا عصبيه موت كله اصرخ عليه لدرجه اذا كنت نايمه ويتصل اكثر من مره وهو برع احطه سايلنت وعقب اذا قمت اقوله انت ما تفهم مارديت عليك وانا في البيت اكيد نايمه اقوله الكلام بس بصراخ، وللأسف رده لي اسمحيلي راح احاسب، مو ضعف منه لا لانه يحبني:33:وانا بعد.

مع اني ولله الحمد مو مقصره من ناحيه اني اكشخ لاني طبيعه احب المكياج واللبس، والاكل الحمدلله لي طلب اي شي يكون موجود عنده، وكل يوم بحركه الا طلعات الا شموع الا ورود، وطبعا في المناسبات ما ننسى بعض.

المعاشره صار واجب عندي اسويه علشانه ماحس بشي من ناحيته، تصدقون لو قلت لكم من سنه ما نام مع بعض الا 4 او 5 مرات بس بتقولون كذابه بس هاذا اللي صاير، وفوق هاذا مستحملني لانه يحبني وحبه لي يعذبني.

اسفه من كل قلبي اني طولت عليكم بس مابي اخرب حياتي بيدي، مابي هالسعاده اللي الله انعمها علي تضيع بسبب شي تافه.

سؤالي ممكن تكون هالحاله من مانع الحمل وتنظيم الهرمونات؟

والا من ظروف شغلي اني اكون تعبانه وراده متأخره؟

او من شي ثاني انا ما عرفه وانتوا تتوقعونه؟

افيدوني افادكم الله بكل خير ولكم مني الدعاء باذن الله.

مع خالص احترامي :44::44::44: