ساعدوني بكلمه او دعوة الله يجزاكم خير

السلام عليكم ورحمه الله وبركاته
كيفكم يابنات لكم وحشه مع اني دايم بالمنتدي العسل اشكي لكم همي واشوف همومكم وقلبنا علي بعض
صار لي أسبوعين شايله هم زي الجبل علي قلبي غالبكم يعرف اني للحين ماصرت ام وربي عالم أي قد اشتاق للامومه وقطعت غالب جمعات الاهل بسبب التلميحات السخيفه طبعا زوجي تعالج وسوا عمليه وهو بتحسن بس معند يسوي التحاليل ويروح يراجع وياخذ ادويه عشان تقوي عنده الحيوانات المنويه بس التحسن الحمدلله موجود الي صار من أسبوعين رحت اطمن علي نفسي لاني من سنين مو محلله وقالت لي الطبيبه عندي عجز بمبيض وماعندي الا واحد وهالشي مايمنع الحمل نهائيا ولله الحمد بس ماخبرت زوجي لاني عارفه طبعه يبي زله عشان يتهمني انه تأخير الحمل من طرفي
هذا غير اهله الله يهديهم عندهم ولدهم كل شي وبنت الناس طز فيها ولو عرفو انه فيني لو شي بسيط بيقولو له تزوج وهذا الشي صار قبل لا نحلل ونعرف انه عنده مشكله من اول 8 شهور زواج وامه تزن علي راسه واسمعها بالجوال تقول له اذا فيها شي تزوج لا وتقول اذا ماتقدر تفتح بيتين رجعها بيت أهلها ماتتخيلون شعوري حزتها دعيت ربي اموت ولا يكون فيني شي ويوم عرفو انه المشكله منه الكل صار معاي عسل لاني ضحيت بسنين معاه ولا طلعت قليل اصل وطلبت الطلاق مع اني كنت صغيره والحياه قدامي بس عمري مافكرت ابيعه
الحين انا خايفه من المستقبل انا عديت ال30 سنه وزوجي بال40 اذا ماتحرك الحين وتعالج تماما وحملت ممكن بعد كم سنه لا صار مامني فايده بكل سهوله يتزوج علي هالموضوع مسبب لي قلق كبير مع انه عشره سنين معاي ومستحيل يتركني او يقصر معاي بس واثقه انه بيتزوج بكل سهوله ويكسرني بعد ماصبرت سنين عليه وش اسوي حتي لو صار الي خايفه منه وتزوج مستحيل بجلس عنده مع اني ماعندي احد أعيش معاه اهلي ميتين ماغير اخواني وكل واحد لاهي ببيته وأهله وماشاء الله عوايلهم مره كبيره وين بيبلشون فيني
ياريت كل وحده تخش موضوعي تدعي لي الله يرزقني الذريه الصالحه انا املي بالله كبير وعارفه انه بينصفني بس دايم الأفكار السلبيه تجيني لا تقصرون معاي لو بكلمه حلوة ربي يجزاكم الجنه ويحقق كل امانيكم يااااااااااااااارب