ساعدوني بهالمشكله بيني وبين زوجي تكفون

بسم الله الرحمن الرحيم


حبيباتي في مشكله صارت معي واتمنى انكم تساعدوني بمشورتكم واراءكم لاني بصراحه ماني عارفه وش اسوي ..


الموضوع هو اني متزوجه وعندي ولد وعايشه مع زوجي عند اهله ..وعلاقتي مع زوجي ممتارزه وهو مايقصر معي بشي ويحبني وانا احبه بعد وتصير بعض المرات اختلافات لكن نحلها بيومها المهم انه قبل كم يوم صارت مشكله بين الاطفال وزوجي يومها كان في الغرفه كان تعبان من الانفلونزا وهو لما تجيه انفلونزا يتعب حيل المهم لما صارت المشكله بين ولدي وولد زوجة اخو زوجي صار كلام بيني وبين سلفتي وعصبت انا وطلعت فوق متنرفزه ومتضايقه ومعصبه من اللي صار قلت لزوجي وانا معصبه اللي صار وقال بسيطه هدي ومايصير الا كل خير , وانا لازلت متنرفزه من ردة فعل سلفتي وكان الساعه تقريبا 10 الصباح فقلت وانا زعلانه انا بروح لبيت اهلي ( بنفس المدينه ) قال خير ان شاالله قلت ابروح لبيت اهلي ابنام عند اهلي ماني جالسه بهالبيت ليوم ابي اغير جو .. قالي وهو ع الفراش تبين تروحين روحي بس ولدي خليه هنا مايروح معك انا رفضت قلت الا يروح معي قال خلاص روحي ماامنعك بس ارجعي نامي هنا , نوم برا البيت مافي .. رحت لبيت اهلي وكنت متضايقه .. وماكلمته لين جت الساعه 12 بالليل هو دق علي قال هاه وينك قلت بالبيت قال متى رجعتي قلت مارجعت انا بالبيت يعني بيت اهلي قال خلاص انا جايك .. جا ورجعت معه للبيت وماتكلمنا مع بعض من يومها ...

كان زعلان ومتغير وجهه ماادري وش صارله ,, المهم اليوم جاني وقالي ماتبين تقولين شي قلت لا .. قال انا ابي اقول لك .. قال ( انتي اكيد تسألين نفسك ليه انا زعلان , انا ماني زعلان انا مجروح وانتي اللي جرحتيني ,, انا مصدوم بك بالحيل , ماتوقعت انك تتصرفين بهالشكل , ماتشوفين الا نفسك وماتطالعين الا لمصلحتك ,, انتي طول عمرك تقولين لي تكفى لاتخليني ,, لاتتخلى عني واخر شي انتي اللي تخليني ؟؟ بعز حاجتي لك عطيتيني ظهرك ومشيتي ولاتدرين عني ..
بمجرد مشكله بسيطه تركتيني وانا محتاجك .. وانتي تدرين شكثر احتاجك خصوصا لامرضت .. لمجرد حدوث مشكله بسيطه رحتي وخليتيني عشان وشو عشان ترتاحين وتغيرين جو .. طيب مافكرتي بي انا ؟؟ مافكرتي كنت انا محتاجك والا لا ؟
لمجرد مشكله بسيطه تركتيني , شلون لو تصير مشكله اكبر ,, ياترى كنتي تفكرين فيني وقتها والا تفكرين بنفسك بس ؟
ياترى لو انا مادقيت عليك الساعه 12 كنتي اتصلتي علي والا اصلا ماطريت على بالك ؟
من الساعه 4 العصر وانا مرتفعه حرارتي وترقدت بالمستشفى للساعه 10 وانتي ماتدرين عني ليش ؟

المشكله هذي صدقيني كسرت شي كبير بقلبي .. كسرت ثقتي فيك .. وجرحت قلبي جرح كبير .. صدقيني يا,,,,, انا مصدوم الى هاللحظه انك من الممكن انك تتخلين عني بلحظه ... مرت علي هموم وافكار وهواجيس لدرجة اني كنت اقول لنفسي ياترى لو اموت .. كم يبيلك يوم عشان تنسيني والا كم يبيلك ساعه ؟
انا مااقولك ان علاقتنا ماراح ترجع مثل ماكانت .. لكن صدقيني ان اللي صار يبي لي وقت عشان انساه ... ))



هذا كلام زوجي .. لما خلص كلامه على طول طلع .. ورجع الساعه 11 وحط راسه ونام



ارجوكم شوروا علي شلون اصلح اللي صار وهل فعلا انا غلطانه والا لا ؟