ساعدوني زوجي انقلب علي بعد ثلاث سنوات عسل

السلام عليكم ورحمة الله اخواتي انا عشت في اسرة محافظة وامي انسانة ملتزمة وربتنا على الحشمة ومنعتنا من اللبس الملفت وصرت انا واخواتي نغار وننبهر من هالبنات اذا رحنا ملاهي او اسواق ونتمنى نلبس عباية كتف بس مستحيل .. المهم دارت السنين وخطبني شاب وسيم من اسرة متطورة وراقية وفرحت وقلت جاني الفرج من سجن الحشمة وفعلا تزوجت وطار بي زوجي وصار يتغزل بشكلي وجسمي اذا لبست عاري او بنطلون ويقول لي حرام هالجمال يتغطى وقال لي اذا مشيتي معاي بعباية الكتف افتخر فيك المهم دايما يتغزل ويتغنى بجمالي لدرجة اني صرت مغرورة على الناس من حولي واحسهم ماهم قدي ولا في سعادتي مخلوق .. وصارت زيارتي لبيت اهلي حرمان من الدلال ما اصدق خبر يجي زوجي علشان اروح لجنتي معاه .. سفريات وفنادق ومطاعم واسواق راقية شي ما قد جربته عند اهلي .. ومرت السنوات وبدأ زوجي يتغير علي دايما معصب وكلشي فيني ينتقده ويعايرني بأهلي ويقول ما طورك الا أنا وما سواك مودرن الا أنا والا كان مندفنه عند اهلك وكثرت سهراته وبعدين صار يمد يده علي ويدفني وما يبغاني أطالب بأي حق لي عنده وكل ما ناقشته قال هذا أنا عاجبك والا روحي لأهلك وريحيني وانا في نفسي اقول ناره ولا جنة اهلي .. وجاني شعور ان هذا جزاء من الله لي لاني بعد الزواج كلما زرت اهلي قامت امي تنصحني علشان لبسي وكلامي عن حياتي المتفلته في السفر وغيره من ترك الحجاب والمكياج وكنت استهتر واقول التقوى في القلب وفي طاعة زوجي ماهوب طاعتك لاني معميتني السعادة معاه عن الحلال والحرام المهم طولت عليكم دلوني يا بنات حواء انا ما شكيت الا لكم ما ابي احد يتشمت فيني انا الان تعيسة وابي حل الله يخليكم لا تهمشوني ادعو لي