ساعدوني شلون اوفق بين اهتمامي بأمي المريضه وزوجي وعيالي وشغلي ودراستي؟؟

السلام عليكم


اخواتي ارجوكم ساعدوني شلون اقدر اوفق بين اهتمامي بأمي المريضه اللي من سريرها لي الحمام ( الله يعزكم) واللي محتاجه اهتمام وقعده معاها ونفسيتها تعبانه عشان مرضها وصاديها مثل الوسواس انها تتوهم المرض اكثر يعني المستشفى يقولون فيها شي بسيط بس اهي دايم تشتكي وتكبر موضوع مرضها ( انا ما اقول انها مو مريضه بالعكس اهي مريضه والله يعينها ويشفيها ) بس نفسيتها تتعب اللي يهتم فيها ، وانا الحين اخذت اجازه فتره من الوقت بس لي متى راح اخذ اجازه؟؟؟ والمشكله صارلي اسبوعين ما رحت االجامعه ودايم اروح المستشفى واخذ اعذار طبيه للجامعه ، وعيالي لازم ادرسهم يوميا والبسهم واهتم فيهم غير زوجي انه دوامه شفتات يعني ما يقدر يشوف اليهال يوميا لانه يصادف اربع ايام في الاسبوع يروح الدوام من الساعه 3 العصر وما يرجع الا وقت صلاه الفجر ويبغي يرجع ينام ،، وخدامه ما اقدر اجيب ظروفي الماديه صعبه .........



المشلكه اللي مضايقتني اكثر ان اخواني الشباب متزوجين وساكنين بروحهم وما يجونها الا ساعه كل جم يوم او بالتلفون بس يا اخواتي المريض يحتاج اهتمام من اكثر من شخص يكون متفرغ له.....


وعندي اخت في الجامعه تروح الجامعه ثلاث ايام في الاسبوع الصبح بس اهي دايم تسهر لي الفجر وتنام لي العصر وتخلي امي بروحها تتصرف ( هذي وامي كانت بخير قبل تعبها ) والحين اختي نفس الشي ما تنام الا الفجر وتقولي انتي نايمه بالليل وانا اشوفها بس امي اساسا تكون نايمه بالليل وما تحتاج شي واهي تحتاج اهتمام في الصبح مو بالليل واختي مو راضيه حتى تنام معاها ويوم قلت لها ما اقدر اترك زوجي وعيالي انتي اخف منى ضحي شوي قامت تصيح وتقول انا توني صغيره على المسئوليه وشوفوو غيري ،، وامي بعد ما تقولها عدلي برنامج نومج او شي ، لا مخليتها على كيفها .... انا تعبت اخواتي ادري ان رضا امي بالدنيا واخدمها بعيوني بس مو عارفه شلون يعني انتوو حكمووو

اروح الدوام من الساعه 7 الى الساعه 3 العصر

ثلاث ايام في الاسبوع عندي جامعه ارجع اتغدى واغير ملابسي واروح الجامعه لما الساعه 8 ونص ارجع ادرس اليهال واعشيهم وانام من التعب..

يوم اللي ما عندي جامعه كنت اركز على دراسه عيالي واجلس معاهم ، بس الحين امي تتضايق من ازعاجهم ومو عارفه شنو اسوي ، يعني لازم اهتم فيها واشوف اليهال واصرخ عليهم ولا توصخون ولا تزعجون .........


احس اني تعبانه حيل نفسيا مو عارفه شنو الحل ساعدوني الله يخليكم وما ابغي اكون مقصره مع امي او عاقه فيها ــ والله اخواتي حتى الليل انام وانا خايفه حييييييل وكل شوي اقوم وما انام زين:(



ساعدوني وقولولي شاسوي وهل تضايقي من الوضع ومن تعبي يعتبر اثم والله يحاسبني عليه؟؟؟؟؟؟؟