ساعدوني طريقة طبخ الحاشي
ياطبخات ساعدوني الله يسعدكم ويحقق اللي تبغونه مع هالاذان الفجر اعطوني طريقة طبخ لحم الحاشي او القعود اسمه كذا عند بعض الناس والله قالي :arb:زوجي نشوف صحباتك الطبخات بيسعدونك والا لا على الاقل ارفعو الموضوع تكفون لا تفشلوني عند زوجي
2
9K
يلزم عليك تسجيل الدخول أولًا لكتابة تعليق.
الصفحة الأخيرة
1-لحمة حاشي ياليت تكون قويصره او ضليعات واذا مافيه لحمه يكون فيها عظم لان الهبر ماهو زين تصلحه كبسه
2-رز الشعلان.......ياليت وانت تكشن اللحمه تحطه بوسطه ماءعادي علشان يربص الرز
3- مكعب ماجي وليمون اسود وبصل وفص ثوم وفلفل حار
الطريقه:
نقطع البصل ونحطه بالقدر مع شوي مقدار فنجال زيت عافيه
نكشن البصل لمدة دقيقه او دقيقتن حتى يتغير لونه شوي
وبعدين نحط اللحمه مع الكشنه
نخلي اللحمه تتكشن شوي مع البصل على نار هاديه علشان مايحرق البصل
نحط مقدار كاس ماء على اللحمه ونسكر القدر ونخلي اللحمه تتكشن مع البصل زياده علشان يتداخل الطعم
ثم نضيف كمية الماء المطلوبه على حسب كمية الرز ونحط مكعب ماجي واحد حبةفلفل حاروحده فقط وحبتين ليمون اسود (حسب الذوق) اهم شي لا تكثر الماء خل الماء مقدار الرز علشان ماتشيل منه وترميه لانك كذا تضيع طعم حمسك الاول
نغلق قدر الكاتم جيدا ونخليه يطبخ على النار لين تصفر صفيرة القدر الكاتم بعد ماتدور نخليه 10 دقايق حسب كبر اللحمه وصغره يعني حسب عمر اللحمه اذا حاشي صغير مايطول الطبخ واذا حاشي كبير زيد الطبخ شوي لين تستوي اللحمه
وبعدين نفتح القدر ونذوق لحمتنا اذا مستويه 90% حلو لا تصير مستويه مره لاننا نبي نحط معاها الرز
اذا حسيت ان زيادة الطبخ عليها راح تنهري اللحمه طلعها وكبس على الرز لوحده
واذا حسيت ان اللحمه مايضره زيادة الطبخ مع الرز حط الرز
سر الطبخه:
اذا حطيت الرز بالقدر اهم شي انك تقدر تشوف حبة الرز لا يصير الماء كثير
وتحط فوقه زياده فلفل حار و فصين ثوم من غير تقطيع يعطو نكهه خفيفه وشكل خارجي جميل
والي يحب الثوم ياكلهم والا ارميهم
وبعدين نخليه يقلب على نار عاليه لمدة 3 الى خمس دقايق لين اشوف الرز صار كذا
ثمن اكتم القدر واقصر النارعليه واخليه ينشنش على نار هادئه لمدة عشر دقايق على بال ماجهز السفره والصحن والسلطه والخرابيط اذا معي خرابيط والا اضبط الشاهي المهم استغل الوقت مو اجلس من غير شغل
وبعدين افتح قدري واشوف كبستي
اجهز الصحن انكبها في الصحن وبالهناء والعافيه
فيه شي نسميه الحكاكه وهو الي يبقى في القدر وفيه ناس تحب الحكاكه مثل عبود يحب الحكاكه ماشاء الله عليه الي يجي بالتلفزيون بالدعايه نعطيه القدر يحك الحكاكه ويغسل القدر
وبالهناء والعافيه
م ن