ساعدوني فانا في امس الحاجه اليكم (تاخر الحمل و الوزن)

السلام عليكم و رحمه الله و بركاته
كيف حالكم ؟ ان شاء الله بخير

انا عندي مشكله او بالاحرى موضوع مضايقني و مو عارفه ايش الصح و ايش الخطا و طبعا هي موضوعين مرتبطين ببعض
بالله اللي تقراء موضوعي تعطيني رايها و نصيحه و الله محتاجه لها
الله يسعدكم و يرزقكم ما تتمنوا
اولا موضوع تاخر الحمل عندي
انا متزوجه لي سنه و 8 شهور و بديت في الكشف لما كملت 9 شهور من زواجي و اول شي قالته لي الدكتوره هرمون الحليب مرتفع اخذت دواء و لسى مداومه عليه عشان ما يرتفع ثاني
طبعا زوجي سوى التحليل قبل ما اسوي انا و الحمدلله طلع سليم
بعدين اكتشفت ان عندي ضعف تبويض و جربت التنشيط مرتين مع ابره تفجيريه و كانت تطلع نتيجه كويسه بس سبحان الله بدون حمل
بعدين جاتني التهابات و اكتشفت ان عندي قرحه في الرحم و تعالجت منها و لله الحمد و سويت اشعه الصبغه
و طلع فيه انسداد في الانابيب و فتحتهم بالصبغه بنفس الوقت الحمدلله و قالت لي انه الشهر ذا ان شاء الله حامل لانه ما فيه شي يمنعه
طبعا اخذت كلوميد و ابره تفجيريه و ما صار حمل و اتحطمت مره لانه كان عندي امل كبير و خاصه وقتها كنت كملت سنه و نص من زواجي و خايفه اكمل سنتين و انا ما حملت و سلفتي اللي اتزوجت معاي حملت و ولدت و عمر ولدها 4 شهور ما شاء الله و تعرفون الناس و كلامهم
و اخذت بعدها كمان كلوميد بس قبلها طلبت من الدكتوره اعيد تحليل الهرمونات عشان اتاكد انه كل شي طبيعي
سويت التحليل وطلع كل شي سليم على حسب كلام الدكتوره بس انا قريت بالنت انه اذا هرمون الاف اس اتش و هرمون الاف اتش انه لهم علاقه ببعض و يكشف اذا فيه تكيس ام لا
يعني اللي فهمته انه لازم واحد من هذولي الهرمونين يكون ضعف الثاني
المهم انا طلع عندي العكس و كنت شاكه انه يكون فيني تكيس لانه
fh 5 ,
Fsh7
فيه فرق بسيط فكلمت الدكتوره تقول في الورق مبين عندك فيه تكيس بسيط جدا لكن انا احكم من السونار و انا اكشف عليك كل شهر و مو مبين عندك تكيس لو فيه كان بان في السونار
اخذت كلوميد بدون ابره تفجيريه و كان حجم البويضه ممتازه بس ما صار حمل
قالت لي الدكتوره ارتاحي شهرين بعدين ارجعي لي و في هذا الوقت لا تسوي تمريخ و لا تاخذي اعشاب ابدا
دحين مر شهر و بعد شهر ارجع للدكتوره عشان نشوف الخطوه ثانيه ايش هيهه
طبعا انا من رمضان اللي فات و انا الحمدلله اقرا قران و استغفر كثير و اتصدقت و دعيت ربي كل ليله
في الشهرين اللي فاتوا حاولت قد ما اقدر اقرا سوره البقره يوميا مع صلاه الوتر و الدعاء و الاستغفار و قول ربي لا تذرني فردا و انت خير الوارثين و شرب ماء زمزم مقري عليه و اتدهن بزيت زيتون مقري عليه
طبعا انا ما قلت لاحد عن مشاكلي ابدا و هذا الموضوع ما يعرفه الا انا و زوجي
فيه مره ضعفت فيها و قلت لامي و زوجي اني حملت و طاح بعد موعد الدوره و طبعا ما قالوا لاحد
امي اتطمنت اني على الاقل حملت من قبل و كمان زوجي بس انا في عذاب نفسي كل يوم بسبب هذي الكذبه و تانيب الضمير و خايفه من عقاب ربي و اخاف ما يرزقني بالذريه لاني كذبت بهذا الشي
يا رب سامحني انا ابغى اعرف كيف اكفر عن ذنبي و كيف ربي يسامحني ؟
احيانا افكر اقول الحقيقه بس اتردد و ابطل
ابغى اعرف اذا فيه تحاليل ثانيه ممكن اسويها عشان اعرف اذا فيه سبب ثاني يمنع حملي

الموضوع الثاني او المشكله الثانيه هي
انا وزني ضعيف 40 ك و طولي 149 و نفسي ازيد وزني بس مو قادره و زوجي منعني من فواتح الشهيه بكل انواعها و حتى الفيتامينات بس اخذ حمض الفوليك و فيتامين هـ بوصفه من الدكتوره
قريت كثير من مواضيع زياده الوزن و عرفت انه فيه خلطات تساعد في زياده الوزن بس معظمها ممنوعه علي لانها تزيد هرمون الحليب فقريت عن بروتين يباع في gnc محل ارمال و اشربه 3 مرات في اليوم بعد كل وجبه و في الكوب الواحد حوالي 1000 سعره حراريه
و ممكن تزيد الوزن من 6 الي 8 كيلو في الشهر و انا ابغى ازيد على الاقل 5 ك
فانا بدون ما يدري زوجي ابغى اخذ حبوب فتح الشهيه لمده شهر مع البروتين عشان ازيد وزني في هذي الفتره خاصه اني ما راح اخذ كلوميد و لا غيره ابغى استغل الوقت ابغى اصير احلى ابغى اللبس يطلع علي حلو وابغى اكون واثقه من نفسي
ف ابغى اعرف هل اللي راح اسويه ياثر على الحمل مستقبلا و هل هو عادي اسوي هالشي بدون ما زوجي يدري يعني عادي او لا ؟

انا مره متخلبطه و اتمنى فهمتوني و ما لخبطكم معي
ابغى نصيحتكم و ارائكم
منتظرتكم على احر من الجمر الله يسعدكم



ملاااحظه للاداره : انا عندي مشكله في الرد يعني اقدر اكتب مواضيع بس ما اقدر ارد على أي موضوع في المنتدى
مو عارفه ايش المشكله بس اتمنى تحلوها


ارفعوا موضوعي لاني ما اقدر ارد عليها شكرا:heart: