عزيزتي نور الكون
وانا حاسة بكل معاناتك،بس ارد اقول لك أن الحلول الأفضل للمشاكل لاتكون الا بعد تفكير .الهدؤ ضروري .تحديد القرارات ونتائج كل قرار ضروري جدا.لاتنسي ان عندك بنت وتريدي لها حياة سعيدة.ادعي الله أن يرشدك الى الحل الأفضل .لاتحولي هزيمة زوجك الى انتصار كما تفعل بعض النساء.اشكي و بثي حزنك الى الله الرحيم المنصف المنقذ المرشد القريب من كل مظلوم.

الله يعينك اختي
اصبري واحتتسبي الاجر
فالله فرجه اقرب من الحاجب على العين

والله مدي ايش اقول حاسة فيك لدرجة دموعي مانشفت طول قرايتي لمشكلتك وللردود000 الله يصبرك ويعوضك بصبرك عليه طول هالسنين بكل خير والله يجبر خاطرك ويعطيك على قد نيتك وطيبتك واذا عليه الله بينتقملك منه لانه هو العدل ولايرضى بالظلم واذا صبرك نفذ وماانتي طايقه تكملين حياتك معاه اطلبي الطلاق وبنتك الله بيكون معها وماعليك غير الدعاء بان الله يذلل قلبه ويرضى يخلي بنتك معاك 00 واقولك ان زوجك فيه كثير منه بس مع اختلافات بسيطة وماينفع معهم التغير او الابداع المراة تتعب وتغير في شكلها وفي بيتها وتكون قمة وذوق في تعاملها ولكن الجدار يبقى جدار ولاعمره بيحس واللي له طبع ماراح يتغير بس الحسافة على العمر اللي يضيع وكله على امل بكره بيتغير وبيحس ولافي فايده 000
كل واحد فينا له طاقة معينه وله مشاعر وكرامه ليه يدوس عليها وليه نقول اصبري عليه اكثر من كذا وليه نتجاهل مشاعرها هي انسانة لها مشاعر ومن حقها تدور على الشي اللي يريحها خاصة اذا وصلت المسالة انه من كثر البكاء ماتقدر تنام وهذا من ابسط حقوقها 00 الطلاق اهون حل في حالتك والله ماشرع الطلاق الا فيه راحه اذا استحالت الحياة بين اثنين ومافي شي يجبرك تتحملي شخص لايحتمل لاهو ولا بيئته 000
اسأل الله العظيم ان يفرج همك وهم كل من تعاني من مشكلتك وربنا فوق كل شي وحسبي الله ونعم الوكيل 0

ريم قلت لزوجي عن كل اللي مضايقني وقال بكيفك للي تسوينه سويه انا ماراح اتغير ولا اتعالج وطريقة حياتي ما بتتغيرتبغين اهلك تبين تجلسين بكيفك ،وجلس ثلاثه ايام يفكر انا تركته ولا قلت بعدها شي بعدين جاني وقال خلاص خلينا نفتح صفحة جديده مع بعض وراح اتغير وفي العطلة بعرض نفسي على دكتورومالك الا يرضيك وانا احبك بس نفسيتي تعبانه والحمدلله احس هاليومين متغير مره وصار يجلس معي وراح يطلعني وانا الحمدلله الحين نفسيتي الحمدلله زينه
انا احس انه تغير عشان شافني جاده معه في الطلاق وصرت اذكره بالله وبظلمه ولأني قلت له احمد الله انه عطاك وحده بنت حلال ساكته كل هالسنين ولا قالت شي لو عندك غيري كان فظحتك عند الناس وطلعت كل عيبك وقلت له اذاكانك راح تستمر في كذا مافي حرمه راح تقبلك وتجلس معك
والحمدلله مادري عنه هو يسوي كذا ثم ينقلب الله يثبته لمره ويمكن هذا بفضل الله ثم بفضل دعائكم لي وانا بعطيه فرصه اخيره .
وشكرا لكم لكل من شاركني في مشكلتي واساني براي او بدعاء وشكر خاص لريم الريامي الله يوفقك ويسعدك ويعطيك من خير الدنيا والآخره الله يجعل كل كلمه واسيتني فيها في ميزان حسناتك لأني كنت بحاجه لحد يخفف عني والله يدري اني في ظيق شايله جميلك ياريم لأنك ياريم كنت انت مهتمه من موضعي وانت من اكثر من يرد علي مادري وشقول بس (من فرج عن مسلم كربه من كرب الدنيا فرج الله عنه كربه من كرب الآخره )
الله يجزاك خير ومن لقيتي وجهك ويبعد عنك الهم والظيق ويفتح لك ابواب الرزق في السما والارض ..................

حبيبتي ،، بصير معاج صريحة وبكلمج كأنج اختي والله يعلم اني مابي لج الا الفايدة ،،كلامي شوي طويل ،، الله يعينج على قرقتي ،، :42:


عزيزتي قريت مشكلتج ،، وحاولت أطلع إيجابيات في زوجج مالقيت ولا ايجابية ((الا انه يطلع بنته للاستراحة كل عطلة ))،، وحتى على قولتج المجتمع اللي اهناك ،، ولا ايجابية !! كل اللي ذكرتيه عيوب وسلبيات ،، والظاهر من كلامج انج تكرهين زوجج وتكرهين المكان اللي عايشة فيه و الناس الي هناك ،، ولا قدرتي تتأقلمين ،، من جذي كل كلامج كان عن عيوبهم ،، أنا حاسة انه في شي كبير ماقلتيه أو في أشياء طوفتيها ،، مو معقولة في ناس جذي ،،انتي يمكن ماتشوفين الا السلبيات ،، ماني متخيلة ناس جذي من غير مشاعر ،، كلهم !!!


يا قلبي ،، انتي يمكن كارهته و من جذي منتي قادرة تشوفين فيه ولا ايجابية وانا موقاعدة الومج بشي ترا ،، اذا انتي كارهته و متخذه قرارج خلاص اتكلي على الله وسوي اللي في بالج ،،انتي مو مجبورة تقعدين معاه دام كرهتيه ،، حتى لو كرهتيه من غير سبب ،، المحبة والكره شي من الله عاد انتي حاولتي طول هلسنين تتقبلينه و تحبينه وتحبين بيئته وتتأقلمين بس ماقدرتي ،، بس هم أرد وأقولج فكري عدل قبل لاتتخذين قرارج عشان لاتندمين حزتها ،،



بالنسبة لزوجج والمعاشرة ،، مرة بالشهر واهوا صغير مو طبيعي ! وسالفة انه يسبج فأتوقع لانه عارف انه مقصر فيحاول دايما يصغر منج ويقلل من قيمتج لنفسج لانه حاس انه مو قادر يشبع حاجاتج الجنسية،،وهلشي يأثر جدا على نفسية الرجل واعتزازه بنفسه ورجولته ،،


في كذا احتمال لحالته هذي وبكل الحالات زوجج محتاج اما علاج جسدي أو علاج نفسي !

1- يمكن يكون يكره الجنس لتعرضه في صغره للاغتصاب أو التحرش أو مر بتجربة قاسية

2- عنده مشاكل صحية و مستحي

3- يشبع رغباته بطريقة أخرى خارج المنزل ،، (( اعذريني لجرأتي ،، آسفة جدا ،، بس يهم انج تتأكدين من اللي بقوله لج ))احتمال تكون له علاقات أو متزوج أو اعذريني علي بقوله الحين يمكن مايحب الحريم! ،، انتي راقبي سلوكه وحاولي تشوفين هل هو سليم من هلناحية ولا لأ ،، لانه والله نسمع شكثر سوالف عن ناس متزوجين لسنين طويلة وشكلهم قمة الرجولة لا وعصبيين بعد وأصحاب مراكز مرموقة وعيال حمايل ومعروفين ،،وفي الاخير يطلع الزوج له ميول لنفس جنسه يعني شاذ ! والزواج مجرد ستار أمام الناس،، و الزوجة ماتدري الا بعد سنين ! لا وبالصدفة بعد تدري!

على العموم مهما كان نوع مرض زوجج(( جنسي ولا صحي ولا نفسي )) فدام انتي حاولتي معاه ولا قدرتي وكارهته فمو مجبورة تقعدين معاه ،، لج اذا اعترف لج بحالته ووافق على العلاج وشفتي انج قوية ،،أنج تساندينه بعلاجه وتاخذين الأجر والثواب ،، ولج انج تتركينه اذا شفتي انه هذا الأمر فوق استطاعتج وتحملج ،، محد يلومج ،،



بس حبيت أنبهج لشغلة ،،انتي يا قلبي مبين من ردودج انج مقتنعة انج بتكونين سعيدة اذا تطلقتي و رديتي بيت أهلج ،، بس لحظة بذكرج بشغلة قريتها في موضوع عنوانه الدورة الايجابية في هلقسم جزى الله كاتبها كل خير:



شرح باقي النقطة هذه موجود هنا


اللي بقوله لج ،، لاتعلقين سعادتج على الطلاق ! يمكن تكونين انتي وبنتج بحال أفضل في بيت زوجج ! تخيلي وضعج ووضع بنتج بعد وفاة والديك " بعد عمر طويل ان شاء الله " ،، منو بيصرف عليج وانتي ماعندج وظيفة ؟ وهل تضمنين بتلقين وظيفة ؟ ،، تضمنين اهتمام اخوانج فيج بهلزمن؟؟وبنتج الوصاية عندكم بالسعودية غير عنا في الكويت مو؟ يعني يمكن يكون لطليقج الحق ياخذ بنته تعيش عنده ،، تضمنين انها بتلقى قلب أحن من قلبج عليها هناك ؟ ،،

المشكلة مشكلتج انتي لا أنا ولا أي بنت في المنتدى ولا أي مخلوق يقدر يقرر عنج فلا تتسرعين ،،لانه مؤكد في أشياء ماتقدرين تكتبينها هني ويمكن لها تأثير على قرارج ،،بالتالي حكمي وحكمي البنات " فيهم الخير والبركة ونيتهم زينة"بس أكيد بيكون قاصر وناقص ،،

قعدي مع نفسج ودرسي وضعج عند زوجج ووضعج وانتي مطلقة واتكلي على الله بلي يلهمج اياه،،
الله يوفقج ويسهلج بلي فيه الخير ،، لج ولبنتج ،،واعذريني على الاطالة