قلب زوجي أنا...الله يرفع قدرك بالدنيا والاخر ه يارب

هلا يالغلا انا اول كنت احسب ان البقالة اوفر بس لا والله
شوفي مجلات العروض حق السوبر ماركت تبع بنده والدانوب والراية وكارفور(تاخذيها من نفس المركز او بالنت او برنامج على الايفون والايباد) تلقي فيها عروض حلوة خصوصا ان عندك اطفال ماشاء الله واكيد يكلفو في الشوكلاته والحلاوة والعصيرات
انا اكثر شي صرت اقضي من بنده فيها عروض حلوة وتوفر كثير خصوصا ان نفس منتجات بنده طيبة
خذي الاشياء اللي بالحجم الكبير وقارني بين اسعار الشركات
ومدام الحكاية فيها قروض وجمعيات سوي زيي اتفقي مع زوجك انكم تضغطو على نفسكم شويا عشان الميزانية يعني مو لازم كل يوم غدا ثقيل عادي مشيها خفايف3 او 4 ايام بالاسبوع
حاولي توفري بالكهرباء وبالجوالات واذا جوالاتكم فواتير خشي على موقع الشركة وشوفي اش في باقه ممكن توفر في الفاتورة
انا جوالي اتصالات وماكنت عاملة اشتراك في الباقات وكانت توصل ل600 ريال وزوجي فوق الالف لكن دخلنا على الموقع وجربنا في نعدل الباقات انا زبط معاي واتفاجأت ان الفاتورة الجديدة كانت 300 يعني النص بس زوجي مافرقت معاه ورجع غير على باقة ثانية وصارت تطلع 800
بس نصيحه مني مرررة بعدي عن البقالة ترى تاخذ فلوس من غير ماتحسي وخصوصا على الحساب احيانا يزودو عليكي اشياء ماتدري عنها انا كنت اكتب كل حاجة اخذها على الحساب ونهاية الشهر لازم تلقي في شي غلط

ان شاء الله اكون افدتك :)

الله يطرح البركه بفلوسكم حبيبتي

برأيي اتفقي مع زوجك على إعادة ترتيب لحياتكم والأستغناء عن الكماليات والاكتفاء بالضروريات فقط
يعني 1100 تدفعونها لشركة الأتصالات ليش؟؟؟حولوا جولاتكم شحن واشحنيها بداية كل شهر ميه لك وميه لزوجك وشوفي بتوفرين 900 ريال ...بتقولين قليله اقولك حاولي ولو لمدة شهر ودخلي خدمة جود بالبيت بكذا 300 فقط للأتصالات شهريا
..................................
بالنسبة لمقاضي البيت حددي احتياجاتك كله قبل نزول الراتب ب4-5 ايام الاحتياجات اللي ماتستغني عنها ابد وبكميات تكفيك للشهر واحد فقط حلووووو...واشتري معها غرض يكفيك لاكثر من شهرين مثلا الشهر ذا اشتري كيس ارز كبير والشهر القادم اشتري صابون كبير وكلوركس 30 لتر واللي بعده كرتونين من المعلبات الاكثر استهلاك وهكذا صدقيني بيظل بيتك مليان وبدون ضغوط
الخضار كل اسبوع يجيب زوجك الضروري فقط من محلات الخضار
اللحم ممكن كل شهرين او 3 ذبيحة للثلاجه
السمك كل اسبوع كيلوين بتكفيكم طبختين
طبعا انا احكيلك تجربه انا مريت بهااا انا وزوجي فقط كنا نصرف تقريبا 1200-1300 ريال شهريا وبيتنا دايم فاضيبعدها قررت اني امسك ميزانية الأكل وكنت كل مرة اشوف قد ايش قل الأستهلاك واول مرة صرفنا 800 الشهر اللي بعد 700 وهكذا حتى استقرينا الحين مابين 400-500 ريال شهريا فقط
طبعا مقاضي الحلا والاشياء اللي مو لازمه اشتريها فقط إذابيجيني احد او اشتهيتها مرة بالشهر او ابعد 3 اشهر ادخلها بالميزانيه واشريهااا وتكفيني لفترة طويله 3 اشهر تقريبا
والله ان البركه حلت علينا الحمدلله وصار حتى لما يجينا ضيوف ماننزنق زي قبل بالعكس نكرمهم وننبسط باننا ماقصرنا عليهم وكل شي من سعه الحمد لله
.....................................
بالنسبه لاطفالك حددي كم كرتون حفايظ تستهلكي بالشهر وكم علبة حليب واشتريها مع مقاضي البيت باحجام عائليه راح توفري كثير
................................
برضه الاكل من برى خليه مرة بالاسبوع فقط...وولدك ابو 5 سنوات حددي له مثلا 100 ريال بالشهر مصروف حلوى وايسكريم وكذا لما يطلبك فلوس اعطيه من مصروفه ريالين وثلاثه فقط باليوم
..............................
الملابس خليها كل 3 اشهر مرة وقللي التسوق وحددي اشيائك قبل الخروج من البيت
..................................................
طبعا لو استخدمتي طريقة المظاريف بالتوزيع للميزانيه راح توفري كثيييييييييييييييييييييير ابحثي عنها بالنت
اهم شي ان يكون زوجك متعاون معك
والله يعينك وييسر امورك

غلاتي.....حبي M......عاشقة وليفي
أسأل الله العظيم إنه يسعدكم ويفرج همكم ويسهل أموركم ويجمعني بكم في جنات النعيم والله إني إستفدت منكم كثير ومن نصايح البنات وأبشركم بدأت بتطبيق نصايحكم زوجي قلل الحد الائتماني لجواله واليوم بيحط لنا في التلفون باقه جود اللي 100 ريال
وإن شاء الله ربي يسهلها هذا الشهر ونستغني عن البقاله..وبسوي طريقة الاظرف في ترتيب الميزانيه