ساعدوني قبل مايضيع ابني

السلام عليكم ورحمه الله وبركاته


ولدي الوحيد عمره ٥ سنوات وشهرين
مشكلته يحب المقالب وشوي يحب الاذيه
احاول دايما اطبّق اليه اساليب التربيه الحديثه ولكن كوني مطلقه وعايشه في بيت اهلي احس الوضع هذا مخرب علي كثير ،
ما احب اضربه ابدا الا للضروره واحب اطبق عليه العقاب الي مايخلي نفسيته تتآذى .. دايما دايما اتفرج طرق واساليب التربيه الحديثه عشان ابغا ولدي يطلع انسان واثق من نفسه وسعيد !!
لكن كوني في بيت اهلي الي يضخمون اخطاءه ويوقفون لي وله ع الوحده وكل تصرفاته منتقده بينهم ولاكأنه طفل صغير تخليني اعصب من جد واضربه بقسوووه واليوم كسرت له لعبته المفضله وضربته بالعلاقه لأنه قاعد يمزح مع امي ويآذي فيها وهي مو فايقه له !!
بكي ولدي بكاء مرير وقلبي يبكي معه بس بداخلي قاعده اقول خليه عشان يتعلم يحترم جدته ولعاد يمزح مع الاكبر منه .
طبعا ولا شي ينفع تمر نص ساعه يعيد ولدي نفس الاغلاط ويرجع يآذي ويمزح ويمقلب في اهلي ( مثل انه يسحب المخده فجأه ،، يدغدغ اختي برجلها ،، يفجعها بأنه يصرخ في اذنها بقوه ويهرب ) تصرفات من ذي القبيل !!
واهلي ماياخذوها انه صغير ويلعب ياخذوها انه قليل ادب ومو متربي وردود فعلهم ع حركاته ذي انهم ياخذوها بجديه واوقات يقاطعوه بالساعات وهو يكون ناسي اش سوا !!!
وطبعا كل القراءات والدراسات الي اتابعها تتبخر بالهوا لما اعصب منه واعصب منهم لانهم مو قادرين يتحملون طفل ولا يبغوا يحتووه ومو راضين يفهمو انه يحاول يجذب انتباههم له بطريقته !بس الي يفهموه انه قليل ادب وسامج مثل مايتكرر ف اذنه كل يوم كذا الين اقتنع فعلا انه هو كذا لانه ينتعت ولدي منهم بابشع الصفات ع اغلاط الطفوله الي يسويها
اوقات اطنش اهلي واتركه يتخارج معهم اقول بعقلي خليه يندق منهم الين يتعلم يوخر عنهم

بس وقتها يقولو عني تشوف ولدها يقل ادبه وماتسوي شي
رغم اني من وراهم وربي اتكلم له انه عيب وهذول اهل مامتك وعيب تمزح معاهم او تمسك اغراضهم !
بس مايريحهم الا ضربه
والله العظيم بالعلاقه ضربته كم مره قدامهم والله حتى مايقولو لي حرام عليكي دليل ع رضاهم ع تصرفي لما اعنفه
احس اني ما استاهل حضانته لاني ام سيئه بتعاملي معه
وقاعده افكر اطلع اسكن بره اربي ولدي براحتي بدون دخلاء ولا ناس يخربو عليا بس ما املك الماده الكافيه
واوقات اقول انتظر الرجال الي خطبني لان فيه رجال خطبني وموافق ع وجود ولدي وسألو عنه اهلي ومدحو اخلاقه
كيف اتصرف والله ولدي يقول لي لما اكبر تحبوني انتم تكرهوني عشاني صغير
واوقات يسألني ليش جدتي وخالتي مايحبوني وحتى انا عنده قناعه اني امه بس ما احبه يقول لي انتي تكرهيني لانك تضربيني كثير


قلبي يبكي ياجماعه شاورو علي بحل 😢