ساعدوني قبل ما أتندم

بسم الله الرحمن الرحيم / عزيزاتي وأخواتي في عالم حواء .حبيت تشاركوني مشكلتي لأني ما أقدر أثق إلا فيكم وأنا عارفة إنكم إن شاء الله ما تتخلون عني وراح تفيدوني بأفكاركم . ما أبي أطول عليكم أنا متزوجة من 20 سنة ولي بنتان طبعا عندي مشاكل كثيرة مع زوجي بس لأني أحبه أتغاطى وأصبر لأني أعرف إنه قلبه نظيف وطيب بس مشكلته العصبية اللي ما لها حل وعنده مزاج خاص ومو أحد يقدر يصاحبه يعني إذا لقى بواحد عيب واحد ومو على مزاجه يتركه فورا يحسب إنه يقدر يغير الناس مثل ما هو يبي أو يمشيهم على هواه . وطبعا ككل الرجال تقريبا ما يحب يطلع هو الغلطان جدام أي أحد . مشكلتي تفاقمت من شهر تقريبا والسبب إنه تعرفنا على عائلة وكنا مستانسين معاهم لأبعد الحدود مع إنه كان يصير في مشاكل بسيطة بس كانت تنحل بسرعة لأنهم ما يبون يخسرونا لأنا تعلقنا ببعض بشكل مو طبيعي وصرنا أكثر من الأهل وهالصداقة دامت لمدة تقريبا 5 شهور مو أكثر وبسرعة انتهت طبعا بسبب إنهم ما مشوا على مزاج زوجي . المهم أنا تعبت نفسيا بعد ما انفصلنا لأن بصراحة أنا وحيدة لا أهل من طرفي ولا من طرف زوجي لأن مثل ما قلت من قبل صعب الواحد يتماشى معاه لمزاجه العصبي وصعب الواحد يفهمه لأنه مزاجي حيل . المهم حسيت بوحدة وما قدرت أقعد معاه أو أسولف مثل أول أو أضحك وعلشان شذي كنت أنام قبله وكان هو يزعل لدرجة حس إني قاعدة أحسسه إنه هو الغلطان معاهم وهم أحسن منه . بس ما كان هذا قصدي . كنت أتجنبه وأتحاشاه علشان لا نتهاوش وبنفس الوقت كان هو عنده وايد مشاكل مع أخوانه بسبب الورث بعد ما أبوهم توفي . ومشاكل من الدوام ومن كل اتجاه يعني كنا في حالة ضيق شديدة . بعد ما طاف على هالوضع أسبوع تقريبا قالي أخوي أن زوجي زعلان لأني ما أقعد معاه ومن هالكلام . المهم حاولت أغير من نفسي وفعلا قعدت مثل أول وشنه ماكو شي بس ثاني يوم واهني صارت المشكلة طلعنا علشان نغير جو وكان هو لسه شايل بقلبه مني بس أنا ما اهتميت وعاملته عادي شني ما أعرف شي . ورحنا المطعم وكان معانا صديقه واحنا هناك شاف كم حركة من شباب زعجته وكلمهم يعني شي ورا شي بعدين اختار سلط وشافها بايته شان يكلم المدير ويتهاوش معاه وبعدين قاعد ياكل بيتزا شان يشوفها مو مستوية وعصب زيادة وأخدت القطعة اللي أكل منها علشان أذوقها وقرمت من الطرف ورجعتها شان يطلب نفس المدير وتهاوش معاه مرة ثانية شان يشوف زوجي القطعة مأكول منها وتدايق ليش أقرم من نفس القطعة وشان يسبني جدام صديقه وصوته كان عالي وانحرجت وحتى صديقه انحرج وما بطلت حلجي بأي كلمة والمسبات كانت على كيف كيفكم . بعد ما راح صديقه قلت لزوجي بكل هدوء ما كان في داعي لهالمسبات مو عيب أنا زوجتك تسبني جدام صديقك . المهم شان يزعل وسبني أكثر وقالي راح أخليج بالبيت وأطلع مع بناتي وبس . واحنا بالسيارة تأسفتله بس ما تقبل الأسف وعصب زيادة ويسرع بالسيارة لحتى ما وصلنا البيت . واهني يه يبي يضربني شان أعصب وهذا مو من طبعي بس كل شي له حد وخصوصا بدون سبب وجيه يخليه يضربني وشان أصارخ عليه وقلتله إذا ما تبيني طلقني وفعلا طلبت أخوي وفهمته الموضوع واللي قاعد يصير وحاول أخوي يراضيه بس ما كو فايدة والحين كل واحد قاعد بصوب أنا بغرفة وهو بغرفة ما نشوف بعض ولا ناكل مع بعض ويفضل الأنفصال لأنه يقول إنه تحملني وايد وهالكلمة اللي قلتها كبيرة بالنسبة له . وإذا أخوي أو أخوه يكلمونه يفتحلهم مواضيع من 20 سنة يعني اسطوانة كل يوم يقولها وبأي مشكلة تصير بيني وبينه لازم يذكر السوالف اللي صارت من 20 سنة ويظل يحاسبني عليها . هو الحين ما يبي صلح على ما يبدو وقال في ثلاث حلول أولا : إما الطلاق ويعطيني كل حقوقي ثانيا : إما أعيش ببيت بروحي مع البنات بدون طلاق يعني كل واحد يعيش بصوب ثالثا : إما نظل على هالحالة نعيش بنفس البيت وكل واحد بصوب لا أنا لي شغل فيه ولا هو له شغل فيني . اللي أبيه منكم إنكم تساعدوني والله إني خايفة من أي قرار آخذه وخايفة أتندم وخايفة على البنات وياريت لو محامية تساعدني بهالموضوع . أنا الحين صارلي أسبوعين على هالحالة وكل يوم أسمع منه كلام ما يسر قاعد يتكلم عني كلام ما له داعي وأكاذيب وقاعد يطلعني أنا الغلطانة وهذا غير المسبات وإنه يكره البنات فيني . شنو رايكم أنا بانتظاركم يا أخواتي لا تتخلون عني وراح أدعيلكم بظهر الغيب ***** الله .