السلام عليكم ورحمة الله
أول شيئ عتبانة على إختي صاحبة الموضوع .. كتبي أول مره واشتدت الحملات عليج واختفيتي .. أغلق الموضوع .. رجعتي فتحتي السالفة وشوي إلاّ اختفيتي وبعدها الحملات عليج .. وينج فيه؟؟
إختي الكريمة سابيه .. إذا بتستشيرين أحد في موضوع حساس مثل هذا ما ينفع تسألين فيه الحريم ... لأن معظم النساء بيتعاملن معاج من منطلق العاطفة والغيرة .. بتحط الوحدة نفسها مكان الزوجة الأولى وبتفكر لو أقول لها تزوجيه يمكن بكرة زوجي يتزوج علي
يا إختي الكريمة .. موضوع مثل هذا .. يصلى فيه صلاة الاستخارة ويتشاور فيه الأهل وأي سؤال عندج تسألين فيه شخص محايد .. يستمد نصحه لج من شرع الله .. يعطيج حل مستمد من النهج الاسلامي .. سئلي أحد المشايخ وسئلي من اللي تعرفينهم من تثقين في دينه وخوفه من الله ولا تحطين نفسج أبداً في موقف يسمح لأحد إن يغلط عليج شو ما كانت أعذاره .. دامج ما قاعدة تعصين الله في طلب الحلال فهذا هو المهم .. إن علاقة تطلع للنور عن طريق الزواج أحسن مليون مرة من إنها تكون في الظلام .. رضى الناس غاية لا تدرك ورضاهم مب مهم ... دوري رضى الله .. خلي غايتج في الحياة هي مرضاته .. وعلى هالاساس لو زواجج من هالشخص في معصية لله إنسي الموضوع وإلا فتوكلي على بركة الله ةزوجي
-----------
كلمة لأخي الفاضل وقفو شوي
أخوي الكريم لما وحدة من الأخوات تنفعل وتغلط على إختنا صاحبة الموضوع يكون لها عذر وهو غيرتها وخوفها إن يجيها يوم تشوف فيه زواج زوجها من ثانية .. ولأن المرأة خلقها الله عاطفية .. العاطفة تغلب عندها على العقل .. لما قال المصطفى إن النساء ناقصات عقل ودين ما كان في هل كلام إساءة للمرأة بل على العكس كان فيه مراعاة لها ولتركيبتها اللي الله خلقها عليها .. ناقصات عقل ودين مب بس لأن عاطفتها غلبة ولها أيام ما تصلي وتصوم ولكن أيضاً لأن المرأة عند إنفعالها تغلب عندها العاطفة على العقل وهالشيئ يؤدي إلى عدم توازنها وبالتالي يؤثر في أحكامها وردود أفعالها بطريقة ممكن إنها تخليها تخرج عن النهج الشرعي في تلك اللحظة وتتصرف تصرف بعيد عن المنطق .. ومن هني على على الرجل إن يفهم هالجانب فيها ويعرف إن هذي تركيبتها فيتحملها ويستوصي فيها خيراً ويعمل على إصلاح هذا الاختلال في توازنها عند حصوله برجاحة عقله وحسن تصرفه
أما إنت أخي الكريم إعذرني مب قادرة ألقى لك عذر .. كان ردك للأخت جارح .. من حقك تنصحها دام إنها طلبت النصح من الكل .. بس بأسلوب لين .. الدين النصيحة والدين معاملة .. وإنك تقول لمرأة الرجل خسران لو ارتبط فيج إهانة كبيرة لها وتجريح ممكن المرأة تتقبله من مرأة مثلها لكن مب من رجل وغريب عنها
كان ممكن تقول لها إختي لا تتزوجينه فكري في الحياة كيف بتكون وتعطيها رايك كرجل .. وبعدين أخوي إنك ما تتزوج مرأة تشتغل في مكان فيه رجال فهذا حق لك محد ينكره لكن لا تستخدم كلامك كإهانة
الاختلاط ما راح أتكلم عنه .. لأن أضراره واضحة وعلماء الدين ما قصروا وتكلموا فيه .. ولكن ظروف كل إنسان تختلف .. وطبيعة شغله تختلف وحتى مجتمعه يختلف .. في الامارات كل الدوائر تقريباً فيها موظفين وموظفات .. لكن التعامل بين الطرفين محدود جداً في إطار العمل وما في مجال واحد ينفرد بوحدة في مكان مغلق أو إنهم يتغزلون في بعض.. ما فيه ضحك وسوالف ومكالمات .. لأن بنت الإمارات تربت على دين وعادات خلتها تعرف حدودها إلا اللي هي في غفلة نسأل الله لمثلها الهداية وهن قلة إن شاء الله ومثلها موجودة في كل مكان ومب محتاجة لوظيفة علشان تسوي فيه اللي تبيه .. اللي تبي تسوي شيئ بتسويه وين ما كانت ويرجع الموضوع للخوف من الله والوعي الديني وتربية الأهل
ولما موظف يفكر في زميلته ففي الغالب تكون هذي الزميلة محترمة عارفه حدودها في التعامل مع الغير إنسانة على دين وخلق لأن الرجل اللي على خلق مستحيل يرضى بللي هي أقل منه وما راح يأمنها على بيته وعياله
فمالك حق إنك تتهجم على الإخت وإنت ما تعرف عنها غير مجرد معلومات هي ذكرتها ما تخليك تقدر تحكم عليها
أتمنى إنك تتقبل مداخلتي بصدر رحب
-------
ليش لما رجل يفكر يتزوج على زوجته أو يتعرف على وحدة يكون لوم النساء على البنت .. الرجل وين مسؤولياته.. البنت تتحمل جزء من اللوم لكن مب كل اللوم وفي كثير من الحالات هي الضحية .. أكثر اللي صرنا نسمعه ضحاياه من البنات .. الرجل يبي يرضي غروره ويشبع غرائزه يوهم البنت بالحب .. بنت ممكن تعاني من الحرمان عند أهلها .. بنت صغيرة سن يخدع براءتها ويمثل دور فارس أحلامها . وللعلم كثير من هالرجال لو متزوج ما يقول للضحية عن زواجه أو يقول لها بعد ما يكون قدر يسلب عقلها وقلبها وكفاية اللي نسمعه من قصص النت والتشات واللي أكثر ضحاياه من البنات صغيرات السن والمراهقات
الرجل شو أفضل له إنه يعف نفسه بالحلال وإذا حس بالرغبة في الزواج إنه يتزوج أو إنه يبقى على زوجة وحدة ويسوي الحرام .. كم متزوج يكلم بنات في التيلفون .. كم متزوج يدخل تشات يدور عن مغامرات الحب .. كم متزوج يمارس الحرام في سفراته .. كم من متزوج ممكن يمارس العادة السرية إذا مب دايماً ممكن في أوقات وهالشيئ أقوله لأني قريت مشكلة مطروحة في المنتدى هني ولأني قريت مثل هذي القصة في أكثر من منتدى .. صحيح في جانب نفسي ومسألة تعود ولكم في حالات منها سببها إن الزوج وحدة ما تكفيه ومب قادر يتزوج على زوجته ويخاف الله من الزنا وما يبي يقربه
قصص كثيرة وبلاوي بالهبل شو الأحسن في مثل هذي الحلات إن يتزوج بالحلال أو يخاف زعل زوجته أو رفضها ويلعب من وراها بالحرام .. شو الأهم يرضي الله أو يرضي زوجته؟؟؟
إذا الزوج ما يبي يتزوج على زوجته وعاف نفسه ومب رايح للحرام فهذا شيئ طيب والحمد لله ولكن هل كل الرجال مثل بعض ولهم نفس الحاجات والقدرات والقناعات وحبهم لزوجاتهم بنفس القوة بحيث يحس بالاكتفاء مع زوجة وحدة
لا يكون تفكيرنا قاصر .. كل زواج وله ظروفه .. فمن نحنا علشان نقول لأحد تزوج أو لا تتزوج ؟؟ ليش مستهينين بالدين وبعذاب الله صايرين نحلل ونحرم ونقول للعالم تزوجوا ولا تتزوجون .. اللي يتزوج يبي يعف نفسه له أجر من رب العباد .. إذا ما بنزوج بناتنا لمتزوجين بكيفنا لكن لا نحكم على بنات الناس من منظورنا ولا نفكر نقطع رزق أحد .. وقبل كل شيئ لا نقول كلمة ممكن تكون علينا لما نقابل المولى عز وجل
انخلقنا لعبادة الله .. فهل حنا معطين هالعبادة حقها .. كم وحدة وواحد همهم يرضون الله .. كان هدفهم من الزواج ارضاء الله بطلب العفة وانشاء أسرة صالحة تأمر بالمعروف وتنهى عن المنكر ... كم منا همهم يكونون عيالهم من حفظة القرآن .. عارفين القرآن وفاهمينه .. كم منا حافظين للحديث وقاريين السيرة وقصص الصحابة .. كم منا يفكر في كل أموره من منطلق النهج الإسلامي ... من منا صابر في حياته راضي بالمكتوب له .. كم منا يحط راسه على الفراش وهو يفكر إن هذي ممكن تكون آخر ليلة في حياتي ويحاسب نفسه كيف بيلقى رب العباد .. كم واحد يتذكر الموت كل يوم ويعتبر منه .. كم منا هدفه هو الفردوس الأعلى وصحبة النبي له ولأهله وخطط كيف ممكن يوصل لهالهدف وحاول بكل طاقته وجهده إنه يبلغه
كم وحدة من اللي شاركوا في الموضوع تقوم الليل ولو ركعتين وتصحي زوجها وإذا ما صحى تحاول فيه بالحسنى واللين وتتحايل عليه هو والعيال يصلون معاها لو مرة بالأسبوع ... كم من العوايل يقعدون كل أسبوع ساعة يقروون القرآن ويتدارسونه مع بعض ؟؟ كم وحدة همها صلاح الأمة وإن عيالها يكونون من اللي يرفعون راية الإسلام .. كم وحدة منا الأسواق والطلعات من آخر إهتماماتها .. ما نست إن عليها إنها تتعدل لزوجها وترفه عنه وعن العيال لكن كل شيئ تسويه مب بنية إنه ما يتزوج عليها لكن خوف من الله وحب في كسب رضاه عن طريق رضى الزوج ومن باب حسن التبعل .. كم وحدة ما ترضى زوجها ينام زعلان عليها لأنها تطبق في هالشيئ كلام النبي صلى الله عليه وسلم
في أمور أهم بوايد من اللي حنا فيه هني .. صحيح صلاح الأمة يبدا بصلاح الاسرة .. وصلاح الأسرة يكون بالقرب من الله مب بالزواج من أكثر من وحدة .. كم بيت عمران وهو مهدوم كم شخص عايش بجسمه ميت بقلبه .. بيت فيه زوج وزوجة وعيال لكنهم نسوا سب وجودهم في الكون .. وأجساد تاكل وتشرب لكن وين طاعة الله اللي في القلوب .. قلوب همها الدنيا وكيف تستأثر فيها
وفي الأخير كل شيئ يحصل هو بمشيئة الواحد الأحد عز وجل
قال تعالى: " قُلْ لَا أَمْلِكُ لِنَفْسِي نَفْعًا وَلَا ضَرًّا إِلَّا مَا شَاءَ اللَّهُ وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ إِنْ أَنَا إِلَّا نَذِيرٌ وَبَشِيرٌ لِقَوْمٍ يُؤْمِنُونَ "الأعراف - 188
وقال عز وجل: " وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يُرِدْكَ بِخَيْرٍ فَلَا رَادَّ لِفَضْلِهِ يُصِيبُ بِهِ مَنْ يَشَاءُ مِنْ عِبَادِهِ وَهُوَ الْغَفُورُ الرَّحِيمُ - قُلْ يَا أَيُّهَا النَّاسُ قَدْ جَاءَكُمُ الْحَقُّ مِنْ رَبِّكُمْ فَمَنِ اهْتَدَى فَإِنَّمَا يَهْتَدِي لِنَفْسِهِ وَمَنْ ضَلَّ فَإِنَّمَا يَضِلُّ عَلَيْهَا وَمَا أَنَا عَلَيْكُمْ " يونس - 107 - 108
سبحانك اللهم وبحمدك أشهد ألا إله إلا أنت أستغفرك وأتوب إليك
الصفحة الأخيرة
بس ملاحظة للمشرفات الغالياااات..
احنا حريم..ولا نتحمل مثل هالنقاش...
وصاحبة الموضوع..ثاني مرة تكرره وتنساة.....
وما ترد..وتوضح نضرتها وتتناقش مع الأخوات..
ولاأستفدنا غير ذنوب..في لحظات غضب..صرنا نكفر ونحرم..
وعلى عيني وراسي لو ترد...بس طالما ناسيتة صاحبتة..
فلا تستآثمون في الآخوات..
والقرار لكم..بس حبيت ابري ذمتي.