ساعدوني ما أبغي ادخل غريبه بيتي

السلام عليكم 

كتبت الموضوع وبالغلط أنمسح 
فرجاء حسوا فيني وردوا علي ولو بدعوة 

موضوعي طويل لكن بحاول اختصر 
وبنفس الوقت المشكله بالنسبه لي مهمه 
فرجاء لا تستهزئون فيني يمكن تمرون بنفس الموقف. أنا متزوجة من 2012 ومن أول زواجي 
خذت شغاله بيت أهلي معاي 
هي كانت عندنا فبيت أهلي من 8 سنوات 
فلبينيه مش كبيره كثير فالعمر الله يشهد طول هالسنوات لا سرقت ولا غلطت بشيء يمكن أكبر أخطائها تكسر بالغلط شغله أو تحرق الملابس وهي تكوي عن غير قصد وكانت تعتذر بندم 
مع أنها من قريه مش من المدينه 

وكملت عندي سنتين وكانت تمشي علي مبدأ 
لا أري لا أسمع لا أتكلم تخلص شغلها ولما زوجي يوصل تنسحب لغرفتها تكوي وتخيط 

أنا فهالفتره حملت ببنتي وولدت 
كانت فالمستشفي معاي تهتم فيني ولما رحت بيت أمي ولا حد من أهلي عبرني الشغاله قامت فيني لأن أمي موظفه 
ولما رجعت بيتي كانت تعلمني كيف أحمم بنتي وااكلها وكل شيء لدرجه بنتي لما كبرت حبتها 
لأنها حنونه عليها 

الحين هي تقول بتروح واذا بترجع بعد سنه أو سنتين لأنه هي فبلدها غنيه وعندها مخبز ومشروع يعني ما كذبت وقالت لي أبوي مات وحادث نفس أفلام الخدم 

استقدمت غيرها حرمه كبيره من نفس الجنسيه ومن قريه عاساس تعلمها الطبخ لأنه شغالتي أنا معلمتنها كل شيء فالطبخ واكلها مضبوط 

طلعت الجديده خبيثه وتستهبل وترمي الأكل 
طولت بالي أشوفها تعاند وعينها بكل شيء 
ما ارتحت رجعتها المكتب خصوصا أني دافعه 9000 درهم مب شويه استقدمت غيرها أندونيسيه لقيت أنواع السحر بالشنطه 
لما فتشتها وزوجي ما يحب السيرلأنكيات ولا الأثيوبيات من يومها حلفت ما ادخل شغاله دائمه لبيتي تسكن معاي وتبصبص علي زوجي ؤتمد أيدها علي بنتي 

وزوجي وافق يوفر لي الأجهزة إلي تسهل شغل البيت لي ؤبيتي صغير غرفتين وصاله ومجلس و3 حمامات الله يكرمكم 

لكن ألمشكله في أهلي 
أمي وأبوي معارضين بشده 
يقولون كيف ماراح تقدرين وزوجج راح تهملينه ولازم حد يساعدج بالأطفال 
ياناس ما أقدر اخلي أي وحده تمسك عيالي 
واخاف لما زوجي الصبح بالدوام ادخل حد من الشارع علينا البيت المنطقه إلي أنا ساكنه فيها 
مطله علي شارع عام فيه محلات وعمال وداخل المنطقه هدوء والجيران عندهم سواقين وإيد 
ما عندي ثقه خصوصا أني ما أعرف الجديده كيف نفسيتها القديمه جربتها فكل الحالات حتي لما تعصب كانت تنسحب غرفتها ما تتكلم ولا تقل أدبها والقصص إلي أسمعها تشيت شعر الرأس 

أنصحوني شو أسوي هل أنا غلطانه 
أهلي يقولون هاتي أي وحده وخليها تمسك بنتج 
كيف أي وحده تمسك طفله 

أصلا محد يأكل ويهتم بضمير غير الأم 
حتي تنظيف صاحبه البيت دقيق أكثر من الخدم 

أنا قلت أول فتره النفاس بتعامل مع المؤقتات إلي عن طريق شركه يومين بالأسبوع 
والغسيل والكوي إذا الشركه ما توفر هالخدمه 
بودي الملابس ألمغسله والطبخ أقدر أتعامل ويا الحريم إلي فالبيوت أسوي اشتراك للغدا والعشا خفايف 

شو رأيكم أبغي تجاربكم منو إلي ما عندها شغاله 
شجعوني لأنه أهلي قمة التحطيم 
وزوجي موافق ويشجعني بس مافي حد حواليني ما عنده شغاله 

بانتظار ردودكم واتمني ما تخجلوني وتردون علي 
يأرب كل وحده ترد ربي يفرج همها ويرزقها بكل اللي تتمناه عاجلا غير أجل