ساعدوني ياطبخات عن الكيك

خبرتي في الكيك و الحلويات اكثر راح اجوابج عن الكيك و ان شاء الله البنات يجاوبونج عن الزر و البهارات
لين بتسوين كيك الاحسن انج اطلعين البيض و السوائل من الثلاجه قبل عشان يصير حرارته نفس درجه حراره المطبخ و تنخلين الطحين عشان يدشه الهوا و مايصير فيه رطوبه و هاي الشي يخلي الكيكه منتفخه و الاحسن انج تخفقين البيض و الفانيلا اول شي لين ينفش و يدشه الهوا و بكون هاي اساس عشان تنتفخ الكيكه في الفرن و بعدين تضيفين الزيت و السوائل الباقي و بعدين الطحين و الاحسن تضيفين المواد الرافعه ألي اهيه البيكنغ باودر او بيكوبونات الصودا اخر شي و لاتبالغين في الخلط عشان المواد الرافعه ما تفقد مفعولها و عشان ما يطلع الهوا ألي في البيض و الطحين و شي المهم انج لين تخلطين خلطي بمسار واحد يعني لا تخلطين مره يسار و مره يمين لانه هالشي يطلع الهوا من خليط الكيك ، سخني الفرن 10 دقايق قبل ما تدخلين قالب الكيك فيه عشان يكون الفرن حار و متوزع فيه الحراره و بسبب انه الكيكه تنضج من الاطراف و الوسط ماينضج هاي دليل انه حرارة الفرن وايد عاليه او انج تطلعين الكيكه قبل ما تنضج عدل و الحراره و المدة المثاليه لخبز الكيك 180 درجه و لمده 40-45 دقيقة و حسب حجم القالب و لازم ما تفتحين باب الفرن بعد ماتدخلين الكيك فيه الأ بعد 20 دقيقه تقريبا لانه إذا فتحتي الباب بدش هوا بارد و تتغير حراره الفرن و هاي يأثر على الكيكه و يخليها تفش و تهبط بعد ما تطلعيها من الفرن و بعد في سبب ثاني يخلي الكيك يهبط و بصير بسكوت مثل ماقلتي انج اطلعين الكيك من الفرن قبل ما يكتمل نضجه الاحسن تختبري نضج الكيك بعود اسنان و إذا دخلتي العود و طلع نظيف يعني الكيكه نضجت .

ادري طولت عليج

بس اتمنى اني افدتج من خبرتي الطويل لانه كنت اواجه نفس المشاكل مع الكيك و مع الممارسه تعلمت الاخطاء و ان شاء الله يتضبط معاج الكيكه و بتصير منتفخه و منقوشه و حلوة :)

تسلميــــــــــــــــــــــــــــن ياعســـــــــــــــــــل الله يعطيك العافيه والصحه ويحقق جميع امنياتك
مشكوووووووووووووووووووووووووووووووووووووره

الاخت رايه الورديه ما قصرت علشان الكيك
اما الرز يا الغاليه مافي اسهل منه
شوفي انا بديك طريقه بس تقريبا تكفي من خمسه لسته اشخاص
وان شاء الله تضبط معك
1 اول شي طلعي الدجاج ونظفيه وعني انا اشيل الجلد والرقبه والذيل وما تبقى من الكبد تلاقيه لازق بالاضلاع
وبعدين افركه بشوية ملح وخل علشان تروخ زفرت الدجاج وخليه على جنب
2 تقطعي بصلة متوسطه تقطيع ناعم وحطيها على جنب وبعد حبة طماطم متوسه قطعيها وحطيها على جنب
3 جهزي بهاراتك اللي راح تحطيها نصف ملعقه كمون حب وخمس حبات فلفل اسود وحبتين قرنفل ومثلها هيل وعود قرفه وليمون اسود 2 ونصف ملعقه كزبره ناشفه ورقتين غار
وحطي نصف ملعقه بهار مشكل مطحون ونصف ملعقه كركم
بكذ تكوني جهزتي كل شي تقريبا

ابدي بطبخ حطي القدر عل النار يسخن شوي وحطي فيه الزيت تقريبا اربع ملاعق وبعدين حطي البصل والبهرات الحب اللي مو مطحونه وقلبيها شوي وروحي اشطفي الدجاج من الملح والخل وحطيه عى البصل وقلبيه الين تشوفي ان الدجاج اتحمر شوي
ولاتطولي ممكن يحترق بعدين حطي البهار المطحون والكركم وقلبيه الين تشوفي البهرات المطحونه صارت تلزق اسفل القدر

وهذا هو سر النكهه بعدها على طول حطي الطماطم واذا تبي حطي ملعقة معجون طماطم وقلبيها لحد ماتذبل الطماطم بعدها حطي عليه مويه مغليه يادوب تغطي الدجاج شوي يعني تكون المويه اعلى من الدجاج ب3سانتي وحطي حبتين فلفل حار بدون تقطيع تعطي نكهه وغطيه وخليه على نار خفيفه وبعد عشر دقايق حطي الملح ورجعي غطيه وخليه ربع ساعه كمان خلال الوقت هذا غسلي اربع اكواب رز ونقعيه بمويه حاره مدة ربع ساعه بعدين صفيه وحطيه على المرق وهنا لازم يكون المرق مرتفع عن الرز ب2 الى 3 سانتي وخففي النار كثير وغطيه وبعد عشر دقايق شيكي عليه واذا نضج قفلي النار ورجعي الغطى على القدر واتركيه 5 الى 10 دقايق بعدين حركيه بشوكه وحطيه وزينيه زي ماتبين وبالعافيه عليكم


ملاحظه

في البعض يحط ماجي بس انا ما حطها بالمره لانها كلها مواد مسرطنه


وان شاء الله تظبط معك

نسيت اقولك اذا تبين تحمري الدجاج اتركي الجلد عليه بس لازم تنظفيه زي ماقلتلك
ولم ينظج الدجاج طلعيه وخذي شويه من المرق وذوبي فيه ملعقة صغيره ملون الطعام باليمون اللي يجي بودره
ورشي الدجاج بيها وحطيه في الفرن

ما قصروا الاخوات بس حبيت اقول لك فيه نوعية رز مررره روعه يضبط معك وما يتلصق لانه احيانا يكون السبب نوع الارز
هذا النوع ياستي اسمه(بوندي)غسليه وخليه حوالي10 دقائق منقع ثم صفيه من الماء واتركيه لحد ما ينضج الدجاج
جربيه وادعيلي