ساعدوني يا حوائيات في هالمشكلة

السلام عليكم ورحمة الله وبركاته
خواتي أنا عندي مشكلة ومب عارفة كيف أحلها
الله يسلمكم أهلي عندهم شغالة الله يستر عليها تتكلم مع رياييل بالتلفون والقهر إنها ما تشتغل طول اليوم على التلفون وشغالة أهلي الثانية هي اللي تشتغل وساكتة، المهم أختي تنام في بيت أهلي وعندها شغالة بعد وهالشغالة كلمت شغالتي وقالت لها إن شغالة أهلي تتكلم مع سواق ريلي وضايفين بعض على الفيس بوك غربلات عدوهم ( ما أعرف كيف اشتركت فيه )
ويخبرها عن كل شئ ، وأنا ميتة قهر منها ما أقدر أقول لأبوي لأن بروحه مريض فيه السكري وما أقدر أقول لأمي لأنها من النوع اللي يسوي سالفة كبيرة وعادي توصل السالفة للشرطة، ونفس الوقت ما أقدر أقول لريلي عن هالشي لأن راح يسفر السواق وأنا الصراحة مب مرتاحة له لأن من فترة جريبة كان مأخذ لنا من الهند أجار ( مخلل ) وشغالتي شمته وقالت مليان بيرة وأنا كلمت ريلي وقال يمكن السواق ما كان يعرف
مشكلة ريلي وايد يثق في الناس ويصدق كلامهم ، الحين إذا قلت له راح تستوي مشكلة بين شغالة أهلي وشغالة أختي ويمكن السالفة تكبر أكثر وأكثر وشغالة أختي فقيرة وعلى نياتها ودائما تحذرنا منها . قلت بصبر لحد ما تخلص مدتها لأن باقي لها 4 شهور وبتسافر بس بخصوص السواق ما أعرف شو أسوي، شوروا علي خواتي وإن شاء الله ألقى الحل عندكم.