ساعدوووني ارجوكم

اول شي السلام عليكم ورحمة الله وبركاته
طبعا هذي اول مشاركه لي بالمنتدى الغالي على قلبي مع اني صار لي فتره مشتركه بس لما قرأت المشاركات اللي هنا بالقسم اتشجعت اطرح مشكلتي وياليت القى عندكم الحل
راح ادخل بالسالفه على طول واسفه لو طولت عليكم
اول شي انا عمري 29 سنه وعشت طفوله مستقره نوعا ما اهي مستقره لوجود امي في حياتنا الله يطول بعمرها بس ابوي الله يسامحه كان قاسي مره علينا وعلى امي ومستحيل واحد منا يقدر يطلب منه اي طلب مباشرة كنا اذا بغينا شي نطلب من امي وهي كانت تحاول توفره لنا من ابوي او توفره هي لنا كنت انا واخوي اللي اصغر مني بسنه وحده نفرح اذا غاب ابوي عن البيت نحس بشوي من الراحه واذ وصل ابوي البيت خلاص صار حتى الكلام ممنوع
المهم كبرت وكبروا اخواني شوي بس للاسف انعدمت ثقتنا في انفسنا خصوصا انا واخوي هذا ولما صار عمري 15 سنه تقدم لي ولد عمي وعمره 18 سنه وافقت طبعا ابي اطلع من البيت وكنت لسا بالصف الثاني متوسط بس ابي اعيش حياتي شوي واتخلص من سيطرة ابوي
وتهيأ لي اني احبه وعشت معاه 10 سنوات مابين حب وبرود ساعات احس انه يحبني واحبه وساعات لا
طبعا رزقني الله بولدين وبنت اكبرهم البنت 9سنوات الحين وولد 8سنوات والاخير 5سنوات
بس طبعا الى هنا بتقولون وين المشكله
المشكله انه قبل 4 سنوات وبدون مقدمات تزوج علي وحده ثانيه وبعد زواجه بستة شهور طلقني من دون حتى مايقول لي اي كلمه بس راح المحكمه وطلق وخبر اخوي بس
طبعا طلعت من البيت واخذت عيالي ورجعت لبيت اهلي وتخيلوا مدى الجرح اللي حسيته منه ورجعتي للبيت اللي هربت منه اساسا لا والمشكله صار معاي 3 عيال بعد
عشت حياتي انسانه محطمه من الداخل كل همي عيالي بس بس باقي في نفسي في فراغ وفاقده الحنان لابعد حد
ابوي صار احسن شوي وامي ياقلبي عليها كانت هي الوحيده اللي حاسه فيني
مرت الايام وزاد ضغط العيال على اهلي وحسيت اني حمل ثقيل عليهم وابوهم مايدفع لهم مصروف ابد ويقعد بالشهرين مايسال عنهم
بعدها بسنه تقدم لي واحد متزوج حرمتين وعنده عيال وجاهل مو دارس ابد وكنت عارفه انه مو الانسان اللي ممكن يعوضني الحنان اللي فقدته في حياتي ومع كذا وافقت عليه وبحوالي شهر تقريبا تم زواجي منه وابو عيالي اخذهم مني وحسيت بالموت البطيء ومن ليلة زواجي منه كرهته وماعدت قادره اناظره حتى
وبعد اسبوعين بس صرت ابكي وابيه يطلقني ورجعت لبيت ابوي مره ثانيه وتخيلوا حجم المشكله وانا راجعه بعد اسبوعين من زواجي وصار كل همي ابي اشوف عيالي وارجع اعيش معاهم بعيد عن هالدنيا كلها وطبعا ابوي الله يسامحه ماقصر في هالفتره في القسوه اول شي هاوشني ومابقى كلمه شينه في هالدنيا الا قالها لي وحلف ان عيالي مايدخلون بيته ثاني مره وصار حتى السلام مايرده علي
بتقولون انتي غلطتي لما وافقتي على شخص ماتبينه بقولكم ادري اني غلطانه بس كل اللي صار قسمه ونصيب وانا ورب الكعبه ندمانه من كل قلبي بس اش اسوي هذا اللي الله كاتبه لي
المهم دخلت في مرحلة اكتئاب وصرت لا اكل ولا اشرب وكله ابكي وابوي مصمم ارجع لزوجي وانا رافضه في هالفتره حاولت انتحر لما وصلت لدرجه نفسيه سيئه مره هنا تدخل اخوي اللي اصغر مني ووقف في وجه ابوي لاول مره في حياته وقال ماراح ترجع غصب عنها الا على موتي وتدخلت امي وخالي واقتنع ابوي اخيرا وسكت عن موضوع رجعتي له بس لازال يعاملني بقسوه وبعد 5 شهور طلقني زوجي بعدما رجعنا له المهر وحاول اخوي في ابوي وجاب عيالي لي بس عشت ايام كلها هم وتعب ابوهم تخلى عنهم بالمصروف وكل شي والعيال يبون مدارس ومصاريف طبعا نسيت اقولكم اني معلمه وحاولت استاجر بيت لي ولعيالي لوحدنا بس طبعا كان هالشي في ظل العادات والتقاليد ممنوع منعا باتا ولايمكن الحديث فيه
المهم بعد طلاقي بشهر بس تقدم لي شخص عن طريق وحده من زميلاتي مو من نفس قبيلتي وطبعا انا خفت ارفض وتضيع فرصتي في الخلاص من هالجحيم اللي عايشه فيه تخيلوا يابنات انه لو واحد من عيالي قفل الباب بقوه او سوا اي شي باليت ان ابوي يقعد يلعني ويلعنه في وجهي ويقول ارسليهم لابوهم الله ياخذ عمرك انتي واياهم انا لو بكتب عن معاملة ابوي لعيالي ابي مكان ثاني فاضي لحاله
المهم انا خفت بعد اوافق واندم مثل المره اللي فاتت وتتكرر الماساة
وصليت استخاره اكثر من مره والحمدلله هداني ربي للموافقه وفعلا تزوجت هالشخص اللي لقيت فيه كل اللي كنت ادور عليه من حب وتفاهم وحنااااان عوضني عن غياب عيالي
انا الحين لي سنه مع هالشخص وحامل وعلى وشك اولد والحمد لله زوجي طيب الى ابعد حد وبنتي عايشه معاي وتدرس بثالث ابتدائي والولدين مع ابوهم
المشكله يابنات اني احس بتانيب الضمير بكل وقت اني وافقت وتركت عيالي ومو حاسه بطعم حياتي ابد صحيح انا احب زوجي وهو يحبني ويداري خاطري في كل شي ومايقصر علي باي شي بس انا مو حاسه بطعم السعاده كل همي ابي السنين تمر ويكبرون اولادي واشوفهم مرتاحين بحياتهم
حاولت اروح عيادات نفسيه وتراجعت
ارجوكم اللي عنده حل لايبخل علي فيه انا من جد تعبت وتعبت بقوه لدرجة اني صرت اكره هالحياة بس كل ماتذكر زوجي وعيالي ارجع واتفاءل شوي بس ارد واتعب ثاني مره
صدقوني يابنات حتى في نومي ماصرت ارتاح مدري اش اسوي