ساعدوووووووووني .....أبنتي

الأمومة والطفل

السلام عليكم حبايبي
ادخل بالموضوع على طول
بنتي عمرها 10 سنوات بالصف الرابع قبلها بنت وبعدها ولد ..هي مرحة واجتماعيه ومجتهدة وحلوة
لكن عليها احياناً سلوك غريب مو دايماً بعض الايام ... احكي لكم بعض المواقف

اذا طلبت شي وما جبته لها تقعد تحن وتقول لو الي طلبته اختي فلانه او اخوي فلان كان جبتوه له على طول
.
.
مثلا لو كنا نتكلم انا واخواتها بموضوع تسمع بعض الكلام وماتفهم تطلب اني اعيده لها لما اعيده تقول لا مو كذا كنتم تتكلمون قوليلي بالتفصيل لا تختصرين
.
.
وايضاً لو راحت عند أحد ورجعت تقعد تقول لي انا قلت لهم كذا وكذا عادي والا كلامي فيه شيْ غلط ( يعني ما تأخذ راحتها بالكلام تخاف انها تقول كلام غلط )
.
.
هي مجتهدة بدروسها واذا صار المغرب تقعد تذاكر وانا ادرسها بعدين اذا جاء وقت النوم تقعد تقول انا احس انه فيه شي ما ذاكرته وتقعد تتذكر وتلاقي مافيه شي لكن تقول احس انه فيه شي ما ذاكرته
.
.
لما اقولها ادعي لجدك بالجنه تجيني وتقولي وهي خايفه وتقول لما دعيت قلت يارب دخل جدي النار
ولا لما اقول الله يخلي فلان تقول ماما انا قلت بقلبي الله لا يخليه وعلى طول استغفر
.
.
اخرها صارت تقولي صرت احس ينزل مني قطرات بول ذاك اليوم انقهرت منها وقلت هاتي ملابسك الداخليه وشفتها ما فيها شي وقعدت اخاصمها واقول لها اتركي الشكك وزعلت
.
.
وعلى فكره هي تحبني كثير ولكن متعبتني كثير وديماً ازعل منها واحياناً ابكي منها ولما تشوفني زعلت تقعد تبكي وتطلب السماح وتقول ما اعودها اخرتها اليوم طلبت مني شي تبغى تكتبه بمنتدى اطفال وقلت لها وش رايك تكتبين كذا احسن لان الكلام الي تبغى تكتبه مو مرتب قالت لا انا ابغى اكتب موضوع كذا اختي ما عمرك قلتي لها شي لما تكتب وانا تقعدين تقولين لي مهب زين خلاص مانب كاتبه قلت لها خلاص ما تبغين بكيفك وبعدين أنا قلت لها حلفت اني ما اقول الكلام الي كنت ابغاك تكتبينه .قالت خلاص قوليلي وانا اصريت اقولها حلفت قامت تصرخ لما زهقت قعدت ابكي منها لاني تعبت ورحت حذفت المنتدى من الكمبيوتر وسكرت الباب علي وقعدت ابكي بكاء شديد من غير شعور وهي من وراء الباب تبكي وتقول خلاص سامحيني لحد ما جاء ابوها وكلمها وصالح بيننا
الله يعافيكم ويخلي لكم عيالكم وبناتكم
قلولي على طريقة اتعامل معها
لاتقولون اوديها طبيب نفسي لاني احس مو المشكله كبيره يحتاج اطباء
وعلى فكره انا احبها كثير واحضنها دايماً لانها تحب الحضن والضم ودايم اتكلم معها واسلوف معها ومع أخوانها وعمري ما قعدت اقارن بينها وبين اخوانها المشكله هي الي تقارن
الله يفرج همكم ويصلح ذرياتكم
9
666

يلزم عليك تسجيل الدخول أولًا لكتابة تعليق.

تسجيل دخول

الفراشة الأليفة
13 ةحدة مرت ولا وحدة ردت
سبيعيه ذوق
سبيعيه ذوق
ماعندي خبره سامحيني

بس اكيد المجربات مايقصرون معك

انا حسيت ان بنتك حساسه مره و دقيقه بكل شي لدرجة الوسواس

بس اعتقد علاجها الحب والهدوء لانه كل ماعصبتي و زعلتي

منها بتتعقد المشكله حسسيها انها كبيره وخذي رايها

ومرات امشي عليه بدون ماتحسسينها بالنقص

حبيبة امها شكلها تبي تلفت نظرك وتتميز

بين اخوانها ويمكن تكون تغار

لانها الوسطى واسمع ان الطفل الاوسط يتخيل انه مهضوم

حقه ويكون غيور ممن حوله الله يفرج همك

ويطمن قلبك عليها ياربي ياكريم
اضاءات
اضاءات
فعلا اتوقع نفس الشي تحاول انها تلفت انتباهك باي شكل كان لان عندها مشكله مع نفسها انها اقل من غيره لازم تفهميها انها مميزه وانها بكذا التصرفات تكون شخص غير مميزلان يبد و ان بنتك تحاول ان تختفط الانظاروهي شخص متتطلع بزياده وهذا الشي اللي خلاه حساسه جدا
قلب صادق
قلب صادق
مشكلة بنتك حساسه جدا مثل بنتي الي عمرها تسع سنوات على طول تزعل وهي أكثر أخوانها حنان لي هي الكبيره ولازلت أعاني من حساسيتها الزايده بس نصحتني أخصائيه نفسيه أنه ماأعصب عليها لأن العصبيه الزايده عليها والنقد المباشر لها جعل شخصيتها مهزوزه ومالها ثقه في نفسها نهائيا ونصحتني بكثرة مدحها وتوكيلها مهام في المنزل وتشجيعها باالمدح وأن لأركز على الجانب السلبي في تصرفتها وتطنيشه والبحث عن الإيجابيات في تصرفاته والحرص على تدعيم الجانب الإيجابي مثلا تغاظي عن كونها تنسى تذكر دروسها وتشجعيها على أجتهادها في الدراسه وهكذا .
الشـ أثيرـــرق
الله يعينك حبيبتي
والله اني اعاني من نفس معاناتك عندي بنت ذابحتني في كل شيء تقارن حتى بينها وبيني
وعصبيه وتتاثر بالي حولها وهي طيوبه وعندها مواهب وشاطره بدراستها بس مادري كيف
اتعامل معاها الله يهديها ..
حبيبتي اذا تبين موقع استشارات ارسله لك على الخاص ما عندي مانع