ساكنة مع اهل زوجي وطالع لي بدال القرن عشرة

كيفكم يالغاليات
مشكلتي اني عايشة مع اهل زوجي من ست سنوات وعندي بنت وولد والان حامل
تزوجت من ولد عمي وعمري 18 وعلى طول حملت
طبعا بتقرون العنوان وبتقولون اطلعي في بيت وارتاحي
المشكلة ان زوجي المصون اكبر اخوانه وهو المسؤول عنهم من كبيرهم الى صغيرهم
لانهم بالعربي الفصيح ناس غريبة
يعني ام زوجي الله يهديها ولدها اللي في اولى متوسط يسرق عادي ،
ياخذ مفتاح سيارة ابوه ويحرك السيارة عادي ولو يطلع من العصر وما يجي الا الساعة 11 في الليل عادي مايذاكر ولا يحترم وقليل ادب :angry2: وياويل اللي يقول لعيالها شي
هذا غير خواته ومصايبهم
و عشان كذا مستحيل انه يطلع من البيت و يترك العائلة المصونة بدون رقابة

مشكلتي الحين اني وحده ما احب الازعاج ولا المشاكل ولا" قلة الادب"
المصيبة ان بنتي 4سنوات صارت كربون منهم لسانها طوييييييل وعنيييييييييدة وماتستحي وكله تتناقر مع بنتهم 10سنوات
ان جاء احد فشلتني :06:
واذا جيت اقول لبنتي عيب كلتني عمتي انتي تعقدين البنت كل حياتك هواش ونكد وتقعد تحلف اني ما اقولها شي
وولدي ابو سنه وشهرين صارو يعطونه كورسات في " التفال والكش والرجم والكلام والوسخ" اسفه من جد

يعني عيشة تقصر العمر
بيت وش كبره ما فيه شغالة واذا قالوا عيالها نقدم قالت مب لازم الله يطول عمر ذي :angry2:
من جد قلة حيا
تبيني اطبخ غدا وعشا يوم واليوم الثاني اغسل 3 حمامات و اكنس غرفتين وامسح سيراميك دورين وبعدين امسك بنتها في القراءة والكتابة والقران ومهمله غرفتي وزوجي وعيالي
وصبرت 4 سنوات لين طق فيني عرق صرت بس اطبخ يوم واليوم الثاني لنفسي وبس
اللي كان مسكتني اني صغيرة وهادية و اهلي مربيني على الادب واني ما ارد على الاكبر مني

صرت اهتم بنفسي وبس
طبعا هذا مو عاجب العمة كل يوم ماده البوز في وجهي :16:
وان جت مرت ولدها ام المشاكل و اللسان الطويل قالت ياهلا ويا مرحبا بالغالية ووووووووو
وانا مطنشتني كني مب موجودة
ومرت ولدها بيت وشغالة وسفريات وطلعات
واذا جت حتى الشغالة ما تجيبها لعانة تبيني انا اللي اغسل

الحين انا عندي فترة امتحانات لاني ادرس انتساب عن بعد ونفسيتي مررررة زفت ولدي ما خلاني اذاكر ويالله يالله الحق
قلت لزوجي بجيب لي شغالة شهر عشان تنتبه له وانا اذاكر
وبخليها تقوم الساعة 8 الصبح تنظف الدور اللي تحت تخليه مثل الوردة عشان عمتي ترتاح"وانا قصدي افتك من نظراتها "
الشغالة لها 3 ايام فقط والقاها رابطة راسها
قلت انتي متى قمتي
قالت ماما كل يوم كلام قوم قبل صلاة الفجر وكوي مريول بنات وثوب اولاد
بعدين غسلي مواعين مطبخ و وووووو
انا هنا وقف عقلي
الحين انا قايلة لهم الشغالة تنظف البيت الساعة 8 فقط مالها دخل في غسيل ملابس واحوشه وكوي ويعاندون
حتى النوم تقول ما في نوم كويس كل شوي بيبي طق باب وانحاش
من جد ناس ما تستحي والله ثم والله ما تستحي
علموني شلون اتعامل معهم
البنات مثل امهم مستهترات وما تعلموا الادب
اخوهم ما قصر يهاوش ويفهم و يعلم لاكن لا حياة لمن تنادي
الحين وش الحل كيف اربيهم