سالفتي بالمستشفى :-(

صباح الخير ع الكل
طبعا هالموضوع مجرد فضفضه باللي صار معي امس الأثنين يعني اللي بتقول انتي رخمه وانتي خوافه وانتي بزر وورعه وداده توفر ع نفسها ترى سمعتها من امي وخواتي هع
البارح م قدرت انام زين قلق وتفكير بهالسالفه مع انها م تسوى

انا راسي متعبني من رمضان تقريبا الله يكتب اجري ولو اني م اصبر دايم وايأس وم خليت مكان م رحت له حريم يعالجون وعلاجات ومشايخ صح خف كثير عن اول الحمد لله بس للحين اعاني وكل شي تعب مع تعبي جسمي ونومي واكلي ونفسيتي وحتى علاقاتي مع اللي حولي كرهت ناس قريبين لي ولا ادري شالسبب
المهم مالكم بالطويله طبعا قررت الدكتوره تصلح لي اشعة رنين مغناطيسي وشهر كامل عشان يجي هالموعد وانتظر طول هالشهر وانا بين وسوسه وتفكير وحماس عشان اشوف وش فيه راسي وارتاح المهم الاشعه يوم الأثنين وانا م بحياتي جربتها و لاعندي اي معلومه عنها والغريب اني م بحثت عنها بالنت مع اني من مرضت صرت بس افر ع المنتديات واقرأ بهالأمراض من الخوف
رحت يوم شفتها وقلت بنسدح الا تجيب لي لبس والبسه وقالت ترى برد مره وجابت لي سدادات اذن قلت ليش؟ قالت عشان صوت قوي المهم يوم انسدحت وانا خايفه وارجف الا وتسكر ع راسي زي الشبك وانا يجيني امر الله واقعد ابكي وارجف واحس بكتمه واخوي يحاول فيني واقوم وارجع انسدح وع هالحال بكاء وصياح وخوف تشجعت شوي قلت بس بدخل اجرب دقيقه وطلعوني قالوا طيب يوم دخلت وشغلوها وصوتها عالي حييييييييييييييل يخوف وانا يجيني بلاي قلت بس اكيد انها خربت يوم شفت الفلبيني يتكلم بمايك قلت الحين خربت وبتنفجر فيني واقعد اهز رجولي طلعوني طلعوني انا م دريت ان هذا صوتها :'(

بعد هالمعاناه تتوقعون دخلت ؟













للأسف 45 دقيقه وهم يحاولون فيني ولا دخلت من الخوف :'(
والله ان عندي فوبيا من الأماكن الضيقه ياناس محد مستوعب هالمشكله اخوي يقول انتن يالحريم مجورات >مجورات يعني عيارات تتدلعون
تحسفت قد شعر راسي ع اني فوتت هالفرصه علي وشهر كامل وانا انتظر هالموعد عشان ارتاح نفسيا وربي اني مقهوره ولمت نفسي كثير لهالدرجه انا ضعيفه صح اني اخاف من الأماكن الضيقه بس م توقعت ابد اني م ادخلها توقعت عندي جراءه كافيه وتعبي بيجبرني ادخلها بس للأسف

عاد يوم رجعت البيت اخوي يضحك فيني ويقول اخفسي يالرخمه >هع
واختي تقول يالداده يالرخمه وش خليتي للبزارين وبكره تجين تتشكين آه ياراسي واحس زي الهزه فيه و و و و
وامي تقول كل العالم تسويها وهي مسويتها مرتين و بنت فلانه سوتها و و و و
وانا بس اتحطم وكرهت كل شي قسم بالله محتاجتها مره عشان اشوف وش فيه هالراس بس قدر ربي اني م ادخل الأشعه موعدي السبت مع الدكتوره ولا ادري وش اقول لها وانا م عندي اشعه ولا شي قسم مستحيه منها بتقول عمرك 27 وتخافين :'(

ابي بس تدعون لي ان الله يشفيني ويسهل وامري وهل فيه احد مثلي خافت تدخلها ولا بس انا الرخمه هع


فمآن الكريم :-$