سالفتي بالمستشفى مع الكيراتين....

السلام عليكم ورحمة الله وبركاته....
كيفكم حبيبات قلبي؟؟؟؟يارب تكونو بصحه وعافيه...

هذا اللي بكتبه لكم اقسم بالله هو اللي صار بالحرف معاي...

كنت رايحه للمستشفى النسائي بالاحساء اسوي تنظيف بشره....ولما كنت انتظر دوري جات وحده لابسه بالطو ابيض وشعرها لحد كتفها ...كان مصبوغ وتعبان ومتقصف بالحيل ....وكانت تتكلم مع اللي بالرسبشن وكانو ثلاث
الشعر جنان يطيح كل وحده منهم على وجها ولا شكيت للحظه انهم مسوين حاجه بشعورهم لان نعومتها طبيعيه .....كانو ينصحونها تسوي كيراتين مثلهم ...بس هي ردت عليهم وقالت بصراحه غالي علي بالف ريال...
طبعا انا كنت حاطه اذني بينهم واسمع سوالفهم دام فيها شعر...

لما دخلت للتنظيف سالت اللي تنظف بشرتي عن الموضوع وطبعا كانت وحده من الثلاث....سالتها انتو تسوون فرد والا علاج كيراتين؟؟؟؟

قالت حنا نسوي علاج..قلت لها بامانه مافي مره سوت وحده عندكم كيراتين وبعد فتره دقت عليكم تشتكي بانه شعرها تساقط؟؟؟؟

قالت انا بكون صريحه معاك بحكم انه انا اللي اسوي كيراتين بالمستشفى ...قالت شوفي اللي شعرها يتساقط من قبل وتسوي العلاج للكيراتين يوقف التساقط ولما تنتهي فترة العلاج اللي هي اما تكون 4 شهور او 5 شهور او 7 شهور على حسب نوعية الشعر يرجع الشعر يتساقط ...يعني العلاج يوقف التساقط فتره معينه بس...

قلت لها طيب مدام انه علاج كيف يفرد الشعر وينعمه لها الدرجه؟؟؟

قالت لي هو بصراحه العلاج فيه نسبه بسيطه من الفرد...

قلت لها طيب شوفي شعري كم يكلف؟؟؟

قالت بيكلفك 1000 ريال للجلسه الوحده وانتي محتاجه جلستين وللعلم شعري لحد كتوفي....

قلت لها طيب انا فارده شعري من تقريبا 9 سنوات بسوفت اند بيوتفل
وماعدت التجربه ابد ...قالت لي انا ماايد الفرد ابد خاصه هذي المنتجات اللي موجوده بالسوق والصيدليات...

قلت لها طيب المنتج اللي عندكم الاصلي ؟؟؟قالت اكيد ..

قلت لها فيه ريحه لما تبدي تسويه قالت ايه فيه بس مو ريحه قويه...

بس اقسم بالله جلست انتظر زوجي يجيني وماشاء الله المستشفى ماوقف من الحريم اللي تجي تحجز مواعيد علشان يسوون شعورهم...

اغلب الحريم جايين يسوون شعرهم...واللي لفت انتباهي وحده كبيره بالسن جات وقالت للي في الرسبشن ابي اسوي كيرلتين ذا الحين!!!!!قالو لها لا مانقدر لازم تحجزين قبلها بوقت لانه زحمه...وشافت الاخصائيه شعرها قالت لها الجلسه بالف وادفعت عربون 250 وعطوها موعد على الاربعاء الجاي وحاولت فيهم يقدمون الموعد ومارضو ..قالو لها زحمه...

هالموضوع حمسني كثير بس برضو خايفه ولان ميزانيتي ماتساعد يعني اقدر اسويه مره لااكثر....


اقسم بالله انه هذا اللي شفته وهذا اللي صار قدام عيني والموضوع مو اعلان وتسويق للمستشفى لا والله...

بس حبيت افيدكم باللي سمعته وشفته ..واذا فيه وحده من الاخوات سوت علاج كيراتين عند هالمستشفى ياليت تفيدنا اكثر...

مع خالص امنياتي لكل البنوتات والامهات بشعور طويله وناعمه وصحيه ....