سالفه لي قديمه وانا بالابتدائي

الطالبات

السلام عليكم ورحمة الله وبركاته

شخباركم بنات
حبيت اقول لكم هالسالفه ماقصدي ابي حل لا بس فضفضه

وانا بالابتدائي كنت متفوقه لابعد الحدود لدرجة بحفل الامهات اخذ اكثر من ٣ شهادات
التفوق والمثاليه والنشاط والرسم ووو كثير اشياء يكرموني فيها ...
يعني معروفه عند المدرسات ومحبوبه عندهم مررره

ما امدح نفسي بس عشان تكون عندكم خلفيه

السالفه وانا بخامس كنا رايحين للمعمل حق العلوم
وكان فيه فصل قريب من المعمل وفيه بنت جيرانا دايم انا وياها سوا
ولقيت على باب فصلهم اسماء المميزات انا قعدت ادور على اسم بنت جيراني وااشر بيدي
جوا البنات زحمه على باب الفصل وكان مسكر
وحده منهم دفتني متعمده الا وانا طايحه بالفصل قدام استاذتهم
وتقعد تهاوشني وتهزاني وانا اقول موب انا البنات دفوني بس مارضت وعلمت علي استاذه العلوم وقعدت تهزأني وتهاوش تقول انتي الممتازه الطالبه المؤدبه تسوين كذا
ماتوقعتها منك
انا ابرر للاستاذه ولا فيه اي قبول
حتى قلت لها عن البنت اللي دفتني والبنت انكرت
وضربتني على يدي بالعصا عشان ما اكررها
وقعدت ابكي وانا مقهووره من البنت وبسبب هالشيء ماخذت شهادة الطالبه المثاليه
حتى البنت كانت شاطره وتنافسني بمسابقات الرياضيات وتنقهر مني لاني اسبقها دايم
انا لحد الحين مقهوره من البنت والاستاذه وحاز بخاطري بس سامحتهم لكن لما اذكرها احتر شوي لاني خيبت ضن امي بالحفل ماصرت المثاليه

قلت هالسالفه لاني توني متخرجه واخذت مرتبة الشرف ولله الحمد وتذكرت هالموقف

لاتقولون امدح بنفسي ومدري ايش لا والله بس كذا
تذكرته قلت اقول لكم السالفه
واي وحده تحس انها انظلمت او صار لها موقف مثلي تقوله نبي نقرا قصص مثل كذا

وشكراً
معليش مابي زعل وانتقادات وكذا
114
26K

يلزم عليك تسجيل الدخول أولًا لكتابة تعليق.

تسجيل دخول

أم ريـ♡ـِـْْتال
أم ريـ♡ـِـْْتال
ياعمري عليك

وانا بعد اذكر مواقف
مره بِــ̯͡سّ نسيت دفتر الاملاء وضربتني المعلمه كف وربي ماااانسااااااه انقهرررت مرره
وانا كنت مثلك متفوقه وامسك الاذاعه والملف كله

بِــ̯͡سّ اذكر موقف ثاني كنا بحصة العلوم جت الموجهه ولاننا مو فاهمين ماجاوبنا صّـْـٌ☑ـّـٌζ
ومعلمة العلوم قالت لي آنــــ iam ــآ اكثر شي مقهوره منك شاطره وليش ماتحلي وقالت مارح اخليك تمسكين اذاعتي قلت عادي
وبيوم اذاعتها مااحد جهز لها شي مٓـ❧•ـنّ البنات جات لي تترجاني اطلع اقدم الاذاعه طلعت قدمتها لها والورقه فاضيه جبت كلام مٓـ❧•ـنّ راسي
احسن رديت اعتباري ههههههه
لؤلؤة أمي
لؤلؤة أمي
ألف مبروك أختي من تفوق لتفوق دائم بأذن الله ...........
ميموشاااا
ميموشاااا
يالله
قد ايش المواقف القديمه تثبت !!
لسا ف ذاكرتي مواقف ماتنسي

ماشاء الله عليك الف مبروووك مرتبة الشرف
lolo 110
lolo 110
انا عندي موقف بحيااااتي مانسيته ايام المدرسة
تختلف عن قصتك
طلعنا رحلة مدرسية مع بنات صفي وكنت مصادقة بنات باكستانيات لاني كنت خجولة جدا جدا واحس ماحد حبتقبلني غير هذي الجنسيات مع احترامي لهم وما اقصد شيء بس خجلي كان ملغي شخصيتي وتفكيري تماما
المهم قلت بنفسي اختفي عن مجموعتي وتخبيت عند الحمامات وكنت اقصد اني اشوفهم يسألون عني او لا
وللاسف سمعتهم من بعيد يقولون احسن خلي لولو تروح ما نبغاها :(
وانا من غبائي ولان ماعندي صديقات امشي معهم غيرهم فاضطريت ارجع لنفس المجموعة وكاني ماسمعت شيء ووحدة فيهم قالت خوفتينا عليك وين كنتي!!

والان بعد هذي السنين الحمدلله تخلصت من الخجل واقدر اصادق اي وحدة بدي اياها وصارت شخصيتي قوية ويمكن صرت اخوف عند بعض الناس ويخافون مصادقتي من لساني!
لاني صريحة جدا وان اي شخص سوى معي اي موقف حتى لو مايقصد اسمعه مليون كلمة
وتلاحظي هالشيء بردودي اني حادة بالكلام
انا تعبت من نفسي بس مو بيدي تلقي موقف عادي يؤثر عليك طول حياتك
واتمنى لو ترجع الايام واروح امسح بهالبنت الارض

فانا ما الومك انك هالموقف ما نسيتي لان في اشيا عند االبعض سخيفة بس عندنا صعب ننساها
مول ‏ღ دانة الدنيا ღ
مواقف المدرسه دااااائما محفوره بالذاكره لان غالب ظلم مافيه تاكيد ابد