سامحني يابوي انا عانس

سامحني يابوي ان ثقلت عليك سامحني يابوي انك بنيت بيت صغير ولا حسبت حسابي فيه
انا عانس ووصلت لمرحله الياس انا عانس وماحد يبيني ..انا عانس لسبب مالي دخل فيه انا عانس لان ااني مانتهي لقبيله الفلانيه
انا عانس لاني ماروح ولا اجي ولا احد يعرفنا لانه البنت عيب تطلع وتروح وتجي .. انا عانس لان البنت عيب تحضر زواجات عشان مايقولون هي جايه. عشان تنخطب انا عانس عشان ماعندي صديقات ولا علاقات اجتماعيه وشلون يصير لي صديقات وانا ممنوعه اني اطلع واجي انا عانس لانه ماحد يعرفني ولا يعرف شكلي ولا يعرف اخلاقي عايشه كاني سجينه اكل واشرب وانام فقط الوظيفه ممنوعه تكميل الدراسه ممنوعه دورات ممنوعه نسيت نفسي نسيت مين انا نسيت وشلون اتكلم مع الناس نسيت اني انثى نسيت كل شي
مرت سنه ورا سنه ورا سنه وسبحه العمر تكر ولا احد طل في وجهي ليش ؟ ماهو ناقصني لا مال ولا جمال بس وشلون ياهلي انخطب وانا ماحد يعرفني ؟
اللي يبيك يجيك ؟ ومثاليات وابراج عاجيه ..انا احس اني روح ماحد يشوفها محبوسين في بيت جانا الهم والغم والامراض النفسيه
اه ياقلبي .. قريت موضوع العضوه العضوه نور حياتي بكيت وبكيت على حالي ومن حالي ..على الاقل الاخت تروح وتجي وتشوف الناس ومسموح ان الخطابه تكلم ابوها انا ياويلي قسم يدفوني حيه ..
لي ١٨ سنه ادعي وربي ماستجاب. لي ١٨ سنه ادعي بعرفه وبرمضان ومع كل وقت ومع كل حين
لي ١٨ سنه استغفر بالالف وبالالفين. استغفرك ياربي لاتحاسبني على مافعلت ..
جمعه العيد هي الوحيده اللي مسموح لي احضرها وان حضرتها اسمع كلام يسد النفس ويجيب الغم والهم ويمسح العيد عن قلبي يجيني طفل ابو خمس سنين يطل بوجهي في المجلس انتي فلانه اللي ماتزوجتي ؟ وامه في كامل انبساطها وضحكها وتجلس تكمل تريقه ولدها ايه هذي هي وكاني متحف يتفرجون فيه كاني تحفه الام تشرح لولدها ..
اه ياربي ياقسوه هالبشر .. ياربي احساس احساس الشفقه يقتلني ..ياربي صرت اتمنى الموت على هالحياه .. ياربي لاتحرمني خير كماعندم بشر ماعندي
فقر وجهل وكبت وكره للبنت واستنقاصها
لا احد يقول ميته على الزواج وميت على الرجال
ايه ميته على الزواج ونص..الزواج بمجتمعي هو الحل الوحيد للحياه الحل انك تطلعين وتروحين وتجين. الحل ان الكل يحسب لك حساب الحل اللي يسكت لسان الناس عنك انتي ان وصلتي لسن معينه وماتزوجتي معناته انتي داشره وفيك وفيك مجتمع متخلف متخلف متخلف ..
لاتلوموني ان صرت زوجه ثانيه وثالثه ورابعه لاتلوموني لاني ابي اعيش واجيب لي بزر ولا اني بكره اجلس اكرف ببيت اخواني اصير لهم خدامه ..
لاتلوموني ان صرت كله سنه انزل من مستوى شروطي لعل وعسى احد يجيني لو وش ماكان ..المهم انه يجي .. لاتلوموني ان صرت شخصيه عدائيه. بتعليقاتي بانستجرام كل ماشفت وحده تحط كلام حب اروح اطلع كل عقدي النفسيه عليهها لاني ماجربت وش هو الحب لاتلوموني وانا كل يوم اشوف داشره تتزوج والناس تطلب بنسيان ماضيها لاتلوموني وانا اشوف كل البنات اللي يكلمن بالجوال كلهم يتزوجون احسن الناس اه ياربي لاتبتليني بديني..
يابوي انا مجتمعي صاحب مظاهر ..يابوي لو انك رجل منصب وغني كان خطابي طوابير يابوي مجتمعي ماعليهم من دين البنت عليهم من شكلها وقت الزواج عجب امه ولا لا .. عليهى ان هالبنت موظفه. ولا لا هذا اللي يهم الناس الحين.. عمري راح سنه ورا سنه وانا انتظر اللي يجيني عشان اخلاقي ماشفت احد عمري راح وانا اشوف اللي اردى مني اخلاقيا تتزوج وتتوب. وتصير عند زوجها الكل فالكل .. عمري راح وانا انتظر هالمنقذ ينقذني من اللي انا فيه .. عمري راح وانا انتظر كلمه ماما. عمري راح وكل يوم اقرا عن خطوره حمل المراه وعمرها كبير ويزيد همي هم .. عمري راح وانا اسوي نفسي البنت المثاليه وانا من داخل مثل القزازه المكسوره
اليوم شفت براسي اول شيبه ماراح احكي لكم عن مشاعري اكيد انتم تعرفونها شيبنا ولا توظفنا ولا تزوجنا ولا صرنا ام ولا عشنا الحياه صح بتقولون اهم شي الصحه والعافيه الحمدلله انا جاني القلب والاكتئاب والسكر والقولون من الهم والغم وحياه السجن والكبت في مجتمع غبي معقد
‏‫