سامحوني بس حبيت افضفض

السلام عليكم ورحمه الله وبركاته

اخواتي الله يجزاكم الف خير ما تصدقون قد ايش ارتاح لما ادخل هنا لان احس ان لى اخوات فاهميني وحاسين بمعناتي

معليش اخواتي راح افضفض لكم شوي وتحملوني مالى الا الله ثم انتم
زوجي ما اقدر اقول له شي يكفيه همه وامي ما احب انكد عليها واضيق صدرها

الفتره هذي حاسه بالحرمان من الذريه بشكل كبير جدا وصار الموضوع يسبب لى الحزن اكثر من اول
من زمان كنت اقدر اتحكم في احساسي ومشاعري اكثر
بس الحين من اي شي اتضايق ما ادري هل هو بسبب طول الانتظار؟
او اني حسيت اني استنفذت كل اللى عندي من طرق للعلاج وعملت كل شي ؟
دايم يكون عندي حل بديل اذا فشل العلاج بس هذي المره ما عندي اي حل

بس متاكده ان الله سبحانه ارحم من خلقه وانه هو الرزاق الوهاب وليس خلقه واتكالى عليه سبحانه وحده

الفتره الاخيره صايره ما احب اروح ازور اي وحده والده وطبعا مو غيره والله العالم
بس صرت احس ان الناس بدت تخاف مني على نفسها وعيالها
مع اني ولله الحمد ذكر الله على لساني طول الوقت على الزين والشين
اقول لكم موقف يمكن تصدقوني==

من اسبوع كنت في المستشفى ازور صديقتي والده وانا عندها جت الممرضه وقالت لها راح اجيب لك بنتك علشان اعلمك وشلون ترضعينها لانها كانت بكريه على طول شافتني صديقتي وقالت لا جيبيها بعدين حسيت انها خافت مني
سويت نفسي ما انتبهت بس الممرضه اصرت انها تجيبها وبالفعل جابتها واول ما دخلها صرت اذكر الله بصوت عالى علشان ترتاح
وتدرون فيه شي ضايقني وحسيت فيه بالغصه الله لا يحرمني ولا انتم يارب
يوم شفت الممرضه تعلم صديقتي وشلون ترضع ووشلون تغير للطفل كنت انا اللى اترجم لصديقتي لانها ما تعرف انجليزي وكنت مع الممرضه خطوه بخطوه وكاني انا الام وبعدين كنت اشرح لصديقتي وش تسوي
مره اتاثرت في هذا الموقف وتمنيت من الله سبحانه ان ما يحرمني هذي الفرحه اللى شفتها في عين صديقتي
الله يخليل لها بنتها يارب

واكثر شي صار يضايقني لما احد يسالني كم عندك عيال؟
اليوم كنت في عزيمه وشفت صديقه لى ما شفتها من اكثر من 14 سنه <<<<<<عجوز صح :

اول ماشافتني عرفتي وسلمت على واول سؤال كالعاده
وش عندك من العيال؟؟؟؟؟
قلت لها ما عندي شي
طارت عيونها وسالت اغباء سوال ودايم اسمعه ليش؟
احس ان ودي الارض تنشق وتبلعني اذا سالوني
من زمان ما كان يهمني اما الان صار يسبب لى مضايقه كثير
لدرجه صرت احاول اتجنب اي اجتماعات

في العيد كان فيه الاجتماع العائلي وطبعا كل اقاربي ومعهم عيال
هذاك اليوم حسيت بالضيق مره وخصوصا ان قريباتي اللى في سني عيالهم ماشاء الله لاقوه الا بالله في الابتدائي وفي المتوسط
وانا الوحيده اللى ما عندي احد وفي تقسيم الهدايا والفلوس كل وحده معها عيالها الا انا علشان كذا جنبت نفسي الاحراج ورحت بعيد عنهم

يمكن يكون كلامي سخيف وتافه بس قلت افضفض به لا انفجر

دايم افكر لو الله كتب لى الحمل من يوم تزوجت كان الحين ولدي او بنتي في التمهيدي
بس الحمد لله على ما اعطى واللهم لا اعتراض

سامحوني اخواتي على الاطاله بس من عشمي فيكم اخواتي ادعوا لى ان اكون حامل هذا الشهر لان الدوره متاخره لها اسوبع يارب اكون حامل وابشركم يارب ادعو لى في ظهر الغيب عسى ان يستجاب لكم