سامحوني قررت انهي حياتي:(

السلام عليكم ..

انا تعودت لو فيني شي و مو عارفه اتصرف اقولكم ..
بس هالمره الموضوع غير وايد عن كل مره ..

انا تعبت و بقول باختصار و ابي نصيحتكم قبل لا اتخذ القرار النهائي ..

اللي مو عارفه سالفتي مع خطيبي بس ابيها تعرف انه علاقتي معاه كانت 3 سنييين حب و الحين قرب وقت زواجنا كان على الصيف بعد رجعتي من السفر لو الله سهل ..
لكن في شغلات كانت مأذيتني منه تقدرون تدورون موضوع اسمه خطيبي و انا .. و تعرفون السالفه كلها ..

بس باختصار انه صرنا جزء لا يتجزء من بعض يعني مستحيل احد فينا يقدر يعيش بدون الثاني حتى لو اهوه لعب بذيله شوي مرده لي ومايقدر يعيش بدوني و هالكلام اقوله لاني واثقه فيه 100% بس طبع الريال تعرفونه اناني .. المهم ما اطول عليكم ..

بعد ما رجع من السفر و اغلب البنات عارفين من موضوعي السابق انه انا كنت بحاله لا يرثى لها من تعب و اغماء و نفسيه تعبانه والاسباب ذكرتها من قبل مابي اطول وايد ..

امس كنت طالعه فقالي اول ما ترجعين دقي قوميني لأني تعبان ابي اغفى شوي.. وحرص علي انه اشلخ التلفون و ما اهده لين يقعد ..

اول ا رجعت تميت ادق من الساعه 9 بالليل لي الساعه 2 والله العظيم ي بنات اني ما ابلغ يوم اقولكم انه من 12 لي 2 انا ادق متواصل يعني لو تسكر الخط ارجع ادق مره ثانيه .. و من 9 لي 12 كنت ادق كل 5 دقايق او 10 دقايق ..

ماكو فايده ما يقعد .. انا الصراحه خفت عليه وايد و استحيت ادق على بيتهم هالوقت يمكن نايمين ..

بعدها الساعه 6 الصبح دق علي طبعا انا مايالي نوم قاعده افكر شفيه و خفت عليه وايد ..

جان يدق 6 الصبح و قالي انه كان نايم و لما شافني ادق وايد و اهوه تعبان يقول انحرجت اقولج اني بنام لانها مو حلوه انه بعد ما اتعبج معاي اقولج لا خلاص ابي ارجع انام .. فيقول حطيته سايلنت و نمت بدون لا احس لاني تعبان ..

طبعا انا انصدمت شلون مخليني ادق و اتعب كل هالوقت و اخر شي مايقولي انه يبي ينام .. لو قايلي جان وفر علي التفكير و التعب .. و سالفت الاحراج كلش مو داخله بالي لانه مابينه كلافه و وايد متعودين على بعض و اهوه بالاساس من معارفنا بس شوي بعيد يعني مو يقربلي بس من معارفنا ..

المهم .. قلتله خلاص انا بنام عيل دام تطمنت عليك ..
بعدها ماقدرت انام خلاص طارت النومه فبعثتله مسج و قلتله اشبك نتكلم عالمسنجر انا مو يايني نوم ..
قالي لا نامي ارتاحي لا تخربين نومتج .. قلتله خلاص طارت النومه و ماعندي شي اسويه ودام انك فاضي اشبك احسن بدل لا تقعد بروحك ..

اهني قم يرد شوي متأخر على المسج فدقيت عليه لاني استغربت ..
جان يسكر الخط .. توقعت انه توه رايح الحمام عزكم الله .. فنطرته يدق ما دق ولا رد على المسج ..
قلتله شلون تبيني اشبك او لا عشان تعلقت مو عارفه شسوي ..

ما رد .. قلت لايكون صاير شي فدقيت عليه يسكر الخط و يقولي شوي و ادق .. نطرت ساعه تقريبا .. و ما دق توقعت انه الكرت مخلص عنده لانه طول وايد .. فرديت دقيت و نفس الشي يسكر الخط ..
و يرد يقولي شوي وادق .. و انطر بعد ساعه ليما صارت 8
جان اقول خليني ادق على خط غرفته و اشوف مشغول او لأ ..
و الصدمه اني لقيته مشغول و ليلحيين اللي انا اكتبلكم اموضوع و الخط مشغول ..
و لما شفته مشغول صابتني حالت ينون و قعدت ادق عليه و انا ميته بجي .. و اهوه يسكر الخط و ما يرد و يقولي شوي و ادق ..
و انا مصممه ابيه يرد بشوف شنو عنده اللي حاول انه يصرفني و يقولي نامي ارتاحي و اخر شي اهوه خط غرفته مشغول .. فأغلق اجهز و ليلحين غالقه و خط غرفته مشغوووووووووووول :icon33:

يعني بالذمه بنات لو قاعد مع اهله بهالصبح اكيد راح يقولي نفس كل مره لكن منو من اهله يقعد من 6؟؟؟؟ مافي احد

اشكره انه يتكلم مع احد الله العالم منو من خط البيت .. او انه شبك انترنت و الله العالم يكلم منو بهالوقت و مطنشني ..

و بكلا الحالتين انا خلاااااااص فقد الامل فيه ..
غيرت من نفسي و سويت نصايحكم و كل شي كان ماشي الحمدالله نفس اللي قلتولي ..

لكن الحين احس انه خلاص كرامتي انجرحت وايد و انا عشان احبه و ادري انه يحبني اغفرله و اصدق اشياء الطفل مستحيل يصدقها :(

والله قلبي يعورني و منقهره .. تخيلو اني مو شايفته من اول ما رجع من السفر صارله يومين لانه عندي امتحانات .. واليوم ماما وعدتني تروح معاي السوق عشان اشتري ملابس و اشياء حلوه عشان لما يزورني باجر اكون عروس حلوه ..
و ماتتصورون فرحتي انه كنت بشوفه باجر و انه راح اتسوق عشان اتشيكله لو زارني باجر :(

والحين شوفو الصدمه :( شقول حق ماما و شسوي شلون اتصرف احس اني مخدوعه و انه اناني لاه يلعب ويسوي اللي يبيه و بعدها يتزوج وحده واثق انها اشرف من الزباله اللي في الشوارع يتعرف عليهم او الله اعلم من وين و منو اللي ملهيته عني ..

بنات الله يخليكم انا عارفه اني ثقلت عليكم بمواضيعي بس والله مالي غيركم و انا شرحتلكم وضعي انا اكبر اخواني و خواتي و عمري 20 و ماعندي خبره وايد بهالدنيا الخايسه .. قوللولي شسوي شلوووووووووووووووون اتصرف الله يخليكم انا كاتبه هالموضوع عشان هلاشياء و ابي جواب عليها الله يعافيكم ..

1-شلوووووووون اتصرف لو اتصل بعد الف ساعه (على قولته بعد شوي)

2- شسوي في ماما اللي بتوديني السوق عشان اتزهب حقه و اللي مو مخليه شي ماسوته من تجهيزات لباجر سواء في البيت او الاكل من طلب مطاعم و حلويات انتو عارفين الباقي الخ...

3-مو قادره اثق فيه او اصدقه و افكر انهي حياتي (لا تفهموني غلط اعوذو بالله من الانتحار انا ما قصدت انتحار .. قصدت افسخ خطوبتي و اعتبر هالشي انه نهيت حياتي لانه الجسم بدون رووح مستحيل يكون هالانسان عايش :icon33: والله اني ما ابالغ بس انتو مو عارفين اللي بيني و بينه )

انا منتظره منكم رد على الثلاث اسئله الله يخليكم ساعدوني و سامحوني انا ثقلت وايد عليكم بس كله في ميزان حسناتكم