سبحان الله ي بنات ..!

زمان وأنا صغيره أذكر لنا جيران
أيام بيتنا القديم ولدهم الكبير متزوج وحده جميلة جميلة جميلة ماشاءالله .
ومن قبيله في تبوك ماهي منهم بس سبحان من خلقها وأحسن خلقه .وكلن يحبها جارات والناس وصله وتحب توجب. وبذات أمي كانت طايره فيها .
لكن سبحان الله مافيه أحد كامل عندها مشاكل حمل وماخلفت وطولت مع الرجال وأخوانه كبروا تزوجوا وخلفوا وهي لا ....يمكن أكثر من 10 سنوات معه لكن كل ماتكبر تزيد جمال وأناقه لدرجة سلفاتها شابين غيره منها مع أن شخصيتها معهم صامته لان ع حد ماسمعت من خلفن يخافن ع عيالهم من عيونها . لان ربي مارزقها .
وفجأة أمي تقول سافرنا نحضر مناسبه ورجعنا الا فقدتها ماتشوفها ولا تشوف أهل زوجها الا يقولون فلان طلقها. وراحت لديرتها تبوك تعرفون الصدمه تعرفون كميه الحزن اللي خيم ع أمي وجارتنا تخيلو فلانه راحت وطلقت ومحد بيشوفها .ويوم يسالون أم طليقها الا تقول نصيب ونصيب بس مافيه تفسير غير موضوع العيال المهم الرجال تزوج وخلف .
لكن روح وجمال الادميه ماغاب عنا لدرجة حاولت أمي وجارتها يحصلن على رقم لها او احد من أهلها بس ماعطونا أهل طليقها ويقولون مانعرف وهم باين انهم مايبون لدرجة كذا وحده وقتها مستعدها تخطبها لقريبها .
المهم مرت السنين ..والا وحده من جماعتنا تقول لامي فيه وحده تسال عنكم في مدينه ثانية هي ساكنه وتصير اللي تسال عنا جالتها هذي .
وحنا نقلنا لبيتنا الجديد ومرت السنين .
المهم أمي قال ومعرفها لانها تقول لها أم فلان وامي ماتعرف وحده بهذا الاسم المهم اللي من جماعتنا ناسبونا وصرنا نحضر لهم مناسبات وعزمتها اللي من جماعتنا .
تخيلو يبنات طلعت هي .مااوصف لكم دموع أمي يوم شفتها وأحنا فرحنا هذي فلانه أبد زايده جماله ع جمال .
بس تدرون وش تغير عليها أن البزارين حولها من بنات وعيال ماشاءالله تبارك الرحمن والجمال وزعته عليهم .
وامي تسولف عليها الا تقول تزوجت متزوج وامي قالت أنتي خساره ع المتزوجين ومن هذا الكلام .
وربي قالت كلام خلنا نبكي .
قالت شايفه هذا المتزوج اللي متحسفيني عليه سعى معي للخارج ودفع دم قلبه لين ربي رزقني بذريه
وجلست تذكر محاسنه تقول مع انه عنده عيال وبنات من الاولى مومحتاج . تقول لكن ماخذلني ولا جرحني بيوم طبعا ماتكلمت عن حياتها السابقه فقط قالت وين العازب اللي كنت ماخذته هو وهله ...مانفعوني ولا كنت سعيده معه كثر هذا .


خلاصة الموضوع أوقات نحب شي ونتوقعه أنه الافضل والاحسن ...ويطلع العكس .
وأوقات نكره شي ونبغضه وهو خيرا لنا .
ماأدري ليش تذكرت طليقي وكيف كنت ماخذته عن قناعة وبلحظه غضب أنتهى كل شي كذا .


دائما الخيره بماختاره الله .
حبيت أكتب قصتها لانها أفرحتنا وأبكتنا بنفس الوقت .
ودي أشوف اللي تقول الثانية نزوه ...الخ .
ولا اللي تقول وش لك بمتزوج ليش ماتخذين عازب كان النصيب بيدها .
بصراحه هذي الايام المعيار الصحيح للزوج ليس حالته الأجتماعية خلقه ودينه .