سبع سنين معاناة واخرتها سحر منع انجاب

السلام عليكم ورحمة الله وبركاته بسم الله والحمد لله والصلاة والسلام على اشرف الانبياء نبينا محمد وعلى اله وصحبه اجمعين
اللهم لك الحمد حتى ترضى ولك الحمد اذا رضيت ولك الحمد بعد الرضى.اللهم وفقني وزوجي واخواني واخواتي المسلمين والمسلمات وبارك لنا في انفسنا ومالنا وازواجنا وذرياتنا القادمه باذن الله

بنات انا مصدومه من فتره واللحين بس قررت اجاهد نفسي واكتب قصتي لوجه الله
علها تفيد غيري , ولا تضيع وقتها بالمستشفيات والطب الشعبي وتنسى الرقيه, واذا كنتي تتعالجين بالرقيه ضروري يكون زوجك يقرا معك يمكن يكون ماثر عليك والعلم عند الله

انا تزوجت قبل 7سنوات .كان عمري23سنه من اول مانخطبت توقفت دورتي وبعدها صارت تتقطع وشهر تنزل وشهرين لا
ومرات تنتظم ومرات لا.مع العلم قبل الزواج كانت طبيعيه
المهم بعد المستشفيات قالوا عندك ضعف مبايض وخمول بالغده الرقيه طبعا ارتفع وزني بشكل غريب في السنه الاولى واخذت العلاج وبعد فتره انتظم هرمون الدرقيه وبقى معاي الضعف
وبعدين قالوا فيه تبويض لكن البويضات صغيره وكانت المواعيد بعيده المهم رحت للطب الشعبي نفس الكلام ضعف وانسداد .وبعضهم يقولون قرينه ووحده قالت عندك مس على عين ولازم تقرين وكنت لما اقرا تثاوب والمم بالجهه اليمنى من الجسم وكنت اشوف احلام .سويت اشعة صبغه ولكن الضعف موجود والدوره غير منتظمه بعد سنه قالوا عندك سن ياس مبكر والمبيض مايشتغل خلاص انسي الحمل .ننزل الدوره بس الحمل صعب واستمريت على العلاج واحيانا يكون فيه تبويض بس مايوصل الحجم الطبيعي.بعد اربع سنوات نصحوني الاخوات بقراءة سورة البقره وجاهدت وفعلا قريتها 3 شهور والنتيجه زوجي حلم ان فيه شيخ يخنقه وان جني يصارخ داخله , ويابنات من اول سنه كنت اقول لزوجي وديني لشيخ اقرا لاني فعلا اتعب وماقدر اقرا ثقل بجسمي وصعوبة تنفس وهذا كله زاد بعد الزواج غير المشاكل اللي تتسلط, وكان مره يقول هذا ياخذ فلوس وهذا يلمس الراس ,ومشاكل كان ضدي ماكان يساعدني.المهم شفت رؤيا وفسرها الشيخ ان زوجي مسحور انا ماصدقت,مع العلم زوجي عصبي ماينتعاشر وتارك الحمل كله علي رغم انه كان يشوف انه يتاثر بالقراءه ماكان يساعدني , و(الفتنه اللي حصلت انه اهو تحلله طبيعي وانا العكس)ومنها ماكان حريص وكانه يقول احمدي ربك اني صابر عليك.وكان يعيرني بالعيال,خلاص طقيت عقم ومشاكل ووحده وزوج عسروالنفسيه صفرررررررر, رحت لاهلي وطلبت الطلاق,بعد فتره جاء زوجي تفاهم مع اهلي وكانوا اهلي يقولون معقوله فلان يسوي ويهين و يمد يده لا مانصدق, وفعلا يابنات اللي اشوفه زوجي بمنتهى الرقي والكرم مع الناس والعكس معي. رجعت بشروط ومن ضمنها انه مايعير بالعيال وبنفس الوقت اذا طلبت علاج مايقول لا.مع العلم ان العلاج من حسابي.المهم رجعت وتركنا العلاج كنت بس اتهي نفسيا واحاول اعيش وتركت موضوع العيال على جنب ووكلته الله.قررت مره ثانيه افسر الرؤيا عند كذا شيخ وكلهم قالوا سحر وواحد حدد وقال انه سحر منع انجاب,بجهاد وتعب ومراوغه من زوجي رحنا نقرا عند الشيوخ وصار فعلا سحرواشياء اخرى من غير الدخول بالتفاصيل المتعبه.حسبي الله على من ظلمني واعتدى علي من انس وجن.


هذي قصتي باختصار وبالنهايه فيه رسالات اوجهها :


1_الى طالب السحر ( الحاقد والحاقد ) :حسبي الله ونعم الوكيل .انا خصيمتكم يوم الدين ولنا موعد لن نخلفه,واسال الله مثل ماحرمتونا الانجاب بعد قدرة الله كل هالسنين ان يحصد ذريتكم امام عيونكم وتجربون مرارة الحرمان ويرينا فيكم عجائب قدرته ويرد عليكم سحركم ويفضحكم امام الناس,الله حسبي وحسيبكم.

2_الحاسد : اتقي الله في نفسك الا تعلم ان الحسد يحرق الحسنات كما تحرق النار الحطب طهر قلبك وادعو بالبركه لجميع الناس

3_العائن : اذا رايت مايعجبك فقل ماشاء الله اللهم بارك له

4_الطبيب : راعي نفسية المريض ,لاتزرع الياس بقلب المريض .بل ازرع التفاءل فلاشي كبير على قدرة الله

5_ الى كل من يقرا قصتي : الرجاء الدعاء لي ولزوجي بالشفاء من كل داء هو اعلم به وان ييسر لنا الرقيه والعلاج وياذن لنا بالشفاء ويهدي زوجي للعلاج بالرقيه ويصدق انه مريض ويكفيني شره ويهديه,(لانه تمر فترات استخير بالطلاق من شدة ماشوف منه وتقلباته ومشاكله وانفعاله المبالغ فيه) وان يكفينا كل من اراد بنا شرا بما شاء وكيفما شاء.ويعيني.وان ييحي مبايضي ويرزقنا الذريه الصالحه الباره.ويطهر اجسادنا وبيوتنا من كل سحر وعين ومس ويوفقنا بالدنيا والاخره وجميع المسلمين.

6_ارجو تزويدي بارقام وعناوين مستشفيات تستقبل مثل حالتي في السعوديه والخليج والعالم العربي

7_فيه ملف في القسم لعضوات يعانون من مرض فشل المبيض (سن الياس المبكر) ارجو عرض انفسكم وازواجكم على الرقاة يمكن يكون عندكم سحر وهو الغالب اوغيره من الامراض الروحيه خصوصا اذا كنتي اصبتي في فترة الخطبه او الزواج او بعد الانجاب,والله اعلم .اللهم هل بلغت اللهم فاشهد

8_ الى الجميع :رددوا دائما (انا لله وانا اليه راجعون اللهم اجرني في مصيبتي واخلف لي خيرا منها)


وصلى الله وسلم على نبينا محمد وعلى اله وصحبه وسلم تسليما كثيرا