سجلت في نادي وصارت لي مضايقات فيه

السلام عليكم كيفكم الرشيقات ..باذن الله كلنا ننال هذا اللقب قريب جدا

عزيزاتي حابة اخذ رايكم في كذا موقف اتعرضت له من قبل الموظفات في النادي الي سجلت فيه
انا وبنتي "ثاني ابتدائي"نعاني من زيادة وزن وسجلنا في نادي موقعه جيد محافظ ..واهم شئ بنتي حبته
وسجلتها سباحة

اول ما جيت استفسر وداخلة متحمسة لانو كان امنيتي النادي واتحقق
بفضل الله لقيت فضول ووجيه تطالع فية بلقافة ..هم الموظفات اثنين استقبال ووحدة تاخذ الجوالات وتسجل الحظور ومدربتين
سالتني وحدة منهم انت ايش جنسيتك عشان نشوف عندك ملف سابق عندنا او لا !!؟؟
اخذته بحسن نية
وبدات المضايقات تتوالى
كل ماعملت حاجة ممنوع مثلا هم مقسمين ساعة ونص مسبح ساعة ونص الات وساعة ايروبيك ونص ساعة ساونا
بنتي دخلت المسبح خلصت الساعة والنص رحت اصلي رجعتلها للمسبح رحت غرفة تبديل الملابس لقيتها زعلاااانة تقولي خرجوني ياماما وانا ابغ اسوي رياضة معاهم ما اعرف ايش الاسلوب الي خرجوها بيه
كلمت الي خرجتها قلتلها ترا ما تتلوث مويتكم ولا حييتغير الكلور لو خليتيها لما اجي وانا اكلمها
دخلت الساونا غرفة خشبية حارة ولوحدي لبست قميص طويل بس بدون كم ومعاية قميص تاني طويل وبكم لما اخرج منه

جات الي ماني عارفة ايش تبغى مني وفتحت باب الساونا وقالت لي باسلوب منرفز كاني طفلة ممنوع لازم تلبسي كم
قلتلها تراك طفشتيني وانا اضحك على طول واتكلم معاهم بس اسلوبهم مستفز جدا وخرجت ودخلت وحدة بعدي بنطلون ضيييق بدي علاقي ولا كلمتها ولنحسن الظن ونقول ماشافتها بس زي ماعرفت تراقبني تراقب غيري
لما اروح عشان اصلي الاقي وحدة منهم تتبعني اي مكان اكون موجودة فيه تجي وحدة تراقبني ايش ده؟؟؟
لحدة ما انفجرت فيهم وقلتلهم بنتي مالكم شغل بيها انا امها انا اكلمها ....والممنوع علية امنعوه على غيري في حريم يقعدوا في المسبح زي مايبغوا وهم بنفسهم كلموني

اليوم لبست جزمتي الطبية الله يكرمكم عشان امشي بالسير عليها وهي شكلها زي الصندل بس تخينة وباين انها مو عادية جاتني المدربة قالت ممنوع روحي كلمي المديرة كل شئ ممنوع كل شئ مراقبيني فيه رحت للمديرة منرفزة قلتلها من فضلك لو سمحتي يعني ممكن امشي بالجزمة الطبية تبعي فتحت عيونها مستغربة من انفعالي وسكتت بس انا فعلا كنت وقتها واصلة حدي منهم
وقالت طيب مافي مشكلة انت ايش عندك مشكلة في رجولك
المديرة سورية وكل ماعقدوا البنات الي في الاستقبال حاجة اروح اكلمها وهي تسمح لي بيها واصلا مو من العقل ترفض لا اتعديت على اشيائهم ولا كسرت قوانينهم

الان بكرة حيكون اخر حصة رياضية وبعدها لازم ادفع اشتراك جديد

وماينفع ادفع اشتراك جديد والتعامل بهذي الصورة
هل اخطات في شئ ..كيف التصرف الان
انا مبسوطة اني لقيت نادي بس اتفاجات بالتعامل الصلب وعدم المرونة
صرت اشك انهم بيستقصدوني لشخصيتي لشكلي مع اني اكره التفكير بدي الطريقة مرة وانسانة عفوية وبسيطة واتعرفت على العديد من المشتركات
صرت لما اروح اتجاهل تماما وجودهم ولا حتى ابتسم انا رايحة لنادي دافعة فيه فلوس هم هناك موظفات وبياخذو راتبهم لا انا متفضلة ولا هم متفضلات ولا اعرفهم ولا يعرفوني
بس اسلوب المدرسة ده مو عاجبني ابدا وخمسة موظفات كل وحدة تجي تراقب وتامر كانها بيت ابوها
دلوني على التصرف الصحيح جزاكم الله خير