السلام عليكم ورحمة الله وبركاته

كيف حالكم يا احلى بنات...
اخباركم ايه ؟ فين الهمة والنشاط؟ يلا انا هاديكم مهلة لاول الاسبوع وبعدها خلاص مش حاينفع ، كلام عروس جا في الصميم
انا امبارح كنت بكلم منى وقلت لها ، أنا جاني أحباط لان غرضي في جمع وكتابة وتنظيم الموضوع مش بس عشان تقولوا أه والله ده حلو جدا جزاك الله خيرا / لا ابدا.
انا الفترة اللي فاتت سهرت ليالي وعمالي افكر وافكر واعصر مخي واجمع من هنا ومن هناك عشان اكتب حاجة تفيدنا جميعا في حياتنا.
مش عشان نقرا وبس ، لا التطبيق مهم جدا وكان في بالي افكار كتير بس ما لقيتش تجاوب كتير .
يلا اسمعوا كلام رئيس الجمهورية وعندكم مهلة لغاية بداية الاسبوع الجاي.
يعني عاوزة منكم ايه..؟؟؟؟
تقراوا المنهج بتركيز من غير دوشة ولاد وصوت تلفزيون ، لا جلسة هادية لوحدك . تشوفي اي ممكن تضيفي وتقترحي على كل فقرة من فقراته.
يمكن الكل يقول هو طويل وصعب لا والله ما فيش حاجة فيه مستحيلة دي ممكن اغلب الحاجات اكثرنا بيعملها .
بس مع الإصرار والتحدي حاتلاقي نفسك تطبقي كله .
يعني المنهاج مش حا ينفع انا اعمله لوحدي وانت لوحدك وهي لوحدها ... لا خااااااااااااااااااالص .
لازم نبقى مع بعض عشان نستمر ، ناخذ بايد بعض ونشجع بعض ، ونعمل تقيم واختنا اسماء (تسلم ايدكم) ، حايكون لها دور كبير في الموضوع ده يمكن نصمم وسام شرف للحمامة المتالقة خلال الشهر وافكار كدة.
ده حتى نبينا محمد (ص) ربنا عز وجل اخبره ان يلزم صحبة صالحة عشان يقدر يكمل: (( واصبر نفسك مع الذين يدعون ربهم بالغداة والعشي يريدون وجهه ولا تعد عيناك عنهم........))
يعني اللي عاوز يبقى ملتزم ويبقى على الطريق الصحيح لازم يمسك في صحبة صالحة بايديه واسنانه خاصة احنا في الزمن الصعب زمن الفتن والمصائب.
خليكو إيجابيين ، لازم كل مشاركة من مشاركاتنا يكون فيها شئ مفيد سواء نصيحة ، دعاء ، ذكر، طبطبة ، اكله ، اي شئ ما تبخليش على اي حد ، خلي دورك يكون إيجابي ، بمعني زي برنامج ((ضع بصمتك))، خلي بصمتك في الملف وفي الحياة وفي كل مكان تكوني فيه عشان بجد يليق بنا سرب الحمامات والوصف اللي بدينا في الملف .

انا اتكلمت كتير سامحوني ، كل البنات احبكم في الله
اللهم اشفي كل مريض ، واهدي كل ضال نجح كل طالب , وارحم كل ميت يا ارحم الراحمين
اللهم احفظنا من شر الكوارث الطبيعية والأفات المريضة ،، سلام قول من رب رحيم ، فالله خير حافظا وهو ارحم الراحمين.

يومياتي على السريع:
مسحت شبابيك غرفة الجلوس ، وغسلت الكراج ، ومسحت الطابق السفلي وغسلت الحمام وكان عندي اكل من امبارح كبة حامض وعلمت سلطة وبس .

آه صحيح ، نسيت اقول حاجة
انا عندي لكم برنامج كنت شايفه باحد المنتديات
هو التهيئة قبل رمضان ومحتاج تقريبا ست اسابيع كل يوم فكرة بسيطة وواجب عملي نعمله ، مين يشارك ؟؟
عشان التهيئة النفسية قبل رمضان.
يلا مستنياكم.

بالنسبة لسؤال عروس:
كل وحده تسأل نفسها لو انتى وجوزك نفس الطباع
طباعكو متطابقه تماما يا ترى شكل الحياه حا يكون ازاى
ويا ترى دى حا تكون ميزه ولا عيب

انا برأي لو انا وزوجي كانت لنا كل الطباع والميول والافكار متطابقة الحياة حاتكون مملة ورتيبة جدا، لان الاختلاف في الافكار والطباع والميول شئ أيجابي في الحياة وكل واحد يضيف لشخصية الاخر شئ ، مثلا
لو الزوج بخيل والزوجة مسرفة مع مرور الايام الزوج سوف يبدأ من التساهل في بعض الامور وكذلك الزوجة يمكن في النهاية تزن الامور بعقلها قبل ان تصرف.
الزوج هادي والزوجة عصبية ، الزوج إجتماعي والزوجة منطوية ، الزوج صامت والزوجة ثرثارة ، الزوج منظم والزوجة فوضوية،اكيد كل واحد ياثر بشكل او باخر على شخصية الأخر وبعفوية ومن غير قصد.
وهذا الأختلاف في الطباع تمتد آثاره للبيت وعلى تربية الاولاد فالنتيجة حانطلع اولاد لهم صفات من الاب ومن الام وكذلك الأختلاف في الطباع يعطي للحياة حلاوة ، يعني لو كنا تماما نفس الطباع طيب حانختلف في ايه ، حانتناقش في ايه ؟ حانتخانق في ايه؟

وشكرا

ام سوسو انا حابه ابدا و اشارك فى برنامج تهيئه رمضان اللهم بلغنا رمضان

بالنسبة لسؤال عروس:
كل وحده تسأل نفسها لو انتى وجوزك نفس الطباع
طباعكو متطابقه تماما يا ترى شكل الحياه حا يكون ازاى
ويا ترى دى حا تكون ميزه ولا عيب

اعتقد ان راى ام سوسو مضبوط صعب الواحد يعيش مع حد نفس صفاته لازم يكون فى راى و راى اخر بس مش يكون التفكير متباعد اووى يعنى يكون فى نقطه تلاقى بينهم


مى فينك النهارده ؟ ويارب يكون عمك و حماتك صحتهم احسن

السلام عليكم ورحمه وبركاته
ام سوسو انا عملت جو هادىء ورايق فى الانتريه علشان اقرى المنهاج وانا ان شاء الله اول من يطيع وانا معاكى فى التهيئه لرمضان انا بقالى شهرين بهيىء لرمضان بس انتى اسلوبك اجمل واحلى وانا ممكن اسعدك فى الكتابه ونقل الاحاديث والمقالات المختصرة علشان الريسه متمسكليش العصايا وانا جبانه لاسف
بالنسبه لموضوع النقاش تطابق الطباع يخنق الحب والمودة الا عن من عفا الله انما الاختلاف بيخلق العشرة وان احنا نغير فى بعض صحيح مش كل طرف زى التانى كل على حسب طبيعته وتضحيته ودرجه العطاء
انا مش عارفه اعبر قوى بس تعبير ام سوسو اروعاللهم اشفي كل مريض ، واهدي كل ضال نجح كل طالب , وارحم كل ميت يا ارحم الراحمين
اللهم احفظنا من شر الكوارث الطبيعية والأفات المريضة ،، سلام قول من رب رحيم ، فالله خير حافظا وهو ارحم الراحمين.

نريمو الف سلامه على بنتك معلش متاخرة لانى بمر بنفس المشكله
روشانا انا ابعث ياجميل 3 ماوس دة كله الا موس العقل والرازنة روشانا
شيماء منورة بجد انا عملت كيسين مشمش غسلت كويس وفصصته وحطيت حبه مياة صغيرن وسكر ونصف ليمون حوالى 2ونصف كيلو وقسمتهم على 3 اكياس
وعملت كيس باميه بعد التنظيف والتقميع غليت مياة فى الكاتل وسقطت البامه مع عصير نصف ليمون وشطفته بالمياة وسبينه يبرد وفى الكيس على الفريزر
يلا كفايه كدة

مساااااء الخير يا بنات

عملا بمبدا ما قل و دل

هقول كلمتين و اجري عشان يوسف عنده اسهال و سخونيه و مغص

يارب استر هنزل بيه للدكتور كمان شويه


اولا:::::::
بالنسبه لبرنامج رولا خرسا كانت مستضيفه نقيب الصيادله تقريبا و قال ان موضوع التاميفلو و الكمامات

مجرد بيزنيس بين منظمه الصحه العالميه و شركه روش العالميه للادويه

و الهدف انها تسوقه للدول الناميه اللي دفعت فيه ملايييييين الدولارات

و اكد ان انفلونزا الخنازير دي اضعف من دور البرد العادي اللي بيجيلنا و شويه ليمون بعسل

و راحه في السرير مع اي دواء للبرد بيقضي عليها

و اكد ان فيه دواء في السوق ثمنه 5 جنيهات بيستخدم كوسيله للوقايه من البرد او القضاء على اي نوع

انفلونزا


لم يقول اسمه بس قال اسم الماده الفعاله و قال ان اي صيدليه هتعرفه

امينتادين

و طلب من الناس انها متشتريش كمامات و تعيش حياتها طبيعي لان كل ده بيزنيس عالي المستوى




ثانيا:::
بالنسبه لمنج ام سوسو فعلا البنت تعبت فيه جدااااااااااا و مكنتش بتنام يعني لازم ناخد الموضوع بجديه

و انا عشان اكون صريحه مع نفسي

اولا هقراه لواحدي بتمعن

ثانيا هكتبلكم ايه اللي مش هعرف اعمله او حاسه اني مش اده

و نشوف مع بعض ايه سبل التشجيع او اكمال الناقص عشان نقدر نلتزم بتلات ارباعه على الاقل


باقي البنات هرجعلكم تاني بس بمعلومه جديده لاني مقدرش اخالف التعليمات و ياريت كلنا نحترم
كلام عرووووووووس لان للاسف الركود تسرب للموضوع



عروس حبيبتي
بالنسبه للجلسرين طبعا انا بضيفه لكريم الوش و بيبقى رائع و بينعم جداااا
و باليل بضيف فازلين مع كريم الوجه و برضه نتيجته تحفه

ممكن تضيفي اي شئ و ميعملش مشكله طالما انه مش حاجه طبيعيه يعني مش ليمون
او زبادي ...لان الحاجات دي لو اتضافت لاي كريم يبقى مش اكتر من اسبوع
و في التلاجه

و على فكره لو ضيفتي شويه ماء ورد كمان هيدي نتيجه هايله ان شاء الله