سرتولي سيلز لا تفقد الامل

السلام عليكم و رحمة الله و بركاته
طبعا انا متابع لهذا المنتدى من سنه 2020 شهر 3 من بدأت مشكلتي و لقلة المواضيع عن مشكلتي حبيت اكتبلكم تجربتي لتعم الفائدة للجميع و عسى اني اكون سبب لتحقيق هذا الحلم.
انا تزوجت في سنة 2018 نهاية شهر 6 و بعد سنة من الزواج قررنا نبدا بالمحاولات للحمل و لكن ما الله كتب شي. و في سنة 2020 شهر 3 قررت انا وزوجتي اننا نفحص. الحمد لله زوجتي سليمه و لكن انا طلعت عندي مشكله اللي هي صفر حيوانات منويه. طبعا لا احكيلكم عن الصدمة اللي حصلتلي و النفسيه تدهورت و الوضع كان مره سيء بالنسبه لي و كان السبب الاكبر اسلوب الدكتور لما علمني النتيجة كان يقول في غيرك كثير ومو نهاية الدنيا تعايش مع الوضع. مع اني مو دكتور لكن مستحيل اني احكم من اول فحص و احطم المريض اللي قدامي ولكن حسبي الله ونعم الوكيل على اللي عطاه شهاده . المهم ما استسلمت طبعا و غيرت المستشفى الى المواساة بالدمام و رحت لدكتور مسالك بولية و عقم وسوالي فحص لهرمون الحليب ( البرولاكتين) و حصله مرتفع و سوالي MRI للراس عشان يشوفون اذا في خلل بالغده عشان ارتفاع هرمون الحليب ولكن الحمد لله الغده سليمه و عطوني حبوب لين نزل مستواه للطبيعي و بدينا من هنا مرحلة العلاج. طبعا اول شي بدأ فيه حبوب ال جنتا بليكس و 5 ابر هرمونيه وحده كل اسبوع و بعدها سويت فحص سائل منوي و صفر للحين . و بعدين قالي استمر عالحبوب بالاضافه الى بودرة الارثمول اخلطها مع ماء و اشرب يوميا كاس. طبعا البودرة لمدة 3 شهور و لمى انتهت المدة سويت فحص و للحين صفر و قالي الدكتور انتهت الحلول العلاجيه انت عندك ضمور بالخصيه و حجمها صغير و الشي اللي انت فيه خلقي . ما قدامك الا الحلول الجراحيه اللي هي خزعه او تفتيش مجهري. طبعا رحت بحثت بالنت ايش الافضل الخزعه او التفتيش لقيت كل كلام الناس للتفتيش لانه يفتش بالمجهر واذا حصل بؤر منويه سحب عشان ما يخرب انسجة الخصيه بعكس الخزعه يسحب عشوائي بعدين يفحص. طبعا دورت ايش افضل العيادات اللي تسوي هالعمليه لقيت عيادة ذرية بالرياض مع الدكتور حمود المطرفي او عيادة سمير عباس بالخبر . قلت بحكم اني من اهل الشرقيه خلني هنا. طبعا الى يومكم هذا متندم اني اخترتها. المهم اني رحت و دخلت على دكتور ذكوره و سردتله قصتي قال انت جاهز للعمليه قلت اقرب موعد قال بعد 3 ايام قلت توكلنا على الله. جيت يوم العمليه شهر 9 من سنة 2020 و كلي امل انها تنجح و يحصلون حيوانات منويه و انا قريت ان العمليه تاخذ من ساعتين الى 4 ساعات. المهم دخلت غرفة العمليات و خلصت العمليه بعد ساعه فقط !!!! حطوني بالافاقة لين قمت ودخل الدكتور وقال للاسف ما حصلنا شيء فتحنا الخصيتين و اخذنا بعض الانسجة للتحليل تعال بعد اسبوعين عشان نعطيك النتيجة. و خلصت الاسبوعين ورحتله قال انت انسجتك سرتولي سيلز فقط يعني بالعربي الفصيح مستحيل اني اكون اب. طبعا النفسيه صارت شانت و دخلت مراحل اكتئاب و فكرة اني انفصل عشان ما اعيش زوجتي هذا العذاب. طبعا زوجتي رفضت تتركني و قامت تشجعني اننا للحين صغار و الطب يتطور و لا تفقد الامل. طبعا زوجتي لها فضل كبير علي لانها الوحيده اللي كانت تعرف بهالموضوع و هي اللي كانت تشجعني و تطلعني من الاكتئاب اللي انا فيه. طبعا بعد العملية بشهر قررت اني ارجع اسوي العمليه لكن هالمره عند الدكتور حمود المطرفي بالرياض. و صدفة بالاستراحة حقت اخوياي كنا 3 قاعدين اخر الليل و قام واحد فيهم يسال الثاني ها شصار مع خويك راح للدكتور ورد عليه ان لا للحين ما اقتنع و قام الاول يقوله انا خويي بالدوام سواها عنده و كانت خصيه معدومه عنده طبعا هنا انا لقطت السالفه و فهمتهم وش يقصدون قلت دقيقه شباب و اسال خويي قلت وش مشكلة خويك و شنو سوا قال سوا عمليه يطلعون منه حيوانات منويه قلت دق عليه قال ها قلت اقولك دق عليه بساله طبعا حنا اخر الليل و قام دق عليه و سالته عن الدكتور و كيف الدكتور قال ان الدكتور فاهم وهو بعد الله السبب اني صرت اب. طبعا هنا ارحت كثير لسببين الاول اني سالت شخص مجرب الدكتور و الثاني و الاهم اني فضفضت للي بخاطري لاخوياي مع اني كنت متحفظ للمشكله ذي. و في شهر 11 من سنة 2020 رحت للرياض عند الدكتور و كان كل طموحي انه يقول في امل بس تخيلو كل اللي ابغاه امل بس. دخلت عنده ووريته كل التقارير و تقرير العمليه قال ان شاء الله خير و قالي ان تقنية العمليه حقته تختلف عن اللي سويتها قبل وانا التقنيه حقته تكون اعمق و افضل المهم قالي كلام ما فهمته و الزبده قال بصرفلك علاجات لمدة 3 شهور و تسوي العمليه بعد علطول قلت تم و احجز موعد العمليه في تاريخ 15-3-2021 و اتوكل على الله . طبعا اخذت عمره انا وزوجتي اول ما فتحو التصاريح للعمره و قمنا ندعي الله انه يرزقنا الذريه الصالحة و اجتهدنا بالدعاء وو كلنا امرنا لله. واسمريت عالعلاج و جا اليوم المرتقب دخلت العمليه وانا خايف ومو خايف و ادري ان هذا اليوم مصيري جدا. المهم دخلت العمليه و بعد ساتين خلصت العمليه وودوني الافاقه و اول ما صحيت الا الدكتور قدامي و الممرضين 2 هنود ما انساهم ما حييت كانو يناقزون من الفرح و يبشروني الحمد لله حصلنا طبعا ما اخفيكم انهرت بالبكاء و حلفت عالدكتور اني ابوس يده و بعد هواش وافق🤣 و الحمد لله حصلو 9 انابيب و من خصيه وحده بس يعني الثانيه ما فتحها ولا لمسها.
الخلاصة
لا تفقدو الامل و ادعوا الله و تقربوا منه و تصدقوا و عسى الله يرزقكم جميعا
والحمد لله في تاريخ 15-12-2021 اصبحت اب لاجمل اميره بالدنيا ❤️