اليوم بكتب لكم سر النكهه الى الكل يسال عنها لكبستى
اولا طبعا انا لا استخدم مرق الدجاج ولا اللحم فى طبخ الرز ابدا
استخدم رز باب الهند او نوع مزه بعد النقع
لازم اسوى حمسه او ماتسمى كشنه فوق الرز ولا يمكن اسوى كبسه بدونها
الكشنه عباره عن بصل ونصف حبه طماطم صغيره مقطع يحمس بدون زيت حتى يميل للاصفرار ثم اضيف الزيت وقطعه زبده او سمنه
بعدها اقلبها واضيف عليها بهارات مشكله
اخلي الكشنه على جنب الى ان يستوى الرز ثم وهنا سر النكهه
بعد مايكون نشف الماء من الرز ادير الحمسه عليه ثم اغرس فيه علوب حبحر وهذي صورتها لاخواتنا العرب
او ممكن شرايح فليفله
بعدها اخذ ليمونه سودء وحده واغسلها واكسرها نصفين واغرسها
بعدها اجيب قرفه واغرسها
واخر شي احط شريحتين ليمون وشريحتين بصل
طبعا شريحتين تكفي والليمون لو فتحتى ليمونه وعصرتى الحامض على السلطه واستخدمتى القشر على الكبسه يكون احسن
بعدها غطيها بقصدير واتركيها على نار هاديه من ثلث الى نصف ساعه
وبعدين شيلي القصدير اذا سمعتى مفاتيح ابو الشباب تقرقع فى الباب وشوفى وش يقول كان فيه عزيمه
طبعا تشيلين البصل الشرايح وقطع الليمون من وجه الرز وبعدين تغرفين الحمسه تخلينها على جنب وتخلين ربعها مع الرز ينخلط
وتغرفين الرز ثم تديرين عليه الحمسه والمكسرات فوقها وبالهنا والعافيه
الموضوع قديم لى بس اعدته من جديد والصور من النت والى بتنقله لاي مكان تتفضل بس تكتب منقول
واذا حبيتوا اقول لكم عن سر نكة اللحم والدجاج فى الطبخ