ســـــــــــاعدونـــــــــــــ ــي بــــــحــــل لمشكــــــــلتي

يتبع يتبع يتبع
بكمل مشكلة امس واسفه على الاطاله
انا والله كنت ناويه على السفر معاه وكنت اقول بيني وبين نفسي بروح مستشفى خاص واذا تطمنت على وضعي ووضع الجنين بأستخير الله وبنسافر لكن امس يوم ثار فجاءه واخذ اللاب توب ورماه وصار يصارخ ويهددني بالضرب بصراحه زعلت وقلت له مستحيل اسافر خصوصا ورب الكعبه ربي شاهد علي اني كنت اتكلم معاه بهدوء حتى لما صار يخاصم ويهدد سكتت وماتكلمت ..
وامس كانت نفسيتي زفت وابكي وادعي ربي انها تنفرج علي كنت متضايقه ليش يتصرف معاي كذا ليش يهنني ومايحترمني وانا كنت اتكلم معاه باحترام ليش ما يقدر العشره اللي بيننا واسئله كثيره كنت افكر فيها ...

واليوم اختي اتصلت علي تبشرني انها حجزت في حمله للحج هي وامي وابوي وبيروحون للحج وطلبت مني اني أسافر عندهم حتى اجلس مع اخواني الصغار خصوصا ان اختي اللي اصغر مني نفاس ومحتاجه احد يجلس معاها
طبعا مشكلتي انا هنا
أبي اتصالح مع زوجي واقول له اني غيرت رأي وبسافر عشان اهلي محتاجيني لكن اخاف يطردني لانه زعلان وجالس بغرفه لحاله
لان بالعاده اذا صارت مشكله بيننا ينعزل ويجلس لحاله شهر وشهرين وحتى لما كنت احاول اصالحه كان يرفض ويقول انا ارضى لحالي وطبعا ماكان يرضى وانا اصبر واتحمل عشان عيالي على الرغم ان مشاكلنا جدا تافهه وفي الاخير صرت اطنشه اقول زعل لحاله يرضى لحاله واخر
مره كلمت اخوي وجلس تفاهم معاه على اسلوبه هذا والحمدلله احسه تغير

الحين انا مادري ارسل له رساله ولا اروح اتفاهم معاه لكن اخاف يعتبر هذا خوف منه وانا ربي عالم اني دايما أتحاشاه واطنش تصرفاته عشان اشتري راحتي وما اخرب بيتي ودايما احاول اقنع نفسي بانه انسان مريض ولازم احاول اتأقلم معاه ودايما اقول انه انسان ربي ابتلاه بسؤ التصرف ومايقدر يتحكم في اعصابه وكل اللي يسويه خارج عن سيطرته لانه يتصرف تصرفات غريبه يعني مثلا نكون جالسين مع بعض ونسولف ونضحك ومافي بيننا اي شئ ومبسوطين شوي يقوم يحط رجله بوجهي ليه ماادري ؟؟ عاد انا يــااغير جلستي او اخذ اللاب توب واطنش حركته او اروح اشوف لي اي شئ اشغل نفسي فيه لاني اذا كلمته وقلت حركته عيب وفيها قلة احترام انا اعرفه بيعاند وبيزيد لكن اقول احتسب الاجر
واطنش حركته البايخه احسن ودايما اتعامل معاه ببرود اذا تصرف اي تصرف يزعجني اقول عشان يحتقر نفسه ويعرف ان تصرفاته تافهه وماتأثر فيني لكن والله لاجلست لحالي بالغرفه ابكي لين ماينتفخ وجهي
والله انا عايشين مثل الاخوان في البيت ماكأننا متزوجين حتى الحركات الحلوه اللي كنت اسويها ماعاد اسويها مثلا كنت استقبله واودعه ابخره وابخر ملابسه واعطر فراشنا ودايما اهتم فيه اهتمام مو طبيعي لكن اذا زعل بسب اي مشكله بسيطه انعزل عنا شهر وشهرين ومايهتم فيني ويهملني ولا حتى يفقدني اخر شئ تركت كل الاشياء الحلوه اللي كنت اسويها لاني احس انه مايستاهل وربي شاهد علي اني حاولت وحاولت معاه بكل شئ وبالعكس يزيد عناد ويعتبر ان كل شئ اسويه خوف منه صرت اتعامل معاه بنفس اسلوبه نهائيا ماعاد اهتم فيه اقوم بالامور الاساسيه فقط وكل اهتمامي وجهته لنفسي ولعيالي وحاولت اتأقلم معا ه واحاول اني اتعايش مع وضعه هذا وتصرفاته الغريبه واحتسب الاجر عند الله
واخيرا انا اسفه على الاطاله لكن والله من حر مافيني كتبت كل شئ بقلبي واللي تقدر تساعدني لاتبخل علي بالحل
الحين انا ابي حل كيف اتصالح معاه واعلمه اني موافقه على السفر طبعا مو عشانه عشان اهلي فقط واذا ارسلت له رساله ويش اكتب فيها وطبعا الحين هو زعلان وحارمنا انا وعيالي من كل شئ حتى من مقاضي العيد وانا ابغى اتعامل معاه بسياسه خصوصا ان اهلي والله طفشوا من مشاكلنا لكن اخاف يقول ان اسلوبه وتهديده جاب نتيجه وخايفه من ردة فعله لانه مايحترمني ولايحترم احد حتى اخوانه ووالدته واخواته يشوفون تصرفاته الغريبه وينصحونه ومافي فايده معاه يجلس يصارخ عليهم ولايحترمهم ووالدي واخوي اكثر من مره يتفاهمون معاه يتعدل فتره ويرجع ألعن من اول
لكن ماأقول الى حسبي الله لااله الا هو عليه توكلت وهو رب العرش العظيم ولا حول ولا قوة الا بالله
لااله الا انت ياربي سبحانك اني كنت من الضالمين
اتمنى تساعدوني وتحصلون لي حل او دعوه بظهر الغيب

ان لله وانا اليه راجعون

ليش توافقين على السفر والمشيمه نازله على بالك الموضوع سهل
نزول المشيمه مره صعب ارتاااحي ياقلبي ووجهك على اهلك
والله يصبرك على زوجك ويهديك

ابحثي بالنت وشوفي اسباب نزول المشيمه
بعدين ياقلبي الزعل والبكي اثناء الحمل مو زينه للبيبي

أشكر من رد على مشكلتي ومن لم يرد
كنت أتمنى اجد عندكم حل او حتى تواسوني بكلمه طيبه :44:

الله يعينك عليه واصبري وربك يفراجه عليك