مشكوره حبيبتي أرت حدسي كان في محله بعد قصدتي الليذر إيسونس الذهبي إن شاء الله لي تجربه قريبه معاه وراح أعطي إنطباعي عنه
عموما عطور السويتات مو كلها بتناسبني مثلا لو خامات العطر سويت و نعومه أو على فخامه أكيد بيعجبني و لو مركز فواكه وااضحه كأنه معسل شيشه بتلاقيني قفزت من البلكونه أبي أهرب هههههه ☺
أما بالإصدار الأول يمكن ما تقبلتي النفحات الجلديه إلي فيه يا أرت

على الرحب ألبيه :icon35:

حورية حتى أنا ماتعجبني السويت اللي ع معسل مثل بنك شوقر وبعض عطور فكتوريا سيكريت.. لكن هذا حسيت فيه نفحة سويتية ناعمة تعطيك شعور بالارتياح مو النرفزة مثل اللي ع معسل..وطبعا مانستغني عن رأيك وانطباعك ياقمر..
وحبيت أسألك عن رأيك بعطر فلورا قوتشي الأسود الجديد..
وفيه عطور ذكرتيها للبنات رحت وشميتها مثل نارسيسو اللي مثل المراية حسيته فيه شبه من n5.. وعطر كارتييه اللي فيه نمر مدري أسد فعلا مميز ومو مألوف.. وبعد شميت عطر من سان لوران من المجموعة اللي ع شرقي أكثر واحد عجبني اللي اسمه سوبريم بوكيه(الباقة الآسرة)..
وحبيبتي حورية أتمنى متى ماقدرتي تعطيني انطباعك عن عطور جو مالون مرة حابة عطورهم وأنا أثق برأيك وذوقك الراقي جدا

^^^
حبيبتي أرت ذوقك بعد بيعجبني بالعطور
بالنسبه لغوتشي فلورا الأسود 1966على حد علمي إصدار محدود بتحسينه أول ما تشميه نفحات فريش تابليه بعدين يهدى و تصير ريحته نعومة ورود و مسك و حدت العطر جات من الفتيفر و الباتشولي
فواح و ثباثه جيد
نرسيسو إيسونس ريحته نظافه و شور و مادري شو ههه فيه شوي حبه من نمبر فايف أو بريمر أكثر شي يسلم لي خشمك فديته ههههه
ذاحين جا الدور عليك تفيديني بعطور جون مالون لأني ما سبقلي جربتها
يمكن لأني أول ما أدخل صالة عطور برا إلا تلاقيني بين رفوف مركات ثانيه يمكن يمكن عيوني ما تطيح عليها بسألك وين تحصلينها حبوبتي؟؟

^
فديتك حورية
جو مالون موجود عندنا بالرياض له فرعين واحد بمركز المملكة والثاني بغرناطة
عطوره تنقسم قسمين قسم العلبة حقته شفافة وهالقسم مقسمينه بعد مكتوب عند كل عطر وش تصنيفه زهري أو فاكهي أو مسك خشبي وهكذا
والقسم الثاني علبة العطر لونها أسود وهذي العطور روائحها شرقية عود وبرغموت وعنبر وهكذا
وعندهم بعد شموع ولوشن
وميزة عطورهم تقدرين تدمجين بين عطرين وتعطيك ريحة مميزة ومختلفة

وأكثر شي عجبني وناوية عليهم بإذن الله عطر من القسم الأول اسمه peony&blush suede والغريب إنه مصنف فاكهي مع إني ماأميل للعطور الفاكهية وتفاجأت إن اختياري وقع على العطر الأكثر طلب عليه لأنه كان مخلص بس رجعوا ووفروه حاليا،، ومن القسم الثاني أعجبني عطر اسمه dark amber &ginger lily
عنبر وزنجبيل راقي هالعطر جدا حتى عجب زوجي،، ودمج لي بين العطرين وطلعت لي ريحة جميلة ومميزة