أم عبودي

أم عبودي @meem_8877

عضوة جديدة

سفرتي المنزلية خفيفة ومشبعة تبغين الصحة والرشاقة تعااالي ياعسل

الأطباق المجربة

السلام عليكم ورحمة الله
كيفكم بنات

بدون مقدمات حابة ادخل في الموضوع على طول
أنا قبل ما أتزوج كان أكل أهلي ثقيل لازم القلي يوميًا ولازم الأكل فيه صلصة وأجبان وكميات سكر وبهارات وزيت وكنت متعودة على هذا النمط من الأكل

و لما تزوجت كنت أطبخ مثل طبخ أهلي بس كنت ألاحظ الرجال صار يتشكى من بطنه وانتفاخات وغازات وحوسة مع العلم إنه يعترف إن الأكل لذيذ مرة بس يقول إنه ثقيل وينفخ البطن

هو متعود عند أهله على الأكل الخفيف لأن اهله اكلهم جدًا جدًا خفيف ، طبعًا بما إن المرأة ( ملكة المطبخ ) 👸
بديت أحاول أسوي الطبخات بس أسوي للطبخة رجيم !!!
تقولون كيييف رجيم للطبخة؟؟
أقولكم إنكم تسحبون أي مكوّن ثقيل في الطبخة تمامًا أو تسحبونه وتستبدلونه بمكوّن خفيف ما يخرّب الطعم أو تغيرون طريقة إعداد الطبخة

وبالمثال يتضح المقال
مثلا الأكلات اللي فيها الصلصة (معجون طماطم) استبدلوها بالطماطم فقط ومثلا الزيت العادي استبدلوه بزيت زيتون، الخبز الابيض استبدلوه بالخبز البر ، لما تمسحوا الخبزة بجبنة سائلة بعدها تحطوا بيض او شكشوكة او … إلخ استبدلوا مسحة الجبنة بمسحة لبنة ،، وابعدوا الجبنة السائلة من بيوتكم جربوا الكيري او المثلثات بالرغم من انها شبيهة جبنة مثل الجبنة السائلة لكن زيتها أقل بكثييييير

ممكن تشترون جبنة أصلية مو شبيهة جبنة بس تلقونها أغلى 💔
بس الصحة وخفة البطن تستاهل والله
الايدااام سواءً اللي خضار أو خضار مع دجاج أو لحم أسويه وأحط عليه كمون وملح فقط ما أحط بهارات لأن البهارات تجيب الامساك ونفخة البطن والمغص والغازات
وطبعًا صرنا ناكل الايدام بالملعقة بدون خبز لأن كثرة الخبز تنفخ البطن

القهوة العربية هذي من خلال ملاحظتي تسبب غازااات لا نهائية فاستبدلناها بالقشر
والشاي عاد هذا عشقنا نحببه مرة مع الفطور وصرنا نقلل منه مرة ونشربه بدون سكر أو نشرب بدائل له مثل اليانسون والشمر والحلبة واحيان نحليها بعسل
القلي ابعدواااا عنه استخدموا القلاية الهوائية أو سووا الطبخة بطريقة التشويح على الطاوة لأن القلي يجيب السمنة والضغط والسكر والغازات والمغص ومشاكل لانهائية يا حبيباتي
الحليب البودرة ابعدوا عنه والله العظيم يا هو يسبب غازات لو تلاحظون تنصدمون من كمية الغازات اللي تجي منه ، اشربوا الحليب الطازج أو اذا بتسوون حليب مع شاي او نسكافيه استخدموا الحليب المبخر
وهكذا انتم ابتكروا بدائل لأي مكوّن ثقيل

والماء يا بناااات الماء اول ما تصحون اشربوا كاستين ماء وقبل اي وجبة اشربوا كوب ماء والله ماعاد يجيكم امساك على ضمانتي

الخلاصة اننا من كثر ما تعودنا ناكل أكل مضر صرنا نحسب إن الامساك والغازات شيء طبيعي وما نتسائل ليه احنا يومين او ثلاثة مانخرّج ودايم عندنا غازات والسبب هو البهارات والصلصات والزيوت والسكريات

طبعًا التغيير اللي سويته أخذ مني ممكن سنة ونص وبالتدريج كل شيء يضبط معكم بإذن الله وفي البداية كنت احس بجوع لأن بطني ماكان متعود على الاكل الخفيف بس الحين خلاص أدنى شيء يشبعني وانحلت عندي مشكلة الإمساك والغازات

وبس حبيباتي أتمنى اكون افدتكم واللي تطبق النظام وتحس بالفرق تدعي لي.
والله يعطيكم العافية 🌹🌸✨🤍
1
621

يلزم عليك تسجيل الدخول أولًا لكتابة تعليق.

تسجيل دخول

زائرة
وعليكم السلام ورحمة الله وبركاتة
الصراحة موضوعك جدآ مفيد
والبدائل اللي ذكرتيها ممكن كثييييير يغفل عنها
بس لو نزلتي الموضوع بقسم ثاني عشان المشاهدات تكون أكثر ويستفيدون ..
الف شكر 🤍🤍