سفرتي لضيوفي مع طريقة حلوياتي تفضلو حياكم الله

السلام عليكم ورحمة الله وبركاته

هذي سفره كانت عندي لضيوف جوني سهره وبصراحه انبسطت كثير معهم ودايم صراحه انبسط معهم طبعا انا كلمتهم انهم يجون ولانهم مو كثير ماتكلفت كثير وبصراحه كنت ناويه ان السفره تكون افضل من كذا بكثير

طيب نبدأ بسم الله



هذي صورة السفره بالنسبه للطريقه اعذروني مامداني أصورها بالتفصيل

اولا التمريه المشهوره بالمنتدى
كيس تمر معجون جاهز بدون نواء
5ملاعق حليب بودره
3ملاعق سميد
باكيت بسكويت مطحون
2ملعقة زيت
علبة قشطه
للتزيين:
جوز الهند
بسكويت مطحون
بسكويت اوريو(انا ماحطيت)
الطريقه:
نحمس السميد والحليب على النار لحد مايصير لونهم ذهبي ثم نضع البسكويت المطحون والزيت ونحرك شوي ثم نضيف التمر وندمجهم زين وبعدين نحط القشطه ونحرك زيييين ثم نرفعها من النار ونتركها تبرد شوي
بعدين نجيب قوالب الثلج ونحط فيها نايلون التغليف عشان ماتلصق او اذا ماعندك قوالب الثلج ممكن تكورينها وتحطينها في ورق البلاسيه ثم تدحرجين ثلث في الجوز وثلث في البسكوت وثلث في الاوريو وترتبينها في صحن التقديم وبالعافيه


الحلا الصغير هو حلا الاخت ام رهف بس عدلت فيه شوي

المقادير:
ط1بسكويت مكسر بس ناعم شوي
ط2ثلث علبة حليب نستله المكثف المحلى
2ظرف دريم ويب
ربع كوب حليب بارد
علبة قشطه
8حبات جبن كيري
ط3(وهنا التعديل)ظرف كريم كراميل
كاسه ونص مويه
ملعقتين بودرة الكاكاو
ملعقتين نسكافيه
4ملاعق حليب بودره
مالتيزرز
الطريقه:
نحط البسكويت المكسر في قاع الكاسات


طبعا انا حطيت صحون صغيره بامكانك استخدامها في الكاسات وبعدين نخلط مقاديرط2 في الخلاط ونضعها فوقها


ثم نتركها تبرد على بال مانحضر مقاديرط3 على النار نخلطها كلها لحد ماتقلب شوي ونطقي عنها نتركها تبرد بس مع التحريك المستمر عشان ماتتشكل طبقه وبعدين نكبها فوق الكاسات ونزينها بحبة مالتيزرز في وسط كل صحن
وبالعااافيه على قلوبكم

بالنسبه للحلى الثالث للاسف ماصورته على حده بس هو موجود بالسفره
ايضا اخذته من المنتدى
المقادير:
ط1بسكويت مبلل بالحليب نرصه بالصينيه
ط2كوب جوزالهند
كوب حليب بودره
كوب سميد
بالنسبه للمقادير هذي لوتنصفونها افضل لاني احسها طلعت اعرض طبقه يعني تحطون بدل الكوب نص كوب
كوب سكر
2علبة قشطه
ط3(8حبات جبن كيري)
علبة حليب نستله
ط4(5ملاعق حليب بودره)
3ملاعق نسكافيه
ظرف كريم كراميل
كوب ونصف ماء
الطريقه:
نحمس على النار الحليب والسميد والجوز لحد مايصير لونه ذهي ونخلطه مع القشطه والسكر طبعا يكون مطحون السكر ونحطها فوق البسكويت ونخلط بالخلاط مقاديرط3ونصبها فوقها وندخلها الفرن لحد ماتتماسك ثم على النارط4لحد ماتقلب شوي ونحطها فوقها بحذر وندخلها الثلاجه تبرد وتقطع وتقدم وبالعافيه

اصابع العروسه
رقاق سويتز او لوزين او فوشيه حق السمبوسه نقصه بالنص يعني تصي الرقاقه قصيره ونحط فيها جبن كيري ونلف الرقاق على شكل مثلث على الكيري وبعدين نلفها رولات ونلصق راسها بعجينة التقفيل ونقليها بعدين نضع عليها حليب نستله وتقدم وبالعافيه على قلوووووبكم

التمر رصيته في صحن بشكل مرتب ورشيت عليه طحينه
والحافضه جابتها وحده من جارتي كان فيها مكرونه
والبسبوسه جابتها وحده من الحريم من جماعتي
والسينابون ايضا وحده من جماعتي جابته
وبلح الشام جارتي الثانيه جابته
والبسبوسه جارتي ايضا الثالثه جابتها
وفيه بسبوسه نسيت مااطلعها ماتذكرتها الا بعد ماصورت جابتها وحده من جماعتي كانت حاطتها في ورق البلاسيه طعمها كان روعه وشكلها يفتح النفس ندمت اني ماصورتها

وفي النهايه ان شاء الله يكون عجبكم شغلي
انا عارفه الترتيب مولحد انا كنت ابيه افضل من كذا بس للاسف مامداني اجهز كويس لهالسهره

لاتحرمونا من ردودكم الموضوع متعوب عليييه