سكت وهذي نهاية سكوتي

السلام عليكم ورحمة الله وبركاته

اخواتي العزيزات .. لولا ان في قلبي معزة خاصة لهذا المنتدى وعضواته لما كتبت مشكلتي .. بالحقيقه حاولت كم مره اني اكتب مشكلتي وترددت ورجعت امسح اللي كتبته لين اليوم حسيت ضاق صدري بما فيه الكفايه .. بالرغم ان هناك من يعيش وحياته مشاكل اعظم من مشكلتي وربنا يكون في عوني وعونهم ....

تعرفون البالون لما يمتلىء وخلاص لاخر حده وبعدها ينفجر ... هذا اللي صارلي كتمت الغضب في صدري 4 سنوات وقبل يومين فجرت كارثه بيني وبين عمتي ( ام زوجي واخت ابوي ) استغفر الله العظيم يوم اذكر اتنهد بقوه .. انا اقولكم حكايتي ... انا عمري 22 سنه كان طموحي في المدرسه اكون من اوائل الدوله .. وكنت شاطره .. وخلاص حاطه في بالي دراستي اهم شي ... ولما انا في الاعداديه تقدم لي ولد عمتي .. اخو زوجي حاليا وهو بالاساس توأم زوجي ... على العموم ما كنت احبه وكنت حاطه في بالي صغيره وابغي اكمل دراستي فرفضته وصارت مشاكل كبيره بالنهايه عدت على خير... بعد سنتين وانا في الثانويه تقدم لي الثاني التوأم .. وبصراحه ومن انا صغيره كنت احبه .. على العموم وافقت .. وكانوا ضاغطين علي اتزوج قبل ما اتخرج من الثانويه قلت لهم مستحيل .. وقلت لهم ابغي اكمل الجامعه ابوي عصب علي وقال الثانويه حدج وانتي وبشطارتج لما تكونين عند ريلج اقنعيه يخليج تكملين الدراسه ... هنيه تحطمت آمال وقلت اصبري غيرج حليلهن ما كملن الاعداديه على الاقل شهاده ثانويه اهون من لا شيء .. طبعا من تجهيزات العرس وانا في حاله يرثىى لها ... خواتي الكل لما يذكر عرسه يستانس انا لما اذكره شقول بس لا حول ولا قوة الا بالله كان مهزله والله العظيم .. العرس نفسه قصه بحد ذاته ما راح ادخل في التفاصيل ...

على العموم كملت حياتي العاديه اللي كانت وللاسف معظمها مشاكل .. من خلال الايام كانت تنمو مشاعر فيني ( كآبه ... قهر .. خاصة لما اشوف واسمع صديقاتي لما يتكلمون عن الجامعه ) غير ان البيت مزحوم 3 متزوجين ومافي عندنا شي اسمه اجنحه البيت كله على بعضه زحمة مرور ودوشه في بداية السنه كانت كل وحده في المتزوجات تحس انها مظلومه لانها تشتغل اكثر من الغير .. ف قلبنا السالفة ادوار .. وبانت الحقيقه ان انا اكثر وحده تشتغل الطامه الكبرىوالله يا بنات .. وربي شاهد على كلامي يوم القيامه ان همي الاول والاخير في شغلي لا عيالي ولا زوجي همي عمتي لاني اعرف زوجي مقدرني ويحبني ويعرف اني مظلومه بس عمتي كانت كل ما قصرت وحده جمعتني معاها يعني انا اشتغل واتعب اكثر من غيري واقصر في عيالي عشان محد يعاتبني .. وبالاخير يكون حالي حال الباقيات ؟؟؟!!!!! والله ما تكلمت سكت ويا ريتني ما سكت وما كتمت اللي في صدري .. على العموم صبرت وكنت اظلم نفسي قبل ما يظلمني غيري ... ومع الايام تتطور المشاعر اللي داخلي خاصه اني اشوف ابوي مهتم في اختي الصغيره وحالف ما يزوجها قبل ما تكمل جامعتها وموفرين لها الامور الماديه اللي انا كنت محرومه منها المعنويه ما قصرا فيني والله اني اشهد حبوني بس قصروا معاي كثير على العموم لما اشوفهم كيفهم ما اختي ... ولما جبت عيالي وتعرفون الامومه كثر ماهيه حلوه كثر مافيها مراره وكأبه خاصه اني قريب جبت الثانيه من 4 اشهر تقريبا وغير المشاكل الزوجيه الطبيعيه اللي تحدث مع اي زوجين في العالمين .... تخيلون كل هالكلام صار ما بين وانا 18 الين 22 من عمري يعني احس ثقل على ظهري ما كنت في يوم اتوقع اني بقدر احمله وهاللي صار ما قدرت احمله.. قبل ما تحصل الكارثه اللي صارت جتني فترة كآبه كبيييييييييره لما عرفت ان صديقاتي تخرجوا واتخيلت نفسي اني تخرجت في هالسنه :( والله جتني غصه ادري ان لو باب من ابواب الشيطان .. بس والله مو بايدي احاول استغفر ربي واتحمد على كل حال .. بس .... !!!!!! على العموم جاء اليوم المنتظر وكان ولدي مب طايع يا كل وانا من الغصه ضربته قلت له كل تراك بتموت علي ولدي الكبير قام يصيح وينادي عمتي يدوه ويت جان تقول خليه ما بياكل .. قلت لها ما اكل شي من الصبح قالت لي هاتي بياكل وانا اعرفها تشيله واتسكته بلبان وهالشي مضر وما احبه على العموم قلت لها الله يخليج يا عمتي تراه يدلع عليج خليه وبيسكت وبياكل .. قامت صارخت علي وواجعتني وقالت لي اني اكرها واحرم عيالي منها مع ان والله العظيم اني ما احرمهم منها بالعكس الصبح اذا فيني نوم وما قدرت انش ونش ولدي الصغيرون اطرشه ليدته .. او اذا ظهرت وما بغيت ولدي الصغيرون يتعب هديته عندها بذمتكم هذا انا احرمها منهم ؟؟؟!!!!! المهم
دعت علي انواع الادعيه والله لو اذكرها بتقشعر ابدانكم ( بالموت .. ووان ريولي تنكسر .. وان الله لا يرضى علي ووووو...) وانا ساكته بالاخير قالت على شو معصبه على الشغل اصلا ولا وحده فيكم تشتغل هنيه هاللحظه انحطت الابره على البالونه ما حسيت بنفسي الا صوتي ارتفع .. وقمت اقولها كلام شقول يا بنات كلام مظلوم طلع اللي في قلبه .. وقلت لها انها ظالمتني ولعنت الساعه اللي تزوجت فيها ( مع ان والله يا بنات احسد نفسي على الزوج اللي رزقني فيه ربي ولكن ...!!!! )

ومن هنيه والله يا بنات شهدت حياتي كثير من المشاكل بيني وبين عمتي بيني وبين غيري .. ولكن مثل المشكله الاخيره .. كبيره كانت على العموم حرمت علي بيت ريلي .. وكنت بتصل في ابوي يردني البيت وعصبت واتفجرت الامور .. وهيا قالت لي خلاص ما بينا شي يجمعنا لا دم ولا ولدي خذيه شليه لج واطلعي .. قلت لها هذا ولدج وانا ما اخذ الولد من امه نسيتي اني ام ....على العموم حبيت بس افهمها ان لو سمحتي يا عمتي اذا في مشكله وياج ويا اي وحده فينا حنا الثلاث سيريلها وكلميها ليش تظليمن الباقيات تقول انا ما بكلم وحده ووحده لا .. قلت لها ليش قالت ليش اصارخ على وحده ووحده لا قلت لها لان هالوحده مقصره والباقيات لا .. .قالت لي انا قلت لج لا تسوين شي اكثر عنهن ولا تشتغلين الا مثلهن قلت لها انا ما اشتغل عشانهن .. انا اشتغل عشان اكفي الشر وما ابغي حد يعاتبني او يواجعني
حاولت افهمها.. ووالله يا بنات ما فهمت .. في النهايه وحده من اللي متزوجات في نفس البيت هدت الموضوع وانا تأسفت لعمتي اني عصبت ورفعت صوتي وقلت لها بس كل كلمه انا قايلتها من كل قلبي انتي ظالمتني ولين الحينه ما نتكلم انا وياها واحس اني عايشه بضيييييييييييييييييييييييق مره لما اذكر اللي صار لان محد يحب المشاكل
انا كلمت ريلي بكل اللي صار .. ما احب اخفي عنه اي شي .. وقالي انتي قلتي اللي في قلبج وهيا تحكم نفسها بنفسها .. وقلت لها ابغيك تسامحني لاني لعنت الساعه اللي تزوجت فيها في لحظة غضب وقالي ما عليه (مو معناة اني اقوله يعني روح لامك وخذ بحقي .. لا مجرد اني اقوله اللي في قلبي بدون انه يسوي اي شي وهاللي اتفقت وياه اني اسويه خلال هال 4 سنوات .. وللاسف ما فادت بشي )

.. وبعدها بثانيتين حاول يضحكني ( يفداه قلبي ) لان ويهي انتفخ من كثر الصياح .. طبعا كل الدفان اللي صار بيني وبين عمتي والرياييل في الدوامات محد ...

الحين يا بنات ..اعرف في قرارة نفسي اني غلطانه لاني رفعت صوتي عليها .. بس ما قدرت اتحكم بنفسي في ذيج اللحظه .. وانا تأسفت لها في النهايه لاني رفعت صوتي مش لاني تكلمت

ولين هاللحظه ادخل الحمام واحس ان بيصير فيني انهيار من كثر الضييق والتفكير .....لو انا ابنت الحين ما كنت شليت هم ما كنت بتحمل مسؤوليه كنت بستانس بذاكر لجامعتي عندي حريه اكبر ويا صديقاتي .. عندي مشاكل بس مو بكبر اللي يصير لي وانا متزوجه .. استغفر الله استغفر الله الحمدلله على كل حال ..

يا بنات لو وحده غيري شو كانت بتسوي .. ويا عمه ما تفهم لو حاولتي تفهمينها ؟؟؟؟!!!! انا ابغي اطنش بس ما اقدر كل يوم لازم اصيح ....:(
مع العلم ما اقدر اطلع بسبب ظروف زوجي الماديه بس اذا الله اراد وهانت الامور عليها بعد سنتين نطلع :(
اسفه اني طولت عليكم مع ان والله بغيت اقول اكثر واكثر بس مو حابه اصير ثقيله مره

احبكم في الله :26:
اختكم ام نهيان :26:
ادعوا لي يا بنات بان الله يصبرني