سلامي واحترامي لكل من سأل عني ..قصتي بالداخل والجزء الثالث والاخير

انا معكم من جديد
تكملة القصة والجزء الثالث والاخيييييييييير..........
..........وصبرت لغاية ما جاه الصبح وطلبت من الممرضه تفك عني اشيائهم
.. كان زوجي وصل
وقال :على وين؟قلت اريد اروح عند الصغير الحين مشتاقة و متلهفة عليه خاطري
اشوفه خلاص ما فيني صبر قال:توني جاي من عنده وكل شي تمام...
ارتحت وفرحت وقلت: ...يالله حصل خير المهم هو كيفه الحين؟؟
وبدوا يعطوه حليب او لا؟؟ ((ما كانوا يعطوه حليب في البدايه))قلت:
الحمد لله طمنتني انا كل الليل جالسه افكر الحمد والشكر..طيب خلنا نروح عنده
(هو يحاول تهيئ الموضوع وتبسيطه)..قلت يالله نروح له وهناك بنسأل الدكتور
(هو كان خايف اسأل اواستفهم من الطبيب قبل ما يخبرني بنفسه)
قال: خير خير ان شاء الله وبعد شوي بنروح له وكلها مجرد شكوك!!والعلم عند الله
وقلت:هو انت مخبي عني شي خبرني اكيد تعرف شي وما تريد تخبرني..تكلم
خبرني الحين يالله ارجوك انا اصلا حاسه وطول فترة
الحمل كنت اقول لك (حاسه ان فيني شي ما هو بطبيعي ..بس ما اعرف وش
هوتذكر؟؟تذكر) وقال :اهدي شويه واستغفري ربك ومافيه الا العافيه...
وصدقيني السالفة ما تستاهل واصلا انا متفائل خير وهو فعلا كان مستبعد أي شي..
يقول اكيد مجرد شك (سبحان الله الانسان يستبعد وما يتوقع شي الا بعد حصوله)
قلت :وبعدين يعني شو؟؟ انا ما فهمت شي منك وضح لي وانت تقول انه طبيعي
((وانا في هاللحظة كنت متمددة عالسرير)))وهو يلمح لي...
وسكت عشان اسمعه وانا كنت اترقبه وانظرله وساااااااكتة ..
لا حس ولا نفس وقال:يقولون يمكن يعني... ماهو بأكيد ...
..يعني...شويه غير يعني يمكن يمكن... يكون من
اطفال....................!!!!!!!(في هاللحظة نطق تلك الكلمة)
و سمعته وفتحت عيوني وسكت سككككوت...وانربط لساني...وحطيت
ايديني الاثنين علي فمي.... ونظرت له نظرة طويلة وحولت نظري بعيد
عنه وللجهة الاخرى صوب الارض.. و من شدة الصدمة ما عرفت
ايش اقول اوايش استوى فيني والله احساس...يعني حتى القلم والكلام
ما يعبرون عنه..لو اقولكم اني تجمدت.... لو اقولكم اني
تكهربت... نصدمت...توقف الدم بعروقي... لفت الدنيا فيني...دخت...
كان وقع الكلمة علي كالرصاص... كالرعد..
كوقع الجبل عالراس كالسيف القاطع كالنار الحاميه...
ما اعرف كيف اعبرلكم وما اني بشاطره بالتعبير... وما عرفت كيف
صحيت من الصدمه(وانا ما زلت فاتحه عيوني يعني ما اغمى علي طبعا
لكني مزهوله ..مصدومه) وبديت ابكي وابكي وابكي
وبالصوت العالي وقلت له: ولدي بيكون من.......!!!!
اااااااااااااااه يا ربي ليه ليه كدا.ااااااه ...اعذروني والله ماني قادرة الفظها ....
كيف اكتبها؟؟اسفه اسفه والله ما اقوى عليها..في ذيك اللحظة كرهت نفسي
وحالي..كرهت كل شي حولي كرهت الناس وقلت ما ابغى حد يجيني ما ابغى
حد يجيني وقمت اكلم نفسي وبالصوت واقول: وحق من الورد هذا والحلويات
والهدايا قومي وارمي كل شي من حولك قومي ويا فرحة ما تمت..
وجيت ابشره بالولد ويا حسرتي ....ما اريد شي ما اريد شي..حق من هذا كله ؟؟
قول لي ..ما اريد شي ..ما اريد حد..ودني الحين الحين عنده.. ودني خلاص انا
بسير عنده بنفسي(كنت بعدني مدوخه من اثر العمليه وماني بقادره اقف)
وما قدرت اقف بروحي ابغاه يساعدني وتميت جالسه رجولي ما تشيلني اصلا


وقلت يا ربي ليتني مت قبل ما اعرف ليتني ما عرفت ليتهم من اول
خبروني ... توقعت كل شي الا الشي هذا ابد
ما توقعته..يا ربي كيف بتكون حياته وكيف بتكون حياتي معاه وحياة اخوانه
(عندي 6عيال)كيف امشي فيه بالشارع والناس تناظرني
وتناظره كيف اخبر اهل زوجي ومعارفي والناس كلهم يسألون ومن بداية
الحمل ...ها حامل!!!بنت ولا ولد؟والحين بشنو اجاوبهم؟؟ولااخلهم يشوفون بنفسهم؟؟
وكيف بتكون نظراتهم ؟؟وكيف بتمالك نفسي يوم اشوفهم جالسين يشوفونه وتميت على
الحاله ذي وطبعا هو واقف جنبي ويهديني ومسك ايديني وكانت ايديه مبلله من دموعه
مسكني و وضع راسه فوق راسي وقال لي:الله يخليكي لا ضييعين الاجر اصبري
واحتسبي وقام يقولي احاديث عن الاجر والمصيبه والبلاء و..و...و..
ويقول ارجوكي اهدي اهدي لا تزيدين علي ..وانا بعد تعبان وهو انتي تحسبيني فرحان
وما فكر فيه.. الطفل هذا من الله ولازم نرضي ونحمده ونشكره يريد يختبرنا
هذا امتحان لنا وطبعا ما قدر يمسك نفسه وانا بين ايديه وراسه على راسي و قام يبكي
ويبكي معاي وجلسنا نحن الاثنين نبكي وبالصوت ونحمد الله ونشكره ونبكي ونحمد الله
ونشكره على ما عطانا ومن يومها ساكت ما يتكلم بموضع الاعاقة بس يحمد الله ويشكره.......
.يا خواتي الغاليات....اريد اقولكم ان الله اعطانا طفل من
(( ذوي الاحتياجات الخاصة)) يشهد الله اني جالسه ابكي في هاللحظه ...
لحظة... وكلمه... صعبه لما تحمله من معاني ..عزيزاتي:يقولون العيال هذيلا بيكون
عندهم ضعف عام بالعضلات....قصر بالاطراف. ..اعاقة التأخر بالنمو والادراك.
تأخر بالنمو العقلي والمعرفي والشكلي( والله واعلم)بمعنى اوضح...
كل العيال بتكبر ولدي بيتأخر عشان يكبر(والعلم عند الله)وكل
الاطفال بيطووفون ولدي بنموهم ومشيهم واكلهم وحبووهم ودراستهم
واستيعابهم وكل كل شي ولدي بيكون توه الناس...كل الاطفال بتروح
مدارس عاديه ولدي بيروح مركز تأهيل
فكروا معاي...انا ايش قلت في بداية القصه؟؟
قلت اريد ارتاح من الانجاب.. تعبت وصار الوقت اللي اهتم في زوجي وبنفسي وعيالي
واشوف طلباتهم من غير عصبيه ومشاكل عارفين ايش يعني اريد ارتاح ..
(علما بأن مازال عندي عيال صغار في البيت)وسبحان الله اعطاني
طفل... الشغل معاه وفيه ما يخلص من اكل وشرب وحمام ولبس( والله واعلم)
وما زال املي برب العالمين كبير وما يئست وموكله امري لله سبحانه
وتعالى..عل وعسى ربي يأجرني انا وزوجي فيه حتى لو الناس المقربين لنا
شمتانين فينا وفرحانين ..بما اصابنا.. وطبعا طلعت من المستشفى بعد ما
جلست فيها 10 ايام تقريبا ويوم خرجت منها كان كل شي كان مثل ما
هو بس انا اللي غير.. خالية الايدين طلعت وراسي بالارض ما هو من الخجل
بل من الثقل والحزن ومواجهة الناس والرد على اسئلتهم... وما شفت غيرظلام..
الدنيا سوده وما يدرى فيني غير ربي كيف قضيت هالايام ..كانت الممرضات
يجلسون جنبي وقلبهم يتقطع علي لان كانوا كل ما دخلوا علي صبحا ومساء وفجرا
وبأي وقت يحصلوني جالسة ابكي وابكي حتى انهم ما كان لهم نفس وقلب ياخذون من
عندي حلاوه (شوكولا)وغيرها ويقولون نامي شويه ليه للحين ما نمتي
اقولهم في قلبي :خيطوا عيوني لين ما تنشف دموعي ونسوني ما جرى لي لو تقدرون
بعضهم كان يبكي معاي( اتصوروا حتى الدكتوره نفسها بعد..... )
((صدمه صدمه بكل معنى الكلمه))ويوم وصلت البيت ودقيت الباب ...
ويا عمري عيالي بروحهم فالبيت وفتحولي ...
ويصارخون ماما جت ماما جت وقاموا يطالعون يمين ويسار
ويسالوني امي وين النونو نبغى نشوفه وين خليتيه وهكذا....
بعد مره فكروا معاي يا خواتي الغاليات.....
لو الله اعطاني الطفل هذا ضرير وما يشوف؟؟لو كان ما يسمع ابد ؟علما بأنهم
يقولون ان سمعه يمكن يكون قليل.. لو كان بنت وما هو بولد؟؟
لو كان مشوه لاقصى درجات التشوه؟؟لو كان ما يقدر يمشي ابد؟
لو كان اول طفل لي؟؟لو توفى وهو في بطني وانا ما ادري؟الا بعد فوات الاوان؟؟
لو جاني طفل سليم ومعافى وتوفيت انا واتيتمت عيالي ؟؟لو مت انا وعاش هو منو كان
بيهتم فيه؟؟لو توفى زوجي في هاليوم ؟؟؟لو الله خذا مني حد من عيالي اوكلهم
بحادثه ما ؟؟وجاني طفل مثل القمر ومعافى؟؟ عرفتوا ايش بغيت اقولكم من البداية ؟؟؟
عرفتو وش هي حكمت رب العالمين ؟؟؟يا ليت ما حد يقول اريد بنت!! لا لا اريد ولد!!
اريد طفل ابيض!!!لا لا اريده اشقر!!!اريده متين!!لا لا اريده ضعيف!!
خلنا نحمد ربنا ونشكره على نعمه علينا اللي لا تعد ولا تحصى ..وطبعا ما اكذب
عليكم ما زلت متأثره وخايفه من الغد ودايما في حالة شرود وتأمل وتفكير ناسيه نفسي
وبيتي وعيالي وصابه كل اهتمامي ومسؤوليتي علي هذا الطفل وكل ما نظرت له احس ان
قلبي وصدري بينفجر من القهر ومتحسره يا بنات وخاصة يوم اطلع فيه عالعيادات
وغيرها احس بنظرات الناس واموت حسره ويوم اشوف حد شايل عياله ..ابعد عنهم
عشان ما يحسبوني حسوده ..وهذا هو سبب تأخري عنكم بالمنتدى ..خفت
انكم تخافون على عيالكم مني لان كلنا كنا متابعين بعض وللي تولد وللي على وشك
بصراحة خفت عليكم ..ولان الله اعطاني طفل مختلف عن البقية(( ونعم العطاء
اللهم لك الحمد والشكر استغفرك واتوب اليك)) والحين حسيت بمعاناة الناس اللي سبقوني
وفهمت مدى مشاعرهم واحساسهم... فعلا ... الله يكون بعونهم وعندي الكثير بعد لاكن
ادري باني طولت عليكم وانا اسفة جدا ومجددا ..انتهت القصة لاكن ما انتهت معاناتي
ومعاناة من سبقوني... الصفحات ما تكفي لكن انا اكتفي من الكتابة لاني طولت عليكم كثير
ارجوا منكم الدعاء لكل اطفال العالم المسلمين المعاقين ولطفلي بأن الاعاقة تكون خفيفة علية
والسلام عليكم ورحمة الله