سلام عليكم

بفترة الرضاعه سهل ان جسمك ينحف
لكن ركزي على نوعية اكلك
يعني ابعدي عن المقالي والسكريات والنشويات لانها تسمن الجسم وهو خلقه مجمع دهون من الحمل
اكلك خليه عباره عن بروتين حيواني مشوي بالفرن او على النار بالطاوه مع ملعقه وحده زيت زيتون الكميه قد كف اليد سواء سمك او دجاج او روبيان او تونه او ستيك لحم او حتى بيضتين الى ثلاث بيضات
وحطي جنبه كوب الى كوبين احد انواع الخضار الغير نشويه مثل الكوسا الباذنجان البروكولي القرنبيط الباميا اللوبيا الخضراء كل يوم اختاري نوع واطبخيه سواء على البخار او مشوي بالفرن او ايدام مع اللحم
كذلك مع كل وجبه ضروري تحطين لك طبق مليان سلطه خضراء وكل يوم نوعي مره جرجير او فجل او خس او سبانخ او بقدونس وكزبره مع خيار وممكن تضيفين بصل اخضر وفليفله بارده وعصير ليمون عشان تحسين ان السلطه لذيذه
واكيد انصحك بالشوربه سويها بالخضار ومرق اللحم او الدجاج واذا حسيتي برغبه بالاكل خذي لك منها كوب الى كوبين
وممكن مره باليوم تاكلين 3 ملاعق رز < واذا تبين النحف اكتفي بالخضار الغير نشويه فقط
او كلي الرز 3 مرات بالاسبوع فقط
كذلك الخبز باليوم اكتفي بربع رغيف او 2 توست او 1 صامولي يكون بر
وعشان ماتحسين بالحيره والملل جهزي لك وجبات مسبقاً واحفظيها بالثلاجه وكل ماجعتي كلي منها
ثلاجتك لا تفضى من السلطات والشوربه هذول لو تاكلين منهم كل ساعه سعراتهم الحراريه قليله مايسببون سمنه
كذلك الخضار الغير نشويه ماتسمن اذا اكلتيها بدون دهون لحد الشبع
وفي بديل للرز ممكن تسوينه عباره عن قرنبيط افرميه بمحضرة الطعام ثم شوحيه على النار بملعقه زبده او زيت زيتون مع توابل حسب ذوقك وملح وغطيه على نار هاديه يادوب 5 إلى 10 دقايق ويكون ناضج بالبخار .
حتى الخبز في بديل له عباره عن 3 بيضات افصلي الصفار عن البياض ، واخفقي البياض الى ان يصير مثل الكريمه منفوش ثم اخفقي الصفار مع ملعقه جبن كريمي او جبن كيري وملح وممكن تضيفين نكهات حسب الرغبه مثل اوريغانو واخفقيه كويس ثم ابدأي امزجي البياض بالتدريج مع خليط الصفار بالجبن وحطيه بصينيه مغطيه بورق الطبخ ومدهونه وصبيه بمغرفه او فنجان او كوب صغير على شكل دوائر بينها مسافات ومباشره حطيها بالفرن الساخن وكلي منه مع الفطور او العشاء كبديل للخبز
حتى القرنبيط المفروم تقدرين تخترعين منه بديل عجينة البيتزا تاخذين القرنبيط المفروم تحطينه بالمايكروييف يادوب 3 أو 5 دقايق يطرا ثم اعصريه عشان يتخلص من السوائل ثم اتركيه شوي يبرد ثم اضيفي له بيضه وربع كوب جبن موزاريلا اضربيهم بالخلاط او بالشوكه مع رشة ملح واوريغانو للنكهه او بودره ثوم وبودرة بصل واعجنيهم مع القرنبيط ثم افرديها بصينية الفرن المدهونه على شكل دائره او مستطيل ثم دخليها الفرن 10 دقايق الى ربع ساعه ثم طلعيها وادهني الوجه بصلصة بيتزا وشوي قطع دجاج مطبوخ وفلفل بارد وفطر وزيتون ورشه خفيفه جبن موزاريلا او شيدر ودخليها الفرن هذي البيتزا بتكون مشبعه لان فيها ألياف من القرنبيط ممكن تسوينها اكثر من قطعه وتبردينها بدون حشوات البيتزا اللي فوق وكل ماحسيتي انك محتاره وش تاكلين طلعيها وحطي فوقها اللي تبين اجبان او خضار او لحوم وكليها وحتى تقدرين تسوينها رقيقه وتخبزينها ثم تستخدمينها مثل التورتيلا
ولا تستعجلين على نفسك توك 3 شهور من الولاده انتي وزوجك لازم تراعون هذا الشي الوحده جلست 9 شهور من حملها هرموناتها ملخبطه ومتكدسه الدهون للجنين لازم تنتظرين على الاقل 6 شهور مع الاكل الصحي والمشي يومياً وكثرة شرب الماء
ولا تقسين على نفسك لانك مرضعه ومحتاجه تغذيه عشان كذا ابعدي عن اللي يسمن على الفاضي وركزي على اللي يغذيك ومايسمن مثل ماوضحت وبإذن الله تلاحظين الفرق على جسمك من اول شهرين

ابعدي عن كل ماهو دسم واكثري من شرب الماء ولا تنسي التغذية الصحية عشان رضيعك لانك مرضع

الله يسعدكم