موضوعي الثاني دا من سلسلتي للعناية
موضوع بسيط
جمعت فيه وصفات طبيعية وليست دوائية
وصفات طبيعية مافيش منها أضرار
مش معنى إني طبيبة جلدية إني أتعامل فقط بالأدوية الطبية فقط
لأني ماقدرش أنكر فايدة الوصفات الطبيعية وإن كانت بطيئة وضعيفة لكن فيه بعض الحالات برشح ليها وصفات طبيعية
ميزة الوصفات الطبيعية إنها أأمن مادام مافيهاش مواد مضرة
لأن فيه عضوات بتحط وصفات وخلطات كريمات مضرة بالببشرة جدا وضررها أكثر من نفعها
فلازم نعرف ايه الحاجات المهمه في الوصفة علشان أخليها للعناية أو للترطيب أو للتفتيح ومن غير ماتكون مضرة
فالهدف العناية بالبشرة والحصول على بشرة نضرة ونظيفة سواء بإستخدام أدوية طبية أو وصفات طبيعية
أنا مش خبيرة في الوصفات الطبيعية لكن أنا من باب تخصصي هاقول ايه المواد الطبيعية المفيدة للبشرة وايه المضر وايه اللي بيرطب وايه اللي بيفتح ومش معنى إني طبيبة جلدية إني تكون علاقتي بس بالأدوية
يعني مثلا
للترطيب وأساس أي مرطب مادة الجلسرين السائل من أحلى وأفضل المرطبات للبشرة ولليدين بس لازم يكون مخفف بماء لأني حامي شويه على البشرة وومنوع التعرض للشمس وانتي حاطاه
وهكذا
طبعا الموضوع هايكون متجدد وأي وصفة اعتمدتها وشوفت فايدتها للبشرة سواء عليا أو على غيري أو على مريضاتي اللي بيستشيروني وبنفس الوقت تكون مش مضرة هاكتبها هنا بإذن الله
لازم نعرف حاجه قبل ماعرض عليكم الوصفات
إن الوصفات و الخلطات مفعولها بطئ ومؤقت وبيحتاج استمرار مش زي الكريمات الطبية
يعني بتحتاجي استمرار علشان تحصلي على نتيجة واضحة
زي مثلا وصفات التفتيح الطبيعية مش هاتبيض لكن هي هاتفتح لون البشرة وتصفيها وتوحدها وتزيل شوائبها وتعطيها رونق وبتحتاج استمرار علشان تظهر النتيجة المرضية
كمان حاجه الوصفات الطبيعية فعاليتها مش بكثرة المكونات
بالعكس خللي وصفتك عباره عن 3 أو 4 مكونات بالكتير
علشان بشرتك تقدر تستفيد فعلا من المكونات
مش هاطول في المقدمات
نتكلم على طول في الوصفات الطبيعية المفيدة واللي مافيش منها ضرر واللي دايما بنصح بيها وهاتلاقوا منها بإذن الله نتايج رائعة جدا
قبل ماقول على الوصفات لازم أنبه على شئ مهم جدا للحصول على بشرة جميلة وهي
شرب الماء و أكل الخضروات والفاكهة و عدم التعرض للشمس و الترطيب المستمر
لازم يكون ليكي 8 كوب ماء باليوم على الأقل ولازم يكون ليك 10 حبات خضار وفاكهة زي ماتحبي مثلا 5 خضار و 5فاكهة
عدم التعرض للشمس حتى لو بالشتاء لازم تحطي واقي من أشعة الشمس وتحطيه كل 3 ساعات وانتي بالخارج
ودي نصيحة كل الدكاتره دلوقتي بينبهوا عليها أول لما بيتكلموا
..الوصفات..
**وصفة مغلي قشر الليمون والبرتقال **
وصفه مفيدة لتصفية البشرة وإعطائها رونق ومافيش منها ضرر
تجيبي قشر برتقال مغسول وقشر ليمون مغسول وتحطي عليه ماء مغلي وتتركيه ينقع ويبرد وتصفيه وتحطيه في بخاخ وبالثلاجة
دا تونر طبيعي للبشرة
بس انتبهي ماتتعرضيش للشمس وانتي حاطاه يعني مافيش خروج بيه
** وصفة عناية بالبشرة وإعطاء رونق لها **
لوشن الحليب بالعسل
اللوشن دا رائع جدا للبشرة وفعلا بتحسي بالفرق من أول استخدام وبيأخر التجاعيد وبيعطي رونق للبشرة لازم تجربوه كلكم
3 ملاعق صغيرة ماء
1 ملعقة صغيرة عسل
كوب حليب
صفار بيضة واحدة
نضع الماء مع العسل ونذوبه على نار هاديه ثم نبعده عن النار ونضيف الحليب وصفار البيضة وتقلبيه كويس
وطبعا يوضع بالثلاجة
وتمسحي بيه بشرتك كل يوم وتتركيه لمدة 10 دقايق واشطفيه بماء فاتر أو لو تقدري تنامي بيه وتشطفيه الصبح
=-=-=
من المواد اللي بحب الأخوات يداوموا على استخدامها هي
(( العسل - الليمون - البرتقال ))
الثلاث مواد دول مهمين أول للبشرة كتغذية وتنظيف وتفتيح فحاولوا دايما تحطوهم في أي ماسك طبيعي بتستخدموه
** للتجاعيد **
زيت اللوز وزيت جنين القمح = فيتامين E
ودا مهم جدا لتخفيف تجاعيد البشرة
واستخدامه كالتالي
قبل النوم تحطي نقاط خفيفه من زيت جنين القمح أو زيت اللوز الحلو أو كبسولة فيتامين E من الصيدلية
وممكن لأن كبسولات فيتامين E بيكون الزيت فيها ثقيل فممكن تخففيه بنقطتين من زيت اللوز
وتدلكي بيها بشرتك بحركات دائرية قبل النوم
الوصفة دي مهمه جدا للبشرة وللحفاظ عليها من التجاعيد
كمان ماسك الليمون فقط هو بيلسع شويه بس محتمل إلا لو البشرة حساسة وبتلتهب من الليمون فبلاش تستعمله
** ماسك لتوحيد لون بشرة الوجه وتغذيتها **
ماسك اللوز المطحون
3 حبات لوز مطحونة ((ينقع في ماء دافئ لتسهل تقشيره ثم يطحن))
ملعقتين حليب
نقطتين ليمون
**ماسك لتفتيح وتغذية بشرة الوجه **
3 حبات لوز مطحونة
بياض بيضة
ليمون
يوضع على البشرة حتى يجف ثم يشطف بماء فاتر ويراعي عدم تقشيره لأنه بيكون لازق على البشرة وبيشد جامد
طبعا فيه وصفات أخرى لتفتيح لون البشرة
أي وصفة تفتيح لازم يكون فيها واحد من المواد الآتية :
(( الليمون أو الدقيق أو البرتقال أو الزبادي ))
على المدى البعيد الليمون لأنه حمضي بيفتح
والدقيق فيه مادة على المدى البعيد بتفتح
والبرتقال حمضي وبيفتح وبيعطي رونق للبشرة وبيورد الخدود
الزبادي واللبن حمضي وفيه حمض اللاكتيك اللي في اللبن ودا حلو ومنعم للبشرة ومنظف وبيفتح لأنه حمضي على المدى البعيد
دا غير فايدة الليمون والبرتقال إن فيهم فيتامين سي وبالتالي مضاد للأكسدة ومضاد للتجاعيد
الصبار بيفتح ويخفف النمش ويصفي البشرة
** الهالات السوداء **
هاكتب عنها بالتفصيل بإذن الله لما أنزل موضوع عن كريمات التفتيح
لكن مؤقتا ..الهالات السوداء من الصعب علاجها سواء بالوصفات الطبيعية أو بالأدوية الطبية خصوصا إذا كان مالهاش سبب
بس معروف إن شرائح البطاطس وشرائح الخيار وكمادات ورقة الشاي الباردة بتمتص الإرهاق من جفون العين
** للرموش **
بنحط في الوصفة زيت الخروع أوالفازلين أو زيت اللوز الحلو
وكحل الأثمد الأصلي لو متوفر طبعا
لو سمعتوا عن قطرات العين اللي نازلة جديدة لإنبات رموش العين وتطويلها فعلا بتكثف الرموش جدا لكن .. مانصحش بيها لأنها بتعمل هالات سوداء شديدة جدا جدا وكمان بتخفض من ضغط العين
** للشفايف **
أسهل شئ وضع طبقة سميكة جدا من الفازلين قبل النوم
أو أي نوع زبدة كاكاو ترتاحيلها
مع ترطيبها طوال اليوم
فيه وصفه بنصح بيها دايما وهي
((شمع عسل+ ملعقة فازلين أوزبدة كاكاو+ نقاط من زيت الخروع+نقاط من زيت اللوز
توضع على نار هادئة حتى يتخلطوا جيدا وتوضع بعلبة تجمد))
=-=-=-=
دي الوصفات الطبيعية اللي بنصح بيها دايما أي واحدة بتطلب استشارة لو حالتها مش محتاجة علاج وفقط محتاجة إهتمام بوصفة طبيعية
بإذن الله لو تذكرت وصفات أخرى طبيعية مفيدة للبشرة ومش مضرة هاضيفها ليكون ملف مفيد ليكم
وأي استفسار أو طلب رأيي في وصفة طبيعية أو خلطة كريمات أنا موجودة
وخدوا راحتكم في الأسئلة
..