سلسلة كيف؟؟ كيف تعلمي طفلك يفرش اسنانه

صبااااحهن يا رب خير هالحووووائيات
حبيت اليوم اطرح لكن موضوع مهم وهو كيف تعلمين طفلك يفرش اسنانه ويبدأ يستخدم معجون الاسنان عشان سنانه تصقل من البياض وما تصيبه سوسة او اي مشكلة وتكون ريحة فمه نظيفة ومنعشه خاصةالصباح ويبان اهتمامك من عيالك حتئ باسنانهم ،،،المهم مالنا بالطويلة
اول شي روحي انتي وولدك او بنتك ربي يحفظهم للسوبر ماركت وخليه يختار ويشتري لنفسه فرشاه ومعجون خاص حق الاطفال عشان يتحمس وساعديه ف اختيار الفرشة الناعمة
وبعد شي ثاني لا تظنين انه طفلك بيعرف يستخدمهم من اول مره يعني كل شي بشويش والهدواة ما شي يجي بالصراخ والمهاوش كله بالتشجيع( ي حبيبي انته بطل ،نظيف، اللله اسنانك بيضا وبكذا ما بتجيك سوسه وما بتروح للطبيب وخالتك اليوم تقولي اسنانك مرة بيضا) ومن هالكلام وونوعي باسلوب تشجيع كلمة حلوة ومرة شوكلاته
واذا حسيتيه ما عجبه طعم المعجون ما يخالف بدليله نوع ثاني لين ما تحصلي الي يرضيه واكبر غلللط انك تعطيه معجون حق الكبار لاااا ما بيقدر يتحمله وبتعقدينه انه يستخدمه وبتكوني انتي سبب ف اهمال طفلك لاسنانه
وبعد شي ثاني حاولي تفرشي انتي وياه مع بعض كذا يتعلم منك ويقلدك ويا ويل حالي اذا انتي بنفسك ما تفرشي اسنانك ومهملتهن مستحيل تقنعي الولد ،،خاصة الصباح اذا تقوموا مع بعض ضروري فرشي معاه وحاولي تحطيله كرسي او اي شي يستند عليه عشان يشوف نفسه بالمراية وخليه يشوفك كيف تفرشي اسنانك
اعمليله جدول لتنظيف الاسنان وكل ما نظف حطي تك او علامة صح وبنهايه الشهر كافئيه عشان ما يتعود انظف اسناني عشان الهديه واذا ما فيه هديه ما ينظف بس بالبدايه كل شي صعب فحاولي تكافئينه بنهايع الاسبوع واعمليله مسابقة مع اخوانه واذا عنده اخوان خليهم يعاونوك ويساعدون اخوهم الصغير عشان التنظيف
علميه عن خلق حلو وهو ما يسرف بالماء اثناء التنظيف من غير الحوسه الي يمكن يعملها ويبل ملابسه بالماء حطيله فوطة خاصة لتنظيف اسنانه يلبسها عشان ما يوسخ ملابسه ومن ثم ينشف فمة ووجهه بعد التنظيف وافضل افضل طريقة حطيله كوب بلاستيك بدل البهدله ويكون صغير واصابعه قصيره فدددديته ما توصل يده للماء
اذا كان طفلك من النوع الي ما يحب المعجون وما قدر يتقبله ابدأي معاه بالفرشة بس تراها والله مهمة وتزيل،بقايا الاكل بين الاسنان حتى لو من دون معجون وخليها عاده معه بعد الغدا خاصه وبالصبح وليل بالمعجون
تدرجي معاه بوقت تنظيف ابدي مثلا الاسبوع الاول بدقيقة ثم دقيقتين الئ ان توصلي الئ ثلاث وهذا اضعف الايمان المفروض يوصل لخمس دقايق الله يعينا وبالهحركة انتي بعد تتعلمين تفرشين اسنانك لفترة طويلة وتقدرين تحطين مؤقت من يوصل،لخمس وقفي
علمي ولدك انه ما يغسل اسنانه وكانه ف معركة وبالقوة لان هذا يضر الاسنان ويسبب التهاب اللثة والحل التفريش بشويش والراحة ولفترة طويله افضل من تفريش لمده دقيقة وكانك تحفري ابار
علميه انه فرشاته خااااااصة فيه ما حد يستخدمها غيره لا اخوانه ولا اي حد ثاني
من يكبر ويروح المدرسه عطيه فرشه خاصه من دون معجون يكفي بس فرشه وخبريه يفرش اسنانه بعد الاكل وليش ما يشل معاه معجون واايد اسباب اولها كثره استخدام معجون للطفل ما ظن انها نافعه لانه اوردي يفرش اسنانه بالمعجون بصبح وليل والعصر بعد زين اذا كان يقيل وقت الظهيره وثانيا بالمدرسه مشكله يوسخ ملابسه وما تتاكدين اذا،غطاه بطريقة محكمة ويوسخ اغراضه
وفيه شي ثاني انه الطفل ف بدايه لازم بيسويلك بقع ع المغسلة علميه ينظفبها المغسله لا تخلينه يتعلم عاده سيئة والمعجون منظف جيد حتئ للمغاسل
علميه ان الاكل ممنوع بعد التفريش وحاولي قد ما تقدرين انه ما ياكل حلويات او تشيبس او بسكوت قبل النوم واذا لابد عطيه الصباح وقت ما يروح المدرسه وياكلها وقت الاستراحة او العصرية
علميه ع طريقة منظمة ف التنظيف وهي اول الاسنان الاماميه الي فوق ثم تحت ثم الاماميه الي داخل فوق تحت ثم يمين للخارج للي فوق وتحت ثم يمين داخل فوق تحت ثم يسار فوق تحت للاسنان الخارجية ثم فوق تحت الي داخل ثم لسان حسيت عمري كان ف حصة ريااضه هههههه وف بدايه صعب بس مع تدريب والللله تضبط واذا انتي ما تعلمتيها وعرفتيها ما بتقدرين تعلمينها للطفل
حاولي تذكرينه باصحابه او شخصيات كرتونيه يحبها وقولليله شوف كيف اسنانهم بيضا وحاولي تجيبين صور للشخصية الكرتونيه وهم يفرشون اسنانهم
والاطفال يبغالهم سعة صدررررر ولما تعاملينهم بالتشجيع والكلام الحلو والله يسمعون الكلام بس يبون منك اهتمام واذا ما حافظتي ع عيالك ع من تحافظين ؟ زوجك ههههههه.. وخلي تفريش الاسنان قصة جممميله بينك وبين طفلك ويذكرك لما يكبر ويقول يمه تذكرين يوم نفرش اسنانا مع بعض .. تعبن يدياتي وعظيماتي وانا اكتب والحين اوقف والى اللقاء مع شي جديد من قولو لي كيف ههه امزح امزح اقصد سلسلة كيف اخاف صرت دانيه شافعي ع غفله