سلطة غير من ريال الفسحة

اليوم زي ما عودتكم حأكتب عن طبق جديد ( وحدة مرة مسوية نفسها مهمة . ولا عمري كتبت في قسم المقبلات)
لا بجد . حأكتب عن سلطة لذيذة جدا , انا ذوقي في الاكل صعب ولا احب التغيير لكن لمن ذقت هذي السلطة عند اختي صار عندي ادمان عليها وهي تصلح كمقبلات لمن تعملي بوفيه وكمان في الفطور او الغداء او لمن تبغي تاكلي حاجة خفيفة وهي بسييييطة وبسرعة تنعمل
المقادير
- فاصوليا حمراء معلبة
-بازيلاء معلبة
- بليلة معلبة
-ذره معلبة
- مكرونة صغيرة مسلوقة
-خس مقطع( ياليت تأخذي الاوراق الصغير لانها الذ)
-شوية كزبرة مفرومة
-ليمون
-ملح
-مايونيز
-كاتشب
-مخلل مقطع ( واذا ما تبغي مو شرط)
-خردل ( واذا ما تبغي مو شرط)
الطريقة :
صفي الفاصوليا الحمراء من مويتها والبازلاء والذرة والبليلة وغسليهم وصفيها بعدين حطيها في زبدية
اضيفي لها المكرونة المسلوقة والخس المقطع والكزبرة المفرومة و المخلل واعصري فوقها ليمون حسب الرغبة وملح وشوية مايونيز وشوية مرة كاتشب وخردل حسب الرغبة وبالهناء والعافية والله يابنات مرة لذيذة واحلى ما فيها انك تقدري تخلطي الفاصوليا الحمراء والذرة والبليلة والبازلاء والمكرونة وتحطيها في برطمان تقعد معاك اسبوع ما يصير لها شيء وكل ما تبغي منها خذي شوية منها واضيفي لها بقية المكونات