سلفتي تعبتني...يارب زدنا صبرا ً

السلام عليكم ورحمة الله
انا متزوجة من سنة ونص عمري ٢١ وعندي ولدي الصغير عمره ٩ شهور حالي حال نفسي ف الجمعات احد يكلمني كلمة ورد غطاها المهم مشكلتي حالي حال الحريم سلفتي اللي متزوجة قبل ٦ سنين .
واللهي ف اي جمعة هيا موجودة احس نفسي اترك واخرج من المكان اللي هي فيه من اللي بتسويه فيني ....ومثال ع دا الشيء اي كلمة اقولها معنها تكون ساكتة لمن كلهم يتكلموا وسرحانة ف جوالها وبس ابدأ اتكلم تقعد تعيب لي ع كل حرف ...مرا عمتي ام زوجي رسلت لها اكل ويوم الجمعة قالت تسلم يدك ماشاء الله طعم وقالت فيه طعم غريب فيه ايش هوا ...قلتلها الماجي وانو ف كل طبخاتي احطه ..قالت ماشاء الله حلو وحأجربه الا تدخل ف نص الهرجة سلفتي وتقول كيف انتي تطبخي وتأكلي زوجك وتأكلوه تراه ممرض ويجيب أمراض ع المدا البعيد ... يعني من النهاية تستصغرني وتعيب علي بكل فعل اسويه ومن ربنا يجي المدح عليه .....والشيء التاني عندها بنت عمرها سنتين وفقدت قبلها اثنين والحمل الثالث حمدالله ربي أكرمها ببنتها والله اني احب بنتها حب كأنها بنتي وولدي ولا تمسكه ابدا ً وتطنشه وصرت اطنش بنتها كمان مافي احد احسن من احد الا اذا راحت تصلي امسكها واسلم عليها وولدي تقعد تسال عن ملابسه وتسمعني انو تلبس بنتها من دي الماركة كمان علماً انو دوبي اكون عارفة انو اللي لابسة ولدي من اللي بتقول عنه الماركة لانها حقت ولد اختي الشيء اللي يكون جديد وصغر ع ولدها تعطيني ياه ..اكمل.. ومن يوم ما حملت وزوجي قال لاهله اني حامل بولد عرفت والين الولادة والا الآن تكلمني من طرف خشمها ،،،ولا انا والله وربي شاهد عليا ما يفرق معايا بنت ولا ولد بالعكس والله كنت اتمنى بنت ادلعها بالفساتين والربطات وكنت دايماً اتمنى اولد اول ولادة ليّا بنت بس اللهم لك الحمد نفرح بكل نعمة ربي عطانا هيا وفرحانة كتير بولدي الحمدالله ربي يقر عيني بيه وينبته ننال حسن وجميع اطفالنا ....ارجع للكلام ...اي احد ف أي جمعة واحنا مجتمعين يمسك ولدي سواءاً جدته ولا جده ويحبوه خاصةً انه اسمه ع اسم جده ف مرا مرا ماشاء الله يحبوه وبنفس المقياس يحبوا بنتها بس لا لمن ولدي يكون معاهم تقول لبنتها روحي سلمي ع جدو وبوسيه واقعدي ف حضنه جنب النونو وبوسي النونو وقولي لمامتو تاخذه ...أضحك واطنشها واخذها ع عقلها وحركاتها معنها والله اكبر مني ب ٥ سنين وهذا غير تقعد تعيب في اكل ولدي واي أكلة اسويه له تقولي ايش مسوية ....أقلها ايش مسوية تقول لا دا مررا مو طيب ما يناسب الأطفال وما ناسب بنتي فلا تعطيه ولدك ...قلتلها بنفسك قولتيها ما ناسب بنتك مو يعني ما يناسب الأطفال كلهم وغير كدا وماشاء الله انا وحدة لا جا عزيمة اكشخ مزبووط واكشخ ولدي باللي عندي ما اشتري ولا شيء دبشي جديد لاني حملت بعد زواجي بشهر ماشاءً الله يعني جديد وكمان جلابيات الحمل اخذت شيء فخم فكلها صرت أحللها ف العزايم اللي نادر تجي لدرجة لمن ادخل محد يصدق انو انا اللي دوبي كنت جالسة معاهم ع الغدا المهم ف العزيمة ديك اكون قاعدة لوحدي مع ولدي بسببها تحسوا كأنها تبى كلهم يتجمعوا عليها ويكلموها بس هيا وغير انها تسوي حركات بوجه فمها وتشميقات وتقطع كلامي لمن اي احد كبير يكلمني وتقعد تحرجني قدام ٢٠ حرمة اول ع نياتي كنت اسكت ما افهم بس والله الحين غير صرت ارد عليها واسكتها بكل صغيرة وكبيرة ......وقبل فترة سافرنا انا وزوجي وولدي وعمتي معانا كانت سفرة هدية بمناسبة ولادتي المهم الين قبل السفرة بيومين جات كلمتني لحالي وارسلت لي ع الواتس تقولي لا تاخذي العمة معاكي كبيرة ف السن وعجوزة حتخرب عليكم الطلعات والندرات وكل شوية تبى ترتاح حتتعبكم روحي لحالكم انتي وزوجك وولدك واتهنوا واتخيلوه شهر عسل ... بس قلتلها بالعكس حتنبسط وتغير جو خاصةً انو المدينة اللي حنروحها كلها طبيعة وحتعجبها واصلاً استحي اقول لزوجي لا تاخذ امك تعبت عليه وربته وف النهاية اجي انا أقله لا تأخذها قالت اللي يريحك بس انا قلتلك ونبهتك وسافرنا حمدالله يارب انبسطنا فيها وعلاقتي بعمتي صارت اقوى وبعد ما رجعنا من السفرة حقتنا بعده بأسبوعين الا هي وزوجها ماشاء الله يباركلهم مسافرين وتقول ما احأسأفر الا رجلي ف رجل عمي وعمتي وفعلاً ماشاء الله سافروا ورجعوا وكل دا ما افتكر الا اليوم اللي كانت فيه تقول لاتأخذي العجوزة .....ومن يوم ما عرفتها ع طبيعتها صرت واللهي ف سجودي ادعي يارب اكفنيهم بما شئت وابعد عني شر ما قضيت وأقول اسمها و احاول اقلل الكلام بيننا واذا قعدت تعيب ف أي شيء اسويه او تقاطعني ف هرجة صرت اسكت وأعطيها نظرة وارجع اكمل كلامي والله انها تنفجع وتمسك فمها وتقفله ولا تفتحته الا اذا احد كلمها ............... دحين من كلامي دا كله اباه اعرف كيف تتعاملوا من اللي شخصياتهم كدا واللهي ادعي وادعي و اللي يصير منها كتير مو قليل والشخص عنده قدرة استحمال محددة وبعده اي شيء يصير لي اقعد ابكي لا تلقائي وأقول ليه كدا تعاملني واقعد ادعي يارب صبر نبينا أيوب وابد ما امل من الدعاء وربي يعلم بحالي من اذها كل نهاية جمعة لمن نرجع قبل النوم لازم ابكي عشان ارتاح ..وبس والله والحمدالله ع كل حال ..ربي يجنبني ويجنبكم كل من أراد بِنَا بسوء يارب اشغله ف نفسه.