سلفتي تغيرت للاحسن وصرنا مثل الاخوات بسبب هالطريقه

السلام عليكم
شي فطري الغيره بين الحريم
كل وحده تبي الزين لها والجمال لها والمدح لها
ماراح ننكر هذا الشي
اول سلفتي كنا انا وياها كل وحده تبين لثانيه اني انا اللي ذويقه وطبخي حلو ووجب حمولتي احسن منك
لكن من تحت التحت بدون تصريح
بعدها صارت سلفتي تغار بشكل واضح وصريح وصارت تنقل حكي لاهل زوجي عني
وصارت بعد تنقل الخواتها وامها حكي عني وعن استفزازاتي لها << خصوصا اخواتها بنات عمي
اكيد بيتغيرون لتجاهي بسبب غيرتنا بيني وبين اختهم
اخر شي فكرت حسيت اني سخيفه بتفكيري ابين لها اني افضل منها حتى لو كذب !!
غيرت تفكيري الثلاث اسباب
اولا حسيت ان هالشي معناه عدم ثقه بالنفس وغيرة حريم ونقص عقول
السبب الثاني حسيت هالسخافه اللي نعملها سببت لنا مشاكل حنا في غنى عنها
فحبيت اتقي شر الحريم لان نقل الحكي بين النسوان وتبهيرها يهدم بيوت ويخرب العلاقات
والسبب الاخير والاهم هو ابي رضى ربي علي بالنهايه هي سلفتي وجارتي
صرت كل ماشوفها ابتسم لها واحسن النيه لها وامدح اللي تشتريه واسئلها من وين << عشان تنبسط
واسئلها عن اهلها كيفهم سلمي عليهم ومن هالحكي الحلو
واذا اكلت من حلوياتها امدحها وتسلم هالايادي
والله يابنات صارت تدعي لي وتسلم علي بحراره كل ماتشوفني كني اختها شعوور حلو والله الله يديمها
المطلوب منكم تعاملون الناس مثل ماتحبون يعاملونكم
ابعدو عن مدح الذات وعن الغيره صدقوني بتستمتعين بيومك بدل الاحقاد والاحساد
وشكرا