سلفتي مااستقبلتني ولا ضيفتني

السلام عليكم ورحمة الله وبركاته
صباح الخير
بنات انا بعطيكم نبذه بسيطه عني وعن وضعي عشان توضحلكم الهرجه
انا متزوجه من شهرين زوجي ما أثث الشقه قبل الزواج اتفقنا انو بعد شهر العسل نأثث سوا حابه يكون كل شي على ذوقي
اهل زوجي من الجنوب وعاداتهم وكلامهم مختلف عننا ولمن اجلس مع امو ما افهمها ابدا ..هيا كفيفه الله يشفيها ومابقي عندها الا ولد واحد مو متزوج
ساكنه في شقه لوحدها مع ولدها الصغير و ولدها الثاني ساكن ف شقه قدامها متزوج ومخلف بنت
وبعد زواجنا جا ولدها الثاني وسكن معاها وزوجته على حسب كلامها مي راضيه تبغى بيت لوحدها
المهم احنا من عاداتنا العروسه ماتزور احد ولا تدخل بيت احد اذا مازارها
بس زوجي يلح عليا ويحرجني كل يوم يلا عند اختي يلا عند اخويا يلا عند امي
ابغاكم انتي وزوجات اخواني زي الاخوات وانا ماعندي مشكله زرت اخته
وامه اروح لها كثير واحيان انام عنددها لمن يكون في العمل واكون خايفه انام لوحدي
بس بعد سكنت سلفتي معاها في نفس البيت صرت استحي اروح اي وقت واخاف اكون ثقيله ومره عزمنا اخوه ع الغدا ورحت وجلست معاها واستقبلتني ورحبت فيني وجلسنا سوالف للمغرب
وبعدها بشهر يمكن
عزمتنا امه ع الغدا ورحنا يعني دي تاني زياره
المهم مره مااستقبلتني زي الناس سلمت ببرود وكيفك وبس
تغديينا انا وهيا و ام زوجي بعد الغدا قامت تغسل المواعين
جلست فالمطبخ نص ساعه تقريبا سايبتني لوحدي و ام زوجي راحت المجلس عند اولاادها
بعدين خرجت من المطبخ ودخلت الحمام جلست ساعه تغسل الملابس وتدخل غرفتها ترضع بنتها
وانا لوحدي زوجي يبغى يجلس مع اخوانه وانا ماعرفت اتصرف استحيت اخرج وهيا مو موجوده وندماااااانه اني ماخرجت
المهم وهيا فالمطبخ نادتني اجبلها الكلوركس من الحمام وقمت جبته واخذت المساحه منها قلت اساعدها ولا ردتني و لا قالت لا روحي اجلسي ماصدقت اعطتني هيا ورحت مسحت سيراميك الصاله
بعدين جات سلفتي التانيه وقامت صلحت شاهي وقابلتها وسوالف وضحك وانا على جنب وتوريها صور فالجوال وانا لا حسيت اني مزهريه
لدرجة ان سلفتي التانيه مستحيه كل ماورتها شي تاخد الجوال وتوريني
المهم قالت سلفتي التانيه نجود ماشربت قهوه قومي سوي قهوه وانا بروح بيتي اسوي بسبوسه قالت يوووه مافيني قومتها بالغصب قالتلها تسوين ولا اروح بيتي و اسوي انا
والله حسيت كرامتي اتهانت اول مره احد يسوي فيني كذا وكرهتها ورجعت البيت جلست ابكي انقهرت اني ماعرفت اتصرف واقوم حتى زوجي لمن قلتله مره زعل وقال مانروحلها مره ثانيه مع انه كان مطفشني بالغصب سيرو اخوات
ذحين انا مقهوره ونفسي ارجع كرامتي مو عارفه اش اسوي اش تنصحوني والله حتى ماقلت لماما عشان ماتهزأني وتقول ليش جلستي بعد كل دا