كيف حالكم ياحلوات مع رمضان
الله المستعان انتصف الشهر الله يجعلنا فيه من المقبولين
اليوم مسوية لكم سمبوسة بالبر على طريقة امي الغالية الله يحفظها ويعافيها
بناء على طلب كثير من الصديقات المقربات ومن حبهم لسمبوسة امي قالوا لي لازم تنزلينها
ونستفيد منها
المقادير:
كاس ونصف موية
ملعقة كبيرة ممسوحة خميرة
ملعقة صغيرة سكر
2ملعقة كبيرة حليب بودرة
2ملعقة كبيرة زبادي
2ملعقة اكل زيت
ذرة ملح
تخلط بالخلاط ثم يضاف لها كاسين دقيق وكاس بر واذا شفتيها تحتاج زيادة زيدي
وتكون بالشكل هذا
نخليها تتخمر عشر دقايق ثم اقطعها قطع صغيرة واخليها ترتاح لعشر دقايق اخرى
نبدا بفردها ووضع الحشوة عليها
وهذي صورة للحشوة
احمس اللحم لحاله واضيف له حبة ماجي وشوي كمون وفي مقلاة احمس 2بصلة واضيف لها زيت زيتون وبهارات كمون وفلفل وكزبرة ناشفة واخليه لين يبدا يتشقر ثم اضيفه للحم
واخليه على نار عاليه لمدة دقيقتين بعدين اسكره بعد ماتكون طبعا الموية ناشفة
اذا بردت اضيف لها بيض مسلوق مقطع صغار وبقدونس وكزبرة خضراء مفرومة
وهذي صورة بعد ماخلصت منها
وهذي بعد ماقليتها
ولاول وحده ترد هالصحن كله وكانها رشيقة تاخذ هالقطعة المقطوعة اوفر لي
ههههههههههههه
على فكره الي ماتحب القلي ينفع تدخلها الفرن وبعد ماتخرجها على طول تحطها بحافظه وتطلع روعه وصحية مره
وبالعافية على قلوبكم
لكل من مر من هنا دعواتكم لامي الغالية الله يشفيها ويعافيها ويقويها على طاعته