شو اخباركم عسولات؟؟؟؟ وكيف صحتكم؟؟؟؟؟؟؟
اليوم عملت سمبوسك النقانق بالجبنة وكتيييييييييييييييييير طيبة
وان شاء الله بتجربوها وبتحبوها
بسم الله توكلنا على الله نبدا
المقادير
علبتين نقانق ونقطعها دوائر صغيرة
بصلتان كبار مقطعات مربعات صغيرة
جبنة موزاريلا مبروشة حوالي كوب ( وممكن زيادة الكمية حسب الرغبة )
بندورتان كبار مقطعات مربعات صغيرة
علبة ذرة
ملعقتين اكل كاتشاب
بهارات مشكلة وملح حسب الرغبة
مربع مرقة الدجاج مبشور ناعم
رقائق السمبوسك ( حسب الي بتحبيه وبترتاحيلو انا بحب السنبلة)
وهلأ حبيباتي الطريقة
بنحط شوية زيت تقريبا 3 ملاعق اكل على نار هادية ... انا استخدمت زيت زيتون وبتقدري تحطي زيت مازولا او زبدة حسب ما متوافر عندك وبتحبي
وبعدين بنحط البصل وبقلبهم بالمعلقة كل شوي والتانية وديري بالك ينحرقو بس تدبيل
وبس يدبلو بنحط البهارات ومكعب مرقة الدجاج عليهم وبنحركم وبنتركم حتى تدبل البصلة
وبعدين بضيف البندورة والكاتشب وبقلب وبتركهم حتى يمتزجو ويستو مع بعض منيح وبتحسي انو في مي في الخلطة بس هادي من البندورة وعادي بتظلك تقلبي بين فترة والتانية حتى تنشف المي
وبعد ما استوت البندورة مع البصل بحط النقانق وبقلبهم وبتركم عالنار تقريبا 7 دقايق وبطفي النار تحتهم
وبعدين حبيباتي بحط الذرة والجبنة وبحركهم كلهم مع بعض ورح تلاحظو انو الجبنة دابت بين الخلطة .... عنجد طيبة
وهيك الخلطة بتكون خلصت بتركها على جنب حتى تبرد عشان ابلش احشيها بالرقائق
ولازم كمان حبيباتي تحضرو لتلزيق اخر السمبوسك عشان ما تفتح معكم بالقلي مي وطحين
وهلأ بعمل السمبوسك ببلش احط الخلطة على اول الرقائق وبلفها مثلثات وقبل اخر ثنية بحط من خلط التلزيق وبلزقها
ما حدا يرد عسولات بدي اكمل لسة ضايل الاشي الاهم
وبعدين بنيجي للقلي
بسخن الزيت على نار عالية وبعدين بخفف النار انا بحب استخدم زيت نباتي للقلي
وبحط بعدين بالمقلاة 4 حبات او تلات عشان ياخدو مجدهم بالمقلاية وبقلبهم عالوجهين حتى ياخدو اللون الذهبي وبعدين بحطهم على ورق نشاف وبعدين على طبق التقديم
خليكم مع الصور
وصحتين وعافية
ادعولي كتيييييييييييير ومن قلبكم الله يسر امركم وينولكم الي في بالكم يا رب