خلاص عزلتو من الحمل و جيتو عالطفل :)
مبروك النقل عقبال كل وحده فيكم تنقل لبيتها الجديد
على طاري النقل انا يمكن بعد شهر انقل لشقه جديده اخف في عدد السلالم لاني ظهري خلاص انتهى من هالشقه 6 سلالم للطابق الثاني .. شنو هذا !!!!!

اخباري الحمد لله مافي شي جديد غير اني عايشه في دوامه ماراح تخلص الا لم اتخرج
لان حمود مو مقصر فيني بدا يزحف و لاز انتبه له لان مغرم بالفيش و الكهربا و من يومين دخل تحت الكرسي وتوهق فقعد يصرخ

بالنسبه للتسرب هذي المشكله البايخه انا بدلت حفاظات مودو لبامبرز 4 بعد ماكان 3
4 كبيره عليه شوي بس اهون عليي صحيح في تسرب ساعات بس مو كل ليله مثل قبل
اذا انومه على جنب لازم يسرب

بروح اسوي بحث حق الجامعه استأذنكم :)

هلا امهات شلووووووووونكم؟؟

دفى
لاتضربين على الوتر الحساس،،الامساك مشكلة ولدي اللي مانحلت،،عطوني له محلول ماي وسكر مدري الظاهر لاكتلوز،،ويمشي بطنه مرة في اليوم،،بس امس آخر يوم من المحلول واليوم ماعطيته وللحين مافيه خبر!!!
البرتقال لحاله مايسوي نتيجه،،بنشوف شنو آخرتها
بالنسبة للمشاية انا سألت الدكتور وقال لي لسة بدري عليه،،بيني وبينك،،انا من قبل لا أسأل كنت اشوف ان بدري عليه،،هو خل يقعد اول وعقب افكر في المشاية.
دفى دام زواج اختك ليش ماتفصلين،نالحين يختي التفصيل يكلف فوق 2000 ريال
يعني القماش اذا بتآخذينه اكيد بتآخذين لمصمم معروف،،هذا بالراحة بيطلع 2000 وشوي
اذا كان قماش شــــــــــــــــي،،قولي بالخياط اذا بتفصلينه عند خياط مميز في السويكت بيطلع الخياط لحاله 1500،،يعني خل ميزانيتك على 4000 او 5000
انا في آخر زواج لنا زواج بنت عمي ،،كلفني الفستان قماش وخياط 4000 ريال مع الاكسسورات اللي يصممها المصمم مع الفستان طبعا.. بس طلع شي والكل سألني عليه،،كان تركواز مع بيج
هو انا ما افصل لي الا بزواج وحدة قريبة مرة،،يعني اختي،،اخت زوجي او بنت عمي(لان انا علاقتي ببنات عمي مرة قوية)مثل الخوات
التسريحة انا ماحب الشي المرفوع ابدا،،حتى بزواجي كان شعري بسيط مرة،،وفي زواجاتنا اخلي شعري مفتوح مع حركات بسيطة وناعمة..

الله يعينك يادفى ويعين رجالنا على مصاريفنا!!! انا بالصيف عندي زواج ولد عمي،،والمفروض استعد له من الحين لان بيت عمي هذا عايشين معاهم وعايشين معانا طول الوقت فصايرين اخوة وخوات

مراوي
الله يسمع منك على النقل ونستقر في بيوتنا بدل الشقق وايجاراتها المرتفعة
وانتي شقتك مافيها الا سلالم؟تعب والله بالذات ان السلّم حقكم وايد!!! الله يعينك

انا بعد جودو صاير زحف بس تخصصه طيحات،،اليوم رحت معاه المستشفى كنت خايفة عليه اخر مرة طاح الاسبوع الماضي وصرنا نلاحظ ان يده كل يودها على ورا فخفنا ووديناه اليوم وطلع مافي شي،،الحمدلله
بس عنده حساسية ورا اذنه،،وايد احمرار وزي السائل ورا الاذن واخذنا العلاج
هالولد بسرعه يتحسس ،،من كل شي

التسرب يختي انا جنيت منه الفترة الي راحت،،لاني غيرت مقاس الحفاظ بامبرز من 3 الى 4 بلس لاني مالقيت 4 في الصيدليات اللي حوالينا،،قلت اكيد ايجيبوه
وطار عقلي من التسرب بزياااااااادة ورحنا ندور في صيدليات ابعد والحمدلله لقيناه4 بس مثل ماقلتي التسرب خف وايد،،بس لما ينام على جنب ساعات اطول لازم يتسرب،،بس الحمدلله مو على طول

.>>>>>كأن هذرتي مو مخلصة؟؟
بس لأن جواد نايم قلت خل آخذ راحتي بالرد قبل مايصحى

انا الليله بجرب حل جديد للتسرب و ارد لكم خبر عنه باجر

كنت شاريه مثل حفاض بس قطني من بره و من داخله مثل البلاستك ماعرف اوصف :) المهم كنت شاريته على اساس البسه حمود بدون حفاض لانه كسر خاطري طول اليوم عليه و مرات احسه معلم على فخذه بس طلع مايناسب لان المفروض من داخل قطن عشان يمتص البول الله يعزكم و النايلون من بره عشان مايتسرب لبره

مالكم بالطويله .. تم عندي هالحفاض يمكن شهرين مااستعملته و الحين شفته قلت خل البسه حق حمود فوق حفاضه احس انه راح ينفع خصوصا انه يلم الحفاض فما في مجال للتسرب

الحين بروح لان حمود قاعد يصيح و يبي ينام
بعد ماكسر لي الجهاز الكالميرو :)

دفى شمس ...
اهلين وسهلين ... الله يكون بعونك على الامساك ... ياعمري البيبي يصير يقطع القلب ... بس ما سألتي الدكتور ...عن نوع حليب تغيرين له بحيث يكون يناسب شوق ... لان الامساك عادة يكون بسبب عدم مناسبة الحليب للطفل ...
وبالنسبه للفستان ... الله يسهل عليك وتلقين من غير لف ولا دوران ... وانا عارفه انه زواج اختك و لازم يكون من 1500 وطالع ... بس بصراحه الاسواق صايره تنهب الناس نهب ... يعني تلقين اللي بـ 1500 عادي جدا ويلوع الكبد الا ما ندر...

مراوي...
ما شاء الله عليك ما ادري شلون متحمله تدريس ودراسه ... انا بس افكر اكمل دراستي تجيني كتمه من مجرد التفكير ... الا صحيح ... كم باقي وتتخرجين ...؟

ام جواد ...
بصراحه ... بصراحه ... بصراحه ... انصدممممممت من السعر اللي حاطته ... يالله فستان ليلة العمر يوصل هالسعر ... والافضل انه ما يوصل ... لانه اسراق وتبذير ... الله بيحاسبنا عليه ... والفستان اللي بيتفصل بهالقيمه هل بينلبس مره ثانيه ... لا طبعا ... اكيد مرده الدولاب او الجمعيه ... انا احس اذا قطعت قلبي كلش كلش ... 6 ألاف ... واحاول ما اوصلها باي طريقه ... ما يطاوعني قلبي افصل فستان بهالقيمه ... ان شاء الله ما يكون كلامي ضايقك ... بس ما حبيت ما انصحك ... وانا اشوف ان هذا اسراف بتنسألين عنه يوم القيامه ...

اهلين لوووووووووولي
اول شي في خطأ في الارقام كنت اقصد
في صفر زياااااااااااااااااااادة
ههههههههههههههههههههههههههههههههههه والله تو انتبه
لما كتبتي 6 الالف اقول وش الفرق بيني وبينك
الحين بروح اعدل الرد
تخيلي 40 الف هههههههههههههههههههه لا والله خطا
انا كنت اقصد 4000 و5000
بس الظاهر اخذتني الوناسة لان جواد نايم قمت ازيد بالاسعار،،انا فستان زواجي ماكلفني 40 الف،،فستان سهرة بصرف عليه هالسعر؟؟
عمما يختي زين وضحتي لي ولا البنات بيقولوا هاذي تلعب بالفلوس لعب ههههههههههههههههههههههههههه
والله ضحكت من قلب على خبالي بالكتابة