بسم الله الرحمن الرحيم
و الصلاة و السلام على خير الانبياء و المرسلين
شلونكم حبيباتي بما اني استفدت منك كثير بقولكم عن طبقي
المهم انا اول مره سويت ورق عنب من وصفة عضوه بالمنتدى و الصراحه طلع عادي و تذكرت زميلتي الزبيرية و طبعا الزباره معروفين بمطبخهم الرائع تذكرت دولمتها ( ورق عنب بس يخلونه كبار مثل المخده و حشوتهم غير)
قالت لي الوصفه و سويتها دولمه و ملفوف ( كرنب) و ضبط و انا ببداياتي الحمد لله
على فكره صار الطماط كثير و التمر الهندي هم كثير عاد انتو قللو منه شوي
الكمية مره كبيره اطلعت كفت ملفوف كبير و قرشة ورق العلالي
رز البجعه المصري تقريبا 4 اكواب
ربع كيلو لحم بقر مفروم شريته من بنده قالي برازيلي ترا البقر اطعم من الغنم و حسيته قليل بالمره الجاية بحط نص كيلو ان شاء الله
طماط مفروم بالشوف انا احط
بصل مفروم تقريبا راسين
راس ثوم مفروم
نص كوب دبس الرمان انا ماركتي اليمامه
خل كم ملعقة
نص شدة بقدونس و مثلها نعناع او اكثر
شدتين شبنت و هني السر و سر الطعامه
بهورات و ملح البهورات من كل نوع شوي ( ملح كركم فلفل ليمون اسود زنجبيل كمون و اذا عندك غيرهم حطي)
هي تقول نحط معجون طماط بالحشوه نفسها انا حطيته بالصلصه عاد انتو جربو الاثنين و الاحلى اعتمدوه
الصلصه
موية
فلفل اخضر بكبره و افتحه شوي
و هذا احد الاسرار مخلل المانجا ابو جمل ( ملعقتين كبار)
طماط بالشوف يمكن 4 او 5 و ارد و اقول طلعت الصلصه مره حمره و طعم الطماط كثير يعني قللو
ضربتهم بالخلاط
تمر هندي اعتقد ماركة السفينه عليه سفينه واحده كامله و اطلعت جدا حامضه بقلل ان شاء الله بالجايات
شوفو تنقعونها بماي مغلي و اذا دفى تاخذون شوي شوي و ترعصون و تطلعون الماي حقها يعني تحللونها هههه
و تضيفونه على الصلصه و تستخدمون اكيد مشخال صغير
يمكن هذا احد الاسرار مدري ( لان المحشي يبي شغل كثير و انا لوحدي و الكمية كبيره جدا خليت الحشوه بيوم و الطبخ بيوم) فالحشوه اخذت الطعم و تفاعلت مع اللحم الكثيرين الحين ما يحطون لحم قبل كان معتمد عند الزباره بس نصيحه حطوه بيفرق الطعم والله
حطيتها بماعون بايركس ( زجاج الفرن) و غطيتها بشفاف يوم او يوم ونص و الله مروقه ههه
فرشت قدر الضغط ببطاط ثم صفيتها حطيت غطا قدر صت ( معدن)
و صبيت الصلصه خلوها تغطيها بمقدار محترم يعني اصبعين تقريبا
و كتمت القدر و عليت النار اول ما صوتت الصفاره طمنت النار خليتها على الوسط على العين الكبيره نص ساعه
النص ساعه الثانية حطيت الحديده تحت القدر هالخطوه مهمه او يحترق ورق العنب معاك
ولاتصدقون ورق عنب يخلص بالضغط نص ساعه سويتها على كلام عضوه طلع يبي طبخ بعد يعني بعض البنات الله يهداهم ما يدققون بالتفاصيل الدقيقه مثل الوقت و على اي عين الا اذا حطته على العين الكبيره و من غير حديده يمكن الله اعلم بس المحاشي ما تقل عن ساعه بالضغط هذا المتعارف عليه
نفس الطريقه الملفوف
و الحمد لله يبيض الوجه و الكل انهبل عليه خلاص صرت اعتمد الدولمه الزبيرية من لذاذتها و عوافي على قلوبكم:)
شاهه2 @shahh2
محررة
سويت دولمة الزباره ( ورق عنب) و ملفوف الكل انهبل عليه بتظبطينه من اول مره اضمنك
20
16K
يلزم عليك تسجيل الدخول أولًا لكتابة تعليق.
ألاوس
•
واله اني اشتهيت اكل ورق عنب
الصفحة الأخيرة