ياقلبي عليك الله يفرج همك ويسخر لك
شوفي جربي مسايرتهم لعل حياتك تمشي بسلام ويخلونك تتزوجين
الله يرزقك براحة البال. أكثر من الاستغفار وحسبي الله ونعم الوكيل

الله يجزاكم خير على نصايحكم وردودكم
ومايوريكم مكروه بحياتكم يارب

وعليكم السلام ورحمة الله وبركاته

ياغالية..حجاوبك إن شاء الله بحيادية وبرغبة في الإصلاح إن شاء الله..

لازم يتصلح وضعكم...مو طبيعي تستمروا كذا...سواء هم أو إنت..

شوفي ما راح أتكلم عن أبوك..مالك إلا تدعين له وتخفضي له جناح الذل مثلما ربي أمرنا..لكن بتكلم عن أخواتك وأخوانك..

شوفي يالغالية..حالتكم الأسرية ماهي كويسة ولكنها ما تستحق لجوء لدار الحماية والله أعلم...

ححاول أنصحك...لكن حطي فبالك..حال أسرتكم عشان يتغير يبغاله نفس طويل وصبر..وإنت الكسبانة إن شاء الله

أخوانك من كلامك عنهم فيهم بذرة خير...لكن الأخطاء اللي بيسووها والمشاكل اللي بتصير كلها بسبب شيين: البعد عن الله وعدم بر الأم...

شوفي اللي ما يبر أمه عمره ما يعيش صح..ولا يتوفق...مستحيل!

بالتالي لازم تحثيهم بطريقة مناسبة على بر الأم..سواء برسايل واتس..بكلمة..بالدعاء لهم وهذا أهم شي..وبأنك أنت تبريها قدامهم أشد وأفضل بر ممكن..عشان تاخذي الأجر وتتوفقي أولا..وعشان تنصحيهم ثانيا...


وإنت يا أختي قربي من ربك..اعرفيه أكثر..تعرفي على أسماء الله ال99 ومعنى كل اسم وتقربي لله بهم...ترا لمن تحبي ربي أكثر تقدري تعبديه أكثر..واللي يتقرب من ربي, ربي يقرب له..

لاتكثري الخلوة مع نفسك إلا لو كنت في عبادة..حتى لو الجو مكهرب في البيت..معليش عودي نفسك..وعوديهم على وجودك..

لا تخليهم يقولوا هذي ثلاث أرباع اليوم في غرفتها وإذا طلعت جابت معها المشاكل..ترا الشيطان ألذ ما عنده يفرق بين المسلمين..

شوفي يالغالية..من كلامك باين أنك إنسانة رائعة وذكية ماشاء الله تبارك الله...لكن في نفس الوقت مرهقة..مرهقة نفسيا...

باين عليك إنسانة ما تنسى المعروف..والدليل برك بأمك اللي كافحت عشانكم..حبيت جدا اهتمامك بأنك ما تصيري ظالمة بأي شكل!!

باين عليك أعقل وحدة في البيت...

طيب أعقل وحدة على فاضي؟

العاقل الحكيم يتحمل مسؤولية أكبر..لأنه بعض الله ممكن يدير القرار بدون ما يشعر الناس أنه هو ورا الموضوع..

لازم تفكري بجدية بطرق تخليكم تعيشوا حياة أسرية أفضل...ما أقول مثالية لأن مافي عائلة مثالية لكن أقول أفضل..

يالغالية...ربي هو مغير القلوب ومقلبها...ربي ممكن يقلب قلوب أخوانك وأخواتك..

وعلى فكرة لازم أصارحك..ماشاء الله باين عليك مو ضعيفة وينوكل حقك..وهذا شي أكثر من ممتاز..لكن لازم تليني أحيان وتصيري حازمة أحيان..يعني نوعي..بحسب الموقف..

إنت عارفة أخطاء أخوانك..بس ممكن أقولك موقف غلطتي فيه؟
يوم أمك قالت أن أخواتك يسلموا عليك أو أنت تسلمي عليهم...تراها كانت فرصة ذهبية عشان تعود المياه لمجاريها..لكن قدر الله وما شاء فعل..

شوفي..إحنا شعب رائع لكن تنقصنا الصراحة..ما نصارح...سواء في الحب ولا في الزعل

اجتمعوا..تصارحوا!! قد إيش هالحركة تحل مشاكل كثيـــــــرة بفضل الله!!!

شوفي من تفرسي في أخوانك هم ما يكرهونك...بس هم فاهمينك غلط وأنتي فاهمتهم غلط...وهم فيهم قسوة ومايتحكموا بغضبهم..لكن ما يكرهوك..وصدقيني لو في غريب يبغى يآذيك لاقدر الله..راح يمسحوا بوجهه البلاط..

وأخواتك برضو فاهمينك غلط..خليني أقولك إيش شايفينك..شايفينك المدلعة اللي جالسة زي الملكة..وأنك قريبة من أمك..وأنك تعتقدي أنك أذكى وأفضل منهم..

لا والشيطان يدخل ويكب الزيت على النار..ويوسوس لهم..أكيد قصدها كذا..أكيد تبغى تشوه سمعتكم..أكيد كذا وكذا....

عشان كذا إذا ليقتي نفسك معصبة منهم استعيذي من الشيطان..وقوليلهم بحزم هذا الشيطان يبغى يفسد ما بينا..

وضحيلهم أنك قررت تتغيري للأحسن...مو للأضعف..لا للأحسن..مازلت متمسكة بحقوقك..لكن قررت تغيري من تعاملك

ترا يالغالية مافيها شي تساعديهم في التنظيف والطبخ..على الأقل شي بسيط..مافيها شي تاكلي من أكلهم وتمدحيه..أشياء بسيطة مثل هذي تكسر الحواجز اللي بينكم..

ابتسمي في وجههم...ساعدي..صارحي..اهدي..وأوقات خليك حازمة بس احترميهم...

وقوليلهم..حالنا هذا ما ينفع لازم نغير نفسنا للأفضل..

أما حريم أخوانك لا تدخلي أبدا أبدا فيهم..راح تنفهمي أنك غيرانة..إنتي حثيهم على بر أمك بس لا تجيبي طاري زوجاتهم


حبيبتي..لا قدر الله إمكن تصير مشاكل ثانية..لكن هذا الشي لا يحبطك بالعكس..شوفي مشاكل غيرك تهون مشكلتك

ربي يعينك ويقربك منه, ويسخر لك بر أمك ويسخر لك أبوك وأخوانك وأخواتك, ويرزقك الزوج الصالح والوظيفة الطيبة ويسعد قلبك

اسال الله العظيم رب العرش الكريم ان يفرج همك وييسر امرك