شاركوني فرحتكم .. وكل عام وأنتم بخير

كل عام والجميع بألف خير وصحه وسلامه ..

الله يتقبل منا ومنكم صالح الأعمال ويجعلنا من عتقائه من النار ..

المهم يابنات ودي نشارك بعض فرحة هالعيد ..

يعني كل وحده تقول وين تعيدت فيه ؟! .. وش لبست ؟! .. وش أعجبها في عيد هالسنه ؟! ..
وش التقديم اللي قدموا لكم مع الشاي أو القهوه يعني التفاصيل خلونا نستفيد من بعض ..

أنا بالنسبه لي العيد كل سنه عندنا في بيت أهلي وحنا من سكان الرياض بس نتعيد بالديره ولنا تقريبا 15 سنه نتعيد بالديره .. الرجال يطلعون يصلون صلاة العيد ونكون مجهزين الزوالي (الفرشه).. ونجهز صحن العيد يعني الذبيحه واذا رجعوا من الصلاة نسلم على أبوي واخواني ونعايدهم وياخذون الصحون ويطلعون بها بالشارع فيه مساحه كبيره كل أهل الديره يجيبون صحونهم ويحطونها يعني زي الأولين عيد الرجال بالشارع .. وحنا نجلس نستنى الضيوف لحد مايجون ..
أنا لبست تنوره بنيه ميدي وبلوزه كت بنيه وفوقها توب تركواز مفتوح ظهره .. وقاصه شعري شلال ودرج بنفس الوقت ومكياج خفيف .. ولما جو عماني كانوا جايبين معاهم صحن العيد حقهم وفيه ناس ثانيين جابوا صحنهم يعني المجموع ثلاث صحون للحريم .. وبدينا نتقهوى وتوزيع شوكولاته العيد وكلن يوزع عيديته الشكولاته ,, ويوزعون عيدية الأطفال .. ومن بعدها ندخل نتعيد والظهر الكل يروح لبيته ينام .. بالليل اللي يبغى يجي عندنا حياه الله بس الرجال يكونون على موعد بالقاعه اللي بنوها خصيصا لهذه الاجتماعات .. يعني العيله كلها بنت قصر كبير يجتمعون فيه ايام العيد من كل أنحاء المملكه الكل يجي ويتعيد فيه .. أما احنا الحريم فنروح 2 - 3 -4 أيام العيد بالليل يعني بس للعشاء والرجال غداء وعشاء .. ويكون فيه فعاليات من مسابقات ومجله سنويه تكون باسم العائله وتضم أخبار العائله ومواضيع هادفه ومفيده ومسابقه المجله .. وغير هذي يكون فيه مسابقات مباشره ترسم على شفاه الكل الفرح ويكون فيها هدايا ..

الله يعيده علينا كل سنه بالفرح والمسرات .. يالله الباقين يشاركوني عيدهم ..